ਬੀ.ਐਮ.ਸੀ. ਨੇ ਚਲਾਇਆ ਬੁਲਡੋਜ਼ਰ, ਕੰਗਨਾ ਨੇ ਕਿਹਾ ਉੱਧਵ ਠਾਕਰੇ ਤੇ ਕਰਨ ਜੌਹਰ ਦਾ ਅਸਲੀ ਚਿਹਰਾ ਵਿਖਾ ਕੇ ਰਹਾਂਗੀ 

ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਮੌਤ ਦੇ ਮਾਮਲੇ 'ਚ ਫਿਲਮ ਅਦਾਕਾਰਾ ਕੰਗਨਾ ਰਨੌਤ ਵੱਲੋਂ ਚੁੱਕੀ ਗਈ ਆਵਾਜ਼, ਹੁਣ ਕੰਗਨਾ ਤੇ ਮਹਾਰਾਸ਼ਟਰ ਸਰਕਾਰ ਵਿਚਾਲੇ ਦੀ ਟੱਕਰ ਬਣਦੀ ਜਾ ਰਹੀ ਹੈ। ਇਸ ਆਹਮੋ-ਸਾਹਮਣੇ ਦੀ ਟੱਕਰ 'ਚ ਬੁੱਧਵਾਰ ਨੂੰ ਕਈ ਕਿਸਮ ਦੀਆਂ ਬਿਆਨਬਾਜ਼ੀਆਂ ਅਤੇ ਇੱਕ ਨਿਰਮਾਣ 'ਤੇ ਬੁਲਡੋਜ਼ਰ ਚਲਾਉਣ ਦੀ ਕਾਰਵਾਈ ਵੇਖਣ ਨੂੰ ਮਿਲੀ। ਅੱਜ ਐਕਟਰਸ ਕੰਗਨਾ ਰਨੌਤ ਦੇ ਦਫਤਰ 'ਤੇ ਬੀ.ਐਮ.ਸੀ. ਦਾ ਬੁਲਡੋਜ਼ਰ ਚੱਲ ਗਿਆ।

ਕੰਗਨਾ ਦੇ ਦਫਤਰ 'ਤੇ ਬੀ.ਐਮ.ਸੀ. ਨੇ ਗੈਰ-ਕਾਨੂੰਨੀ ਨਿਰਮਾਣ ਦਾ ਨਵਾਂ ਨੋਟਿਸ ਚਿਪਕਾ ਉਸ ਨੂੰ ਢਾਹੁਣਾ ਸ਼ੁਰੂ ਕਰ ਦਿੱਤਾ। ਦੱਸ ਦਈਏ ਕਿ ਇਹ ਨੋਟਿਸ ਅੱਜ ਸਵੇਰੇ ਹੀ ਲਾਇਆ ਗਿਆ ਸੀ। ਕਾਰਵਾਈ ਦੌਰਾਨ ਮੁੰਬਈ ਪੁਲਿਸ ਤੇ ਬੀ.ਐਮ.ਸੀ. ਦੀ ਇੱਕ ਟੀਮ ਵੀ ਮੌਕੇ 'ਤੇ ਮੌਜੂਦ ਰਹੀ। ਇਸ ਪੂਰੇ ਮਸਲੇ 'ਤੇ ਕੰਗਨਾ ਨੇ ਅਯੁੱਧਿਆ, ਰਾਮ ਮੰਦਿਰ ਅਤੇ ਬਾਬਰ ਜਿਹੇ ਸ਼ਬਦਾਂ ਦੀ ਵਰਤੋਂ ਕਰਦਿਆਂ ਇੱਕ ਟਵੀਟ ਕਰ ਦਿੱਤਾ।

ਉਨ੍ਹਾਂ ਲਿਖਿਆ, "ਮਨੀਕਰਣਿਕਾ ਫਿਲਮਜ਼ 'ਚ ਪਹਿਲੀ ਫਿਲਮ ਅਯੁੱਧਿਆ ਦਾ ਐਲਾਨ ਹੋਇਆ, ਇਹ ਮੇਰੇ ਲਈ ਇਮਾਰਤ ਨਹੀਂ ਰਾਮ ਮੰਦਰ ਹੈ, ਅੱਜ ਬਾਬਰ ਉਥੇ ਆਇਆ ਹੈ, ਅੱਜ ਇਤਿਹਾਸ ਆਪਣੇ ਆਪ ਨੂੰ ਦੁਹਰਾਵੇਗਾ, ਰਾਮ ਮੰਦਰ ਫਿਰ ਟੁੱਟੇਗਾ, ਪਰ ਬਾਬਰ ਯਾਦ ਰੱਖੇ ਕਿ ਇਹ ਮੰਦਰ ਮੁੜ ਬਣੇਗਾ, ਜੈ ਸ਼੍ਰੀ ਰਾਮ, ਜੈ ਸ਼੍ਰੀ ਰਾਮ, ਜੈ ਸ਼੍ਰੀ ਰਾਮ।"

ਗ੍ਰਹਿ ਮੰਤਰੀ ਨੇ ਕਿਹਾ, ਡਰੱਗਸ ਮਾਮਲੇ 'ਚ ਹੋਵੇਗੀ ਜਾਂਚ

ਦੂਜੇ ਪਾਸੇ ਮਹਾਰਾਸ਼ਟਰ ਦੇ ਗ੍ਰਹਿ ਮੰਤਰੀ, ਅਨਿਲ ਦੇਸ਼ਮੁਖ ਨੇ ਅੱਜ ਇੱਕ ਬਿਆਨ 'ਚ ਕਿਹਾ ਹੈ ਕਿ ਅਦਾਕਾਰ ਅਧਿਅਨ ਸੁਮਨ ਵੱਲੋਂ ਕੰਗਨਾ ਖਿਲਾਫ਼ ਲਗਾਏ ਗਏ ਡਰੱਗਸ ਸੰਬੰਧੀ ਇਲਜ਼ਾਮਾਂ 'ਤੇ ਮੁੰਬਈ ਪੁਲਿਸ ਵੱਲੋਂ ਜਾਂਚ ਕੀਤੀ ਜਾਵੇਗੀ।

ਮੁੰਬਈ ਪਹੁੰਚ ਕੇ ਉੱਧਵ ਠਾਕਰੇ ਤੇ ਕਰਨ ਜੌਹਰ ਨੂੰ ਲਲਕਾਰਿਆ

ਯਾਦ ਰਹੇ, ਜਦ ਕੰਗਨਾ ਲਈ ਗੈਰਕਨੂੰਨੀ ਉਸਾਰੀ ਸੰਬੰਧੀ ਨੋਟਿਸ ਜਾਰੀ ਕੀਤਾ ਗਿਆ ਸੀ, ਤਾਂ ਉਸ ਵੇਲੇ ਉਹ ਮਨਾਲੀ ਵਿੱਚ ਸੀ। ਪਰ ਅੱਜ ਸ਼ਾਮ ਕੰਗਨਾ ਵੀ ਮੁੰਬਈ ਪਹੁੰਚ ਗਈ ਹੈ, ਅਤੇ ਉਨ੍ਹਾਂ ਇੱਕ ਵੀਡੀਓ ਸੰਦੇਸ਼ ਜਾਰੀ ਕਰਦੇ ਹੋਏ, ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਉੱਧਵ ਠਾਕਰੇ ਸਮੇਤ ਕਈ ਲੋਕਾਂ ਨੂੰ ਲਲਕਾਰਿਆ ਹੈ, ਅਤੇ ਸਭ ਦੇ ਅਸਲੀ ਚੇਹਰੇ ਸਾਹਮਣੇ ਲਿਆਉਣ ਦੀ ਗੱਲ ਆਖੀ ਹੈ। ਉਨ੍ਹਾਂ ਉੱਧਵ ਠਾਕਰੇ ਅਤੇ ਕਰਨ ਜੌਹਰ ਨੂੰ ਕਿਹਾ ਕਿ, ਪਹਿਲਾਂ ਤੁਸੀਂ ਮੇਰੇ ਕੰਮ ਦੀ ਜਗ੍ਹਾ ਤੋੜੀ ਹੈ, ਹੁਣ ਮੇਰਾ ਘਰ ਤੇ ਮੇਰਾ ਚਿਹਰਾ ਵੀ ਤੋੜੋ, ਤਾਂ ਜੋ ਦੁਨੀਆ ਵੇਖ ਸਕੇ ਕਿ, ਤੁਹਾਡਾ ਅਸਲੀ ਚਿਹਰਾ ਕੀ ਹੈ। ਉਨ੍ਹਾਂ ਕਿਹਾ, ਚਾਹੇ ਮੇਰੀ ਜਾਨ ਕਿਉਂ ਨਾ ਚਲੀ ਜਾਵੇ, ਪਰ ਤੁਹਾਡਾ ਅਸਲੀ ਚਿਹਰਾ ਦੁਨੀਆ ਸਾਹਮਣੇ ਲਿਆ ਕੇ ਛੱਡਾਂਗੀ।