ਬ੍ਰਿਟਿਸ਼ ਕੋਲੰਬੀਆ ਦੇ ਫੋਰਟ ਨੈਲਸਨ ਵਿਚ ਲੱਗੀ ਜੰਗਲੀ ਅੱਗ ਨੂੰ ਕੀਤਾ ਗਿਆ ਕੰਟਰੋਲ

ਬ੍ਰਿਟਿਸ਼ ਕੋਲੰਬੀਆ ਦੇ ਫੋਰਟ ਨੈਲਸਨ ਵਿਚ ਲੱਗੀ ਜੰਗਲੀ ਅੱਗ ਨੂੰ ਕੰਟਰੋਲ ਕਰ ਲਿਆ ਗਿਆ ਹੈ, ਜਿਸ ਕਾਰਨ 4700 ਲੋਕਾਂ ਨੂੰ ਘਰ ਖਾਲੀ ਕਰਕੇ ਜਾਣਾ ਪਿਆ ਸੀ। ਬੀ.ਸੀ ਵਾਈਲਡ ਫਾਇਰ ਸਰਵਿਸ ਮੁਤਾਬਕ ਨੌਰਥਈਸਟਰਨ ਬੀ. ਸੀ. ਵਿਚ 123-ਵਰਗ ਕਿਲੋਮੀਟਰ ਇਲਾਕੇ ਵਿਚ ਲੱਗੀ ਅੱਗ ਦੇ ਮੁੜ ਭੜਕਣ ਦੀ ਆਸ ਨਹੀਂ ਹੈ। ਅੱਗ ਨਾਲ ਸਬੰਧਤ ਨਿਕਾਸੀ ਅਲਰਟ ਹਟਾ ਦਿੱਤੇ ਗਏ ਹਨ।

ਗੌਰਤਲਬ ਹੈ ਕਿ ਫੋਰਟ ਨੈਲਸਨ ਤੋਂ ਥੋੜ੍ਹੀ ਦੇਰ ਦੂਰ ਪਾਰਕਰ ਝੀਲ ਵਿਚ 10 ਮਈ ਨੂੰ ਭਿਆਨਕ ਅੱਗ ਲੱਗੀ ਸੀ, ਜਿਸ ਕਾਰਨ ਜ਼ਿਆਦਾਤਰ ਲੋਕਾਂ ਨੂੰ ਇੱਥੋਂ ਕਿਤੇ ਹੋਰ ਜਾਣ ਲਈ ਕਿਹਾ ਗਿਆ ਸੀ। ਇਸ ਅੱਗ ਕਾਰਨ ਚਾਰ ਘਰ ਸੜ ਗਏ ਅਤੇ ਕਈ ਪ੍ਰੋਪਰਟੀਜ਼ ਨੂੰ ਨੁਕਸਾਨ ਪੁੱਜਾ ਸੀ।

ਮੀਂਹ ਅਤੇ ਠੰਡੇ ਤਾਪਮਾਨ ਕਾਰਨ ਫਾਇਰ ਫਾਈਟਰਜ਼ ਨੇ ਅੱਗ ਨੂੰ ਕਾਬੂ ਕਰ ਲਿਆ ਹੈ ਪਰ ਇਹ ਅਜੇ ਵੀ ਜ਼ਮੀਨ ਵਿਚ ਸੁਲਗ ਰਹੀ ਹੈ। ਔਫੀਸਰਜ਼ ਨੇ ਕਿਹਾ ਕਿ ਲੋਕਾਂ ਨੂੰ ਅਜੇ ਵੀ ਇੱਥੋਂ ਨਿਕਲਣ ਵਾਲੇ ਧੂੰਏਂ ਕਾਰਨ ਪਰੇਸ਼ਾਨੀ ਹੋ ਸਕਦੀ ਹੈ।