ਕੈਨੇਡਾ ਸਰਕਾਰ ਨੇ ਸ਼ਹਿਰੀ ਫਾਇਰਫਾਈਟਰਾਂ ਨੂੰ ਜੰਗਲੀ ਅੱਗ ਨਾਲ ਲੜਨ ਲਈ ਸਿਖਲਾਈ ਦੇਣ ਵਾਸਤੇ ਫੰਡਿੰਗ ਕੀਤੀ ਦੁੱਗਣੀ

ਕੈਨੇਡਾ ਸਰਕਾਰ ਨੇ ਸ਼ਹਿਰੀ ਫਾਇਰਫਾਈਟਰਾਂ ਨੂੰ ਜੰਗਲੀ ਅੱਗ ਨਾਲ ਲੜਨ ਲਈ ਸਿਖਲਾਈ ਦੇਣ ਵਾਸਤੇ ਫੰਡਿੰਗ ਦੁੱਗਣੀ ਕਰ ਦਿੱਤੀ ਹੈ। ਕੁਦਰਤੀ ਸਰੋਤ ਮੰਤਰੀ ਜੋਨਾਥਨ ਵਿਲਕਿਨਸਨ ਨੇ ਅੱਜ ਇਸ ਦੀ ਘੋਸ਼ਣਾ ਕੀਤੀ।

ਉਨ੍ਹਾਂ ਕਿਹਾ ਕਿ ਇੰਟਰਨੈਸ਼ਨਲ ਐਸੋਸੀਏਸ਼ਨ ਆਫ ਫਾਇਰ ਫਾਈਟਰਜ਼ ਨੂੰ ਇਸ ਸਬੰਧ ਵਿਚ $800,000 ਦਿੱਤੇ ਜਾ ਰਹੇ ਹਨ। ਇਹ ਪਿਛਲੇ ਸਾਲ 25 ਇੰਸਟ੍ਰਕਟਰਾਂ ’ਤੇ ਖਰਚ ਕੀਤੀ ਗਈ ਰਕਮ ਤੋਂ ਦੁੱਗਣੀ ਹੈ, ਜਿਨ੍ਹਾਂ ਨੇ ਬੀ.ਸੀ. ਦੇ ਚਿਲੀਵੈਕ ਤੇ ਕਾਮਲੂਪਸ ਅਤੇ ਅਲਬਰਟਾ ਦੇ ਗ੍ਰੈਂਡ ਪ੍ਰੈਰੀ ਵਿਚ 300 ਤੋਂ ਵੱਧ ਫਾਇਰਫਾਈਟਰਾਂ ਨੂੰ ਸਿਖਲਾਈ ਦਿੱਤੀ ਸੀ।

ਸਰਕਾਰ ਦਾ ਕਹਿਣਾ ਹੈ ਕਿ ਵਾਤਵਰਣ ਵਿਚ ਤਬਦੀਲੀ ਅਤੇ ਆਬਾਦੀ ਵਿਚ ਵਾਧੇ ਦੇ ਪ੍ਰਭਾਵ ਮਿਲ ਕੇ ਸ਼ਹਿਰੀ ਖੇਤਰਾਂ ਅਤੇ ਉਨ੍ਹਾਂ ਦੇ ਆਸਪਾਸ ਜੰਗਲੀ ਅੱਗ ਦੇ ਖਤਰੇ ਨੂੰ ਵਧਾ ਰਹੇ ਹਨ।

ਕੁਦਰਤੀ ਸਰੋਤ ਮੰਤਰੀ ਦਾ ਕਹਿਣਾ ਹੈ ਕਿ ਲਗਭਗ 4 ਮਿਲੀਅਨ ਕੈਨੇਡੀਅਨ ਉਨ੍ਹਾਂ ਖੇਤਰਾਂ ਵਿਚ ਰਹਿ ਹਰੇ ਹਨ ਜਿੱਥੇ ਜੰਗਲੀ ਅੱਗ ਦਾ ਖਤਰਾ ਵਧੇਰੇ ਹੈ। 2021 ਵਿਚ ਬੀ.ਸੀ. ਦੇ ਲਿਟਨ ਅਤੇ 2023 ਵਿਚ ਕੇਲੋਨਾ ਅਤੇ ਹੈਲੀਫੈਕਸ ਵਿਚ ਜੰਗਲੀ ਅੱਗ ਨੇ ਵੱਡੀ ਤਬਾਹੀ ਮਚਾਈ ਸੀ ਅਤੇ ਯੈਲੋਨਾਈਫ ਦੀ ਪੂਰੀ ਆਬਾਦੀ ਨੂੰ ਹੀ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ ਸੀ। ਸਰਕਾਰ ਦਾ ਮੰਨਣਾ ਹੈ ਕਿ ਇਸ ਸਾਲ ਵੀ ਜੰਗਲੀ ਅੱਗ ਦਾ ਖਤਰਾ ਗੰਭੀਰ ਹੋ ਸਕਦਾ ਹੈ।