13.99C Vancouver 13.99C VancouverJul 12, 2024 5:54 PM - The Canadian Press
ਕੈਨੇਡਾ ਸਰਕਾਰ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਤੂਫਾਨ ਬੇਰੀਲ ਦੇ ਬਚੇ-ਖੁਚੇ ਪ੍ਰਭਾਵ ਦੇ ਚੱਲਦੇ ਹੋਈ ਬਾਰਸ਼ ਨਾਲ ਮੈਰੀਟਾਈਮਜ਼ ਸੂਬਿਆਂ ਵਿਚ ਜਿੱਥੇ ਹੜ੍ਹ ਦੀ ਸਥਿਤੀ ਪੈਦਾ ਹੋਈ, ਉਥੇ ਹੀ ਇਸ ਨਾਲ ਪੂਰਬੀ ਕੈਨੇਡਾ ਵਿਚ ਜੰਗਲੀ ਅੱਗ ਦੇ ਖ਼ਤਰੇ ਵਿਚ ਵੀ ਕਮੀ ਦੇ ਆਸਾਰ ਹਨ।
ਮੈਰੀਟਾਈਮਜ਼ ਸੂਬਿਆਂ ਵਿਚ ਪੂਰਬੀ ਕੈਨੇਡਾ ਦੇ ਤਿੰਨ ਸੂਬੇ ਨਿਊ ਬਰੰਜ਼ਵਿਕ, ਨੋਵਾ ਸਕੋਸ਼ੀਆ ਅਤੇ ਪ੍ਰਿੰਸ ਐਡਵਰਡ ਆਈਲੈਂਡ ਆਉਂਦੇ ਹਨ। ਫੈਡਰਲ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਹੁਣ ਤੱਕ ਇਸ ਵਾਰ ਦਾ ਜੰਗਲੀ ਅੱਗ ਦਾ ਸੀਜ਼ਨ 2023 ਦੇ ਰਿਕਾਰਡ ਵਾਲੇ ਸਾਲ ਦੀ ਤੁਲਨਾ ਵਿਚ ਘੱਟ ਗੰਭੀਰ ਹੈ ਪਰ ਬੀ.ਸੀ., ਅਲਬਰਟਾ, ਯੂਕੋਨ ਅਤੇ ਉੱਤਰੀ ਪੱਛਮੀ ਪ੍ਰਦੇਸ਼ਾਂ ਲਈ ਖ਼ਤਰਾ ਜ਼ਿਆਦਾ ਹੈ।
ਉਨ੍ਹਾਂ ਦੱਸਿਆ ਕਿ ਬਲ ਰਹੀਆਂ ਅੱਗਾਂ ਦੀ ਗਿਣਤੀ ਵੱਧ ਰਹੀ ਹੈ ਅਤੇ ਕੈਨੇਡਾ ਵਿਚ ਮੌਜੂਦਾ ਸਮੇਂ 284 ਜੰਗਲੀ ਅੱਗਾਂ ਸਰਗਰਮ ਹਨ,ਜਿਨ੍ਹਾਂ ਵਿਚੋਂ 135 ਕਾਬੂ ਤੋਂ ਬਾਹਰ ਹਨ। ਅਧਿਕਾਰੀਆਂ ਮੁਤਾਬਕ, ਜੁਲਾਈ ਵਿਚ 1.3 ਮਿਲੀਅਨ ਹੈਕਟੇਅਰ ਖੇਤਰ ਸੜਿਆ ਹੈ, ਜੋ 10 ਸਾਲਾਂ ਦੇ ਇਸੇ ਸਮੇਂ ਦੇ 10 ਸਾਲਾਂ ਦੀ ਔਸਤ ਦੇ ਕਰੀਬ ਹੈ।
ਹਾਲਾਂਕਿ, ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕਿਸੇ ਵੀ ਸੂਬੇ ਨੇ ਇਸ ਸੀਜ਼ਨ ਵਿਚ ਹੁਣ ਤੱਕ ਸੈਂਟਰ ਤੋਂ ਮਦਦ ਦੀ ਮੰਗ ਨਹੀਂ ਕੀਤੀ ਹੈ ਅਤੇ ਨਾ ਹੀ ਕੈਨੇਡਾ ਨੂੰ ਹੁਣ ਤੱਕ ਅੱਗ ਨਾਲ ਨਜਿੱਠਣ ਲਈ ਦੂਜੇ ਦੇਸ਼ਾਂ ਤੋਂ ਮਦਦ ਮੰਗਣੀ ਪਈ ਹੈ।
