ਦੱਖਣੀ ਬੀ.ਸੀ. ਵਿਚ ਮੌਸਮ ਨਮ ਜਦਕਿ ਉਤਰ ਵਿਚ ਹਾਲਾਤ ਅਜੇ ਵੀ ਖੁਸ਼ਕ ਅਤੇ ਗਰਮ

ਬੀ.ਸੀ. ਦੇ ਦੱਖਣ ਵਿਚ ਨਮ ਮੌਸਮ ਅੱਗ ਬੁਝਾਉਣ ਵਿਚ ਮਦਦ ਕਰ ਰਿਹਾ ਹੈ ਜਦਕਿ ਸੂਬੇ ਦੇ ਉੱਤਰ ਵਿਚ ਮੌਸਮ ਅਜੇ ਵੀ ਖੁਸ਼ਕ ਅਤੇ ਗਰਮ ਹੈ। ਬੀ.ਸੀ. ਵਾਈਲਡ ਫਾਇਰ ਸਰਵਿਸ ਵਲੋਂ ਜਾਰੀ ਇਕ ਅਪਡੇਟ ਮੁਤਾਬਿਕ ਸੂਬੇ ਵਿੱਚ ਤਾਪਮਾਨ ਵਿਚ ਗਿਰਾਵਟ ਆਈ ਹੈ ਅਤੇ ਬਰਸਾਤੀ ਹਾਲਾਤਾਂ ਵਜੋਂ ਨਮੀ ਵਿਚ ਹੋਏ ਵਾਧੇ ਕਾਰਨ ਅੱਗ ਬੁਝਾਉਣ ਦੇ ਕੰਮ ਵਿਚ ਕਾਫੀ ਮਦਦ ਮਿਲੀ ਹੈ।

ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਮੱਧ ਅੰਦਰੂਨੀ ਖੇਤਰ ਵਿਚ ਵੱਡੇ ਪੱਧਰ ’ਤੇ ਤੂਫਾਨ ਦੀ ਗਤੀਵਿਧੀ ਦੀ ਸੰਭਾਵਨਾ ਹੈ, ਹਾਲਾਂਕਿ ਇਸਦੇ ਨਾਲ ਹੀ ਬਿਜਲੀ ਡਿੱਗਣ ਨਾਲ ਮੀਂਹ ਪੈਣ ਦੀ ਵੀ ਸੰਭਾਵਨਾ ਹੈ। ਬਿਆਨ ਅਨੁਸਾਰ ਉੱਤਰ ਵਿਚ ਗਰਮ, ਖੁਸ਼ਕ ਹਾਲਾਤ ਬਣੇ ਹੋਏ ਹਨ ਅਤੇ ਲੋਕਾਂ ਨੂੰ ਅਜਿਹੀਆਂ ਗਤੀਵਿਧੀਆਂ ਤੋਂ ਸੁਚੇਤ ਰਹਿਣਾ ਚਾਹੀਦਾ ਹੈ ਜੋ ਜੰਗਲ ਵਿਚ ਨਵੀਂ ਅੱਗ ਪੈਦਾ ਕਰ ਸਕਦੀਆਂ ਹਨ ਕਿਉਂਕਿ ਇਹ ਖੇਤਰ ਨਵੇਂ ਅੱਗ ਲੱਗਣ ਲਈ ਸੰਵੇਦਨਸ਼ੀਲ ਹੋਵੇਗਾ।

ਬੀ.ਸੀ. ਵਾਈਲਡ ਫਾਇਰ ਸਰਵਿਸ ਦਾ ਕਹਿਣਾ ਹੈ ਕਿ ਉੱਤਰ-ਪੱਛਮੀ ਬ੍ਰਿਟਿਸ਼ ਕੋਲੰਬੀਆ ਵਿਚ ਵਿਟਸੇਟ ਫਸਟ ਨੇਸ਼ਨ ਤੋਂ ਲਗਭਗ ਸੱਤ ਕਿਲੋਮੀਟਰ ਉੱਤਰ-ਪੱਛਮ ਵਿਚ ਕੋਰੀਆ ਕ੍ਰੀਕ ਜੰਗਲੀ ਅੱਗ ਨਾਲ ਨਜਿੱਠਣ ਵਿਚ ਮਦਦ ਲਈ ਦੋ ਹੈਲੀਕਾਪਟਰ ਬੁਲਾਏ ਗਏ ਹਨ। ਜ਼ਿਕਰਯੋਗ ਹੈ ਕਿ ਐਤਵਾਰ ਤੱਕ ਸੂਬੇ ਵਿੱਚ 371 ਸਰਗਰਮ ਅੱਗਾਂ ਬਲ਼ ਰਹੀਆਂ ਸਨ ਜਿਨ੍ਹਾਂ ਵਿਚੋਂ 13 ਪਿਛਲੇ 24 ਘੰਟਿਆਂ ਵਿਚ ਹੀ ਸ਼ੁਰੂ ਹੋਈਆਂ ਸਨ।