ਆਸਕਰ 2025 ‘ਅਨੋਰਾ’ ਫ਼ਿਲਮ ਦਾ ਬੋਲਬਾਲਾ ਰਿਹਾ

ਅਮਰੀਕਾ ਦੇ ਲਾਸ ਏਂਜਲਸ ’ਚ ਐਤਵਾਰ ਰਾਤ ਨੂੰ ‘ਡਾਲਬੀ ਥਿਏਟਰ’ ’ਚ 97ਵਾਂ ਪੁਰਸਕਾਰ ਸਮਾਰੋਹ ਆਯੋਜਿਤ ਕੀਤਾ ਗਿਆ। ਇਸ ਸਾਲ ਸੀਨ ਬੇਕਰ ਵੱਲੋਂ ਬਣਾਈ ਗਈ ਇਕ ਸੈਕਸ ਵਰਕਰ ਦੇ ਜੀਵਨ ’ਤੇ ਆਧਾਰਿਤ ‘ਰੋਮਾਂਟਿਕ ਕਾਮੇਡੀ’ ਫਿਲਮ ‘ਅਨੋਰਾ’ ਨੇ ਕੁੱਲ 5 ਆਸਕਰ ਪੁਰਸਕਾਰ ਜਿੱਤੇ। ਇਸ ਫਿਲਮ ਨੂੰ ਸਰਵੋਤਮ ਫਿਲਮ ਚੁਣਿਆ ਗਿਆ।

ਮਿੱਕੀ ਮੈਡੀਸਨ ਨੇ ‘ਅਨੋਰਾ’ ’ਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਲਈ ਸਰਵੋਤਮ ਅਦਾਕਾਰਾ ਦਾ ਪੁਰਸਕਾਰ ਜਿੱਤਿਆ। ਸੀਨ ਬੇਕਰ ਨੇ ਸਰਵੋਤਮ ਨਿਰਦੇਸ਼ਕ, ਸਰਵੋਤਮ ਮੂਲ ਸਕ੍ਰੀਨਪਲੇਅ ਤੇ ਸਰਵੋਤਮ ਸੰਪਾਦਨ ਲਈ ਵੀ ਪੁਰਸਕਾਰ ਜਿੱਤੇ।

ਕਾਨ ਫਿਲਮ ਫੈਸਟੀਵਲ ’ਚ ਵੀ ਪਾਲਮ ਡੀ’ਓਰ ਪੁਰਸਕਾਰ ਜਿੱਤ ਚੁੱਕੀ ‘ਅਨੋਰਾ’ ਅਜਿਹੀ ਸੈਕਸ ਵਰਕਰ ਦੀ ਕਹਾਣੀ ਨੂੰ ਬਿਆਨ ਕਰਦੀ ਹੈ, ਜਿਸ ਦਾ ਵਿਆਹ ਇਕ ਰੂਸੀ ਵਿਅਕਤੀ ਨਾਲ ਹੋ ਜਾਂਦਾ ਹੈ। ਇਸ ਫਿਲਮ ਨੂੰ ਸਿਰਫ਼ 60 ਲੱਖ ਡਾਲਰ ਦੀ ਲਾਗਤ ਨਾਲ ਬਣਾਇਆ ਗਿਆ ਹੈ।