ਦਿੱਲੀ ਦੇ ਲਾਲ ਕਿਲ੍ਹੇ ਮੈਦਾਨ 'ਤੇ ਰਾਮਲੀਲਾ 'ਚ ਨਜ਼ਰ ਆਉਣਗੇ ਬਾਲੀਵੁੱਡ ਅਦਾਕਾਰ ਤੇ ਮੰਤਰੀ

ਦਿੱਲੀ ਵਿਚ 10 ਦਿਨਾਂ ਤੱਕ ਚੱਲਣ ਵਾਲੀ ਰਾਮਲੀਲਾ ਵਿਚ ਕੈਬਨਿਟ ਮੰਤਰੀ ਅਤੇ ਟੀ. ਵੀ. ਅਦਾਕਾਰ ਵੱਖ-ਵੱਖ ਭੂਮਿਕਾਵਾਂ ਨਿਭਾਉਂਦੇ ਨਜ਼ਰ ਆਉਣਗੇ। ਪ੍ਰਬੰਧਕਾਂ ਨੇ ਦਾਅਵਾ ਕੀਤਾ ਕਿ ਇਹ ਹੁਣ ਤੱਕ ਦੀ ਸਭ ਤੋਂ ਵੱਡੀ ਰਾਮਲੀਲਾ ਹੋਵੇਗੀ।

ਰਾਮਲੀਲਾ 26 ਸਤੰਬਰ ਤੋਂ ਲਾਲ ਕਿਲਾ ਮੈਦਾਨ 'ਤੇ ਸ਼ੁਰੂ ਹੋਵੇਗੀ। ਇਹ ਅਗਲੇ ਮਹੀਨੇ ਦੁਸਹਿਰੇ 'ਤੇ ਸਮਾਪਤ ਹੋਵੇਗੀ।

ਲਵ-ਕੁਛ ਰਾਮਲੀਲਾ ਵਿਚ ਬਾਹੁਬਲੀ ਫਿਲਮ ਵਿਚ ਆਪਣੀ ਅਦਾਕਾਰੀ ਨਾਲ ਚਰਚਿਤ ਪ੍ਰਭਾਸ ਦੁਸਹਿਰੇ 'ਤੇ ਰਾਵਣ ਦਾ ਪੁਤਲਾ ਦਹਿਨ ਕਰਦੇ ਨਜ਼ਰ ਆਉਣਗੇ। ਲਵ ਕੁਸ਼ ਰਾਮਲੀਲਾ ਕਮੇਟੀ ਦੇ ਪ੍ਰਧਾਨ ਅਰਜੁਨ ਕੁਮਾਰ ਨੇ ਦੱਸਿਆ ਕਿ ਕਮੇਟੀ ਰਾਮਲੀਲਾ ਵਾਲੀ ਥਾਂ 'ਤੇ 'ਕਰਤਵਿਆ ਪਥ' ਦਾ ਇੱਕ ਮਾਡਲ ਤਿਆਰ ਕਰੇਗੀ। ਇਸ 'ਤੇ ਹਰੇ ਰੰਗ ਦਾ ਕਾਰਪੇਟ ਵਿਛਾਇਆ ਜਾਵੇਗਾ, ਜਿਸ 'ਤੇ ਫੁੱਲਦਾਨ ਰੱਖੇ ਜਾਣਗੇ। ਭਾਰਤ ਦੀ ਆਜ਼ਾਦੀ ਦੀ 75ਵੀਂ ਵਰ੍ਹੇਗੰਢ ਮੌਕੇ ਮੈਦਾਨ ਨੂੰ 75 ਝੰਡਿਆਂ ਨਾਲ ਵੀ ਸਜਾਇਆ ਜਾਵੇਗਾ।

ਕੁਮਾਰ ਨੇ ਕਿਹਾ ਕਿ ਕਮੇਟੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਨੂੰ ਦੁਸਹਿਰੇ ਲਈ ਸੱਦਾ ਦਿੱਤਾ ਹੈ। ਹਾਲਾਂਕਿ, ਉਨ੍ਹਾਂ ਵੱਲੋਂ ਪੁਸ਼ਟੀ ਹੋਣ ਦੀ ਉਡੀਕ ਹੈ।

ਦਿੱਗਜ ਅਦਾਕਾਰ ਅਸਰਾਨੀ ਨਾਰਦ ਦੀ ਭੂਮਿਕਾ ਨਿਭਾਉਣਗੇ, ਜਦੋਂ ਕਿ ਟੀ. ਵੀ. ਅਦਾਕਾਰ ਨਿਰਭੈ ਵਾਧਵਾ ਹਨੂੰਮਾਨ ਦੀ ਭੂਮਿਕਾ ਵਿਚ ਨਜ਼ਰ ਆਉਣ ਵਾਲੇ ਹਨ, ਜੋ 'ਸੰਕਟਮੋਚਨ ਮਹਾਬਲੀ ਹਨੂੰਮਾਨ' ਵਿਚ ਇਹ ਰੋਲ ਕਰ ਚੁੱਕੇ ਹਨ। ਬਾਲੀਵੁੱਡ ਅਤੇ ਟੀ. ਵੀ. ਵਿਚ ਵੱਖ-ਵੱਖ ਭੂਮਿਕਾਵਾਂ ਨਾਲ ਪਛਾਣ ਬਣਾਉਣ ਵਾਲੇ ਅਖਿਲੇਂਦਰ ਮਿਸ਼ਰਾ ਰਾਵਣ ਦੀ ਭੂਮਿਕਾ ਵਿਚ ਹੋਣਗੇ।