ਨਿਤਿਨ ਗਡਕਰੀ ਦੇ ਸੜਕ ਸੁਰੱਖਿਆ ਇਸ਼ਤਿਹਾਰ 'ਚ ‘ਦਾਜ ਨੂੰ ਪ੍ਰਮੋਟ’ ਕਰਦੇ ਦਿਸੇ ਅਕਸ਼ੈ ਕੁਮਾਰ

ਕੇਂਦਰੀ ਸੜਕੀ ਆਵਾਜਾਈ ਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਹਾਲ ਹੀ ਵਿਚ ਆਪਣੇ ਟਵਿੱਟਰ ਹੈਂਡਲ 'ਤੇ ਸੜਕ ਸੁਰੱਖਿਆ ਮੁਹਿੰਮ ਬਾਰੇ ਇੱਕ ਵੀਡੀਓ ਸ਼ੇਅਰ ਕੀਤੀ ਸੀ, ਜਿਸ ਵਿਚ ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਨਜ਼ਰ ਆ ਰਹੇ ਹਨ।

ਵੀਡੀਓ ਵਿਚ ਇੱਕ ਵਿਆਹ ਦਾ ਦ੍ਰਿਸ਼ ਦਿਖਾਇਆ ਗਿਆ ਹੈ, ਜਿੱਥੇ ਲਾੜੀ ਆਪਣੇ ਪਰਿਵਾਰ ਨੂੰ ਅਲਵਿਦਾ ਕਹਿ ਰਹੀ ਹੈ।

ਵੀਡੀਓ ਵਿਚ ਅਕਸ਼ੈ ਕੁਮਾਰ ਪੁਲਿਸ ਵਾਲੇ ਬਣੇ ਹਨ, ਜੋ ਲਾੜੀ ਦੇ ਪਿਤਾ ਨੂੰ ਨਵ-ਵਿਆਹੇ ਜੋੜੇ ਨੂੰ ਦਿੱਤੀ ਇੱਕ ਕਾਰ ਨੂੰ ਲੈ ਕੇ ਇਹ ਤਾਅਨਾ ਮਾਰਦੇ ਦੇਖੇ ਜਾ ਸਕਦੇ ਹਨ ਕਿ ਇਸ ਵਿਚ ਸਿਰਫ ਦੋ ਏਅਰਬੈਗ ਹਨ। ਉਹ ਲਾੜੀ ਦੇ ਪਿਤਾ ਨੂੰ ਛੇ ਏਅਰਬੈਗ ਵਾਲੀ ਕਾਰ ਵਿਚ ਵਿਦਾ ਕਰਨ ਦੀ ਸਲਾਹ ਦਿੰਦੇ ਹਨ।

ਇੰਟਰਨੈੱਟ 'ਤੇ ਲੋਕਾਂ ਨੂੰ ਇਹ ਵੀਡੀਓ ਰਾਸ ਨਹੀਂ ਆਈ ਅਤੇ ਇਹ ਵਿਵਾਦਾਂ ਵਿਚ ਆ ਗਈ।

ਹਾਲਾਂਕਿ, ਵੀਡੀਓ ਦੇ ਪਿੱਛੇ ਦਾ ਮਕਸਦ ਕਾਰਾਂ ਵਿਚ ਛੇ ਏਅਰਬੈਗ ਨਾਲ ਸੁਰੱਖਿਆ ਨੂੰ ਉਤਸ਼ਾਹਿਤ ਕਰਨਾ ਸੀ ਪਰ ਇਸ ਦੇ ਨਾਲ 'ਦਾਜ ਦੀ ਪ੍ਰਥਾ ਨੂੰ ਉਤਸ਼ਾਹਿਤ ਕਰਨ' ਲਈ ਇਸ ਨੂੰ ਸਖ਼ਤ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ ਹੈ। ਸ਼ਿਵ ਸੈਨਾ ਦੀ ਆਗੂ ਪ੍ਰਿਅੰਕਾ ਚਤੁਰਵੇਦੀ ਨੇ ਹੈਰਾਨੀ ਜਤਾਈ ਕਿ ਅਜਿਹੇ ਕੰਮ ਨੂੰ ਕੌਣ ਪਾਸ ਕਰਦਾ ਹੈ, ਜੋ 'ਦਾਜ ਦੀ ਬੁਰਾਈ ਨੂੰ ਉਤਸ਼ਾਹਿਤ ਕਰਦੇ ਹਨ'। ਇੱਕ ਯੂਜ਼ਰ ਨੇ ਸੜਕ ਸੁਰੱਖਿਆ ਬਾਰੇ ਜਾਗਰੂਕਤਾ ਫੈਲਾਉਣ ਦੇ ਨਾਮ 'ਤੇ ਦਾਜ ਦੇ ਪ੍ਰਚਾਰ ਲਈ ਕੇਂਦਰ ਸਰਕਾਰ ਨੂੰ ਲੰਮੇ ਹੱਥੀਂ ਲਿਆ।