ਅਮਰੀਕਾ ਦੇ ਟੈਰਿਫ ਕਾਰਨ ਔਟਵਾ ਨੇ ਕੈਨੇਡੀਅਨ ਸਟੀਲ ਅਤੇ ਐਲੂਮੀਨੀਅਮ ਪ੍ਰੋਜੈਕਟ ਲਈ ਵਧਾਇਆ ਨਿਵੇਸ਼

ਕੈਨੇਡਾ ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਟਰੰਪ ਵਲੋਂ ਸ਼ੁਰੂ ਕੀਤੇ ਵਪਾਰ ਯੁੱਧ ਦੇ ਦਬਾਅ ਵਿਚਕਾਰ ਚੀਨ ਦੇ ਕੈਨੇਡਾ ਖਿਲਾਫ ਜਵਾਬੀ ਟੈਰਿਫ ਦੇ ਬਾਵਜੂਦ ਚੀਨੀ ਇਲੈਕਟ੍ਰਿਕ ਵਾਹਨ, ਸਟੀਲ ਅਤੇ ਐਲੂਮੀਨੀਅਮ 'ਤੇ ਟੈਰਿਫ ਨੂੰ ਵਾਪਸ ਨਹੀਂ ਲਿਆ ਜਾਵੇਗਾ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅਕਤੂਬਰ 2024 ਵਿਚ ਚੀਨੀ ਇਲੈਕਟ੍ਰਿਕ ਵਾਹਨ 'ਤੇ 100 ਫੀਸਦੀ ਅਤੇ ਚੀਨੀ ਸਟੀਲ ਤੇ ਐਲੂਮੀਨੀਅਮ 'ਤੇ 25 ਫੀਸਦੀ ਟੈਰਿਫ ਲਗਾਇਆ ਸੀ।

ਇਸ ਦੇ ਬਦਲੇ ਵਿਚ ਬੀਜਿੰਗ ਨੇ ਇਸ ਵੀਕਐਂਡ 'ਤੇ ਕੈਨੇਡਾ ਦੇ ਕੈਨੋਲਾ ਤੇਲ ਅਤੇ ਸੂਰ ਦੇ ਮਾਸ ਸਮੇਤ ਹੋਰ ਖੇਤੀਬਾੜੀ ਉਤਪਾਦਾਂ 'ਤੇ ਲਗਭਗ 4 ਬਿਲੀਅਨ ਡਾਲਰ ਦਾ ਟੈਰਿਫ ਲਗਾ ਕੇ ਜਵਾਬੀ ਕਾਰਵਾਈ ਕੀਤੀ ਹੈ। ਇੰਡਸਟਰੀ ਫ੍ਰੈਂਕੋਇਸ-ਫਿਲਿਪ ਸ਼ੈਂਪੇਨ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਅਸੀਂ ਮਜਬੂਤੀ ਨਾਲ ਆਪਣੇ ਫੈਸਲੇ 'ਤੇ ਖੜ੍ਹੇ ਰਹਾਂਗੇ, ਸਾਡਾ ਮਕਸਦ ਆਪਣੀ ਇੰਡਸਟਰੀ ਅਤੇ ਕਾਮੇ ਦੇ ਹਿੱਤਾਂ ਨੂੰ ਪ੍ਰੋਟੈਕਟ ਕਰਨਾ ਹੈ।

ਗੌਰਤਲਬ ਹੈ ਕਿ ਬੀ.ਸੀ. ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਸਰਕਾਰ ਨੂੰ ਸਾਰੇ ਦੇਸ਼ਾਂ ਨਾਲ ਆਪਣੀ ਟੈਰਿਫ ਨੀਤੀ ਨੂੰ ਮੁੜ ਵਿਚਾਰ ਦੀ ਮੰਗ ਕੀਤੀ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਅਸੀਂ ਦੁਨੀਆ ਦੀਆਂ ਦੋ ਸਭ ਤੋਂ ਵੱਡੀਆਂ ਅਰਥਵਿਵਸਥਾਵਾਂ ਵਿਚਕਾਰ ਪਿਸਣਾ ਨਹੀਂ ਚਾਹੁੰਦੇ।