ਲੋਕ ਸਭਾ ਵਿੱਚ ਚਰਨਜੀਤ ਚੰਨੀ ਤੇ ਰਵਨੀਤ ਬਿੱਟੂ ਕਿਉਂ ਹੋਏ ਆਹਮੋ-ਸਾਹਮਣੇ

ਪੰਜਾਬ ਤੋਂ ਕਾਂਗਰਸ ਦੇ ਸੰਸਦ ਮੈਂਬਰ ਚਰਨਜੀਤ ਚੰਨੀ ਅਤੇ ਭਾਜਪਾ ਦੇ ਮੰਤਰੀ ਰਵਨੀਤ ਸਿੰਘ ਬਿੱਟੂ ਵਿਚਕਾਰ ਅੱਜ ਲੋਕ ਸਭਾ ਵਿਚ ਬਜਟ ‘ਤੇ ਚਰਚਾ ਦੌਰਾਨ ਤਿੱਖੀ ਬਹਿਸਬਾਜ਼ੀ ਦੇਖਣ ਨੂੰ ਮਿਲੀ।

ਚੰਨੀ -ਅੰਮ੍ਰਿਤਪਾਲ ਸਿੰਘ ਦਾ ਬਿਨਾਂ ਨਾਮ ਲਏ ਉਨ੍ਹਾਂ ’ਤੇ ਲੱਗੇ ਐੱਨਐੱਸਏ ਦਾ ਮੁੱਦਾ ਉਠਾ ਰਹੇ ਸਨ, ਉਨ੍ਹਾਂ ਦਾ ਕਹਿਣਾ ਸੀ ਕਿ 2 ਲੱਖ ਲੋਕਾਂ ਵਲੋਂ ਚੁਣੇ ਗਏ ਸਾਂਸਦ ਨੂੰ ਐੱਨਐੱਸਏ ਲਗਾ ਕੇ ਜੇਲ੍ਹ ਵਿਚ ਰੱਖਿਆ ਗਿਆ ਹੈ, ਜੋ ਦੇਸ਼ ਵਿਚ ਅਣਐਲਾਨੀ ਐਮਰਜੈਂਸੀ ਹੈ।

ਇਸ ਦੌਰਾਨ ਉਨ੍ਹਾਂ ਰਵਨੀਤ ਬਿੱਟੂ ਨੂੰ ਕਿਹਾ ਕਿ ਤੁਹਾਡੇ ਦਾਦਾ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਸ਼ਹੀਦ ਹੋਏ ਸਨ ਪਰ ਉਹ ਉਸ ਦਿਨ ਮਰੇ ਜਿਸ ਦਿਨ ਤੁਸੀਂ ਕਾਂਗਰਸ ਛੱਡੀ।

ਇਸ ’ਤੇ ਰਵਨੀਤ ਬਿੱਟੂ ਭੜਕ ਗਏ ਤੇ ਸਦਨ ’ਚ ਖੜ੍ਹੇ ਹੋ ਕੇ ਕਿਹਾ, ’ਮੇਰੇ ਦਾਦਾ ਕਾਂਗਰਸ ਲਈ ਨਹੀਂ ਦੇਸ਼ ਲਈ ਸ਼ਹੀਦ ਹੋਏ ਸਨ।’

ਬਿੱਟੂ ਨੇ ਚੰਨੀ ਵਲੋਂ ਐੱਨਐੱਸਏ ਦੇ ਉਠਾਏ ਮੁੱਦੇ ’ਤੇ ਕਿਹਾ ਕਿ ਇਹ ਕਿਸਾਨਾਂ ’ਤੇ ਨਹੀਂ, ਉਨ੍ਹਾਂ ’ਤੇ ਲੱਗਾ ਹੈ ਜੋ ਦੇਸ਼ ਤੇ ਪੰਜਾਬ ਨੂੰ ਵੰਡਣਾ ਚਾਹੁੰਦੇ ਹਨ।