ਦਿਲਜੀਤ ਦੋਸਾਂਝ ਦਾ ਯੂਰਪ ਟੂਰ ਅੱਧ ਵਿਚਾਲੇ ਛੱਡ ਗਈ ਡਾਂਸਰ

ਪੈਸਿਆਂ ਦੇ ਲੈਣ-ਦੇਣ ਦੇ ਵਿਵਾਦ ਕਾਰਨ ਇਕ ਡਾਂਸਰ ਨੇ ਦਿਲਜੀਤ ਦੋਸਾਂਝ ਦੇ ਯੂਰਪ ਟੂਰ ਨੂੰ ਅਧਵਾਟੇ ਛੱਡ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਇਨੀਂ ਦਿਨੀਂ ਦਿਲਜੀਤ ਦੋਸਾਂਝ ਦਾ ਦਿਲ ਲੁਮਿਨਾਟੀ ਟੂਰ ਚੱਲ ਰਿਹਾ ਹੈ। ਜਿਸ ’ਚ ਸ਼ਿਲਪਾ ਸਾਜਨ ਨਾਂ ਦੀ ਇਕ ਡਾਂਸਰ ਵੀ ਭਾਗ ਲੈ ਰਹੀ ਸੀ।

ਇਸ ਡਾਂਸਰ ਨੇ ਪੈਸਿਆਂ ਦੀ ਅਦਾਇਗੀ ਨਾ ਕੀਤੇ ਜਾਣ ਕਾਰਨ ਅਤੇ ਗੈਰ ਪੈਸ਼ੇਵਰ ਪ੍ਰਬੰਧਾਂ ਨੂੰ ਲੈ ਕੇ ਕਈ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਇਸ ਤੋਂ ਪਹਿਲਾਂ ਉੱਤਰੀ ਅਮਰੀਕਾ ਦੇ ਦੌਰੇ ਦੌਰਾਨ ਵੀ ਪੈਸਿਆਂ ਦੇ ਅਦਾਇਗੀ ਦੇ ਮਾਮਲੇ ’ਚ ਵਿਵਾਦ ਖੜਾ ਹੋਇਆ ਸੀ ਅਤੇ ਦਿਲਜੀਤ ਦੋਸਾਂਝ ਦੇ ਪ੍ਰਬੰਧਾਂ ਨੂੰ ਲੈ ਕੇ ਕਈ ਦੋਸ਼ ਉਠਾਏ ਗਏ ਸਨ।

ਇੰਸਟਾਗ੍ਰਾਮ ’ਤੇ ਪਾਈ ਇਕ ਪੋਸਟ ’ਚ ਸ਼ਿਲਪਾ ਸਾਜਨ ਨੇ ਵੱਡੀ ਨਿਰਾਸ਼ਾ ਜ਼ਾਹਰ ਕਰਿਦਆਂ ਕਿਹਾ ਕਿ ਮੈਂ ਇਸ ਟੂਰ ਨੂੰ ਲੈ ਕੇ ਬੜੀ ਉਤਸ਼ਾਹਿਤ ਹਾਂ ਪਰ ਡਾਂਸ ਇੰਡਸਟਰੀ ਨੇ ਇਕ ਵਾਰ ਫਿਰ ਆਪਣਾ ਅਸਲੀ ਰੰਗ ਦਿਖਾਇਆ ਹੈ। ਡਾਂਸਰਾਂ ਨਾਲ ਅਕਸਰ ਬੇਇਜ਼ਤੀ ਵਾਲਾ ਹਓਮੇ ਭਰਪੂਰ ਅਤੇ ਗੈਰ ਪੇਸ਼ੇਵਰ ਰਵੱਈਆ ਅਪਣਾਇਆ ਜਾਂਦਾ ਹੈ।

ਸ਼ਿਲਪਾ ਨੇ ਕਿਹਾ ਕਿ ਮੈਨੂੰ ਇਸ ਤਰ੍ਹਾਂ ਦਾ ਅਹਿਸਾਸ ਕਰਵਾਇਆ ਗਿਆ ਕਿ ਭਾਰਤੀ ਇਸ ਤਰ੍ਹਾਂ ਹੀ ਕੰਮ ਕਰਦੇ ਹਨ। ਇੰਡਸਟਰੀ ਦੇ ਉੱਘੇ ਲੋਕਾਂ ਨੂੰ ਤੁਹਾਡੇ ਸਵੈ ਮਾਨ ਦੀ ਕੋਈ ਕਦਰ ਨਹੀਂ ਹੈ। ਬਹੁਤ ਸਾਰੇ ਲੋਕਾਂ ਨੇ ਸਾਜਨ ਦੇ ਇਸ ਕਦਮ ਦੀ ਹਮਾਇਤ ਕੀਤੀ ਹੈ।

ਉਨ੍ਹਾਂ ਕਿਹਾ ਕਿ ਪ੍ਰਬੰਧਾਂ ਦੀ ਘਾਟ ਕਾਰਨ ਡਾਂਸਰਾਂ ਦਾ ਪ੍ਰਦਰਸ਼ਨ ਵੀ ਬੁਰੀ ਤਰ੍ਹਾਂ ਨਾਲ ਪ੍ਰਭਾਵ ਹੁੰਦਾ ਹੈ। ਦਿਲਜੀਤ ਹੁਣ ਭਾਰਤ ’ਚ ਆਪਣੇ ਦਿਲ ਲੁਮਿਨਾਟੀ ਟੂਰ ਦੀ ਤਿਆਰੀ ਕਰ ਰਿਹਾ ਹੈ ਜਿਹੜਾ 26 ਅਕਤੂਬਰ ਨੂੰ ਨਵੀਂ ਦਿੱਲੀ ’ਚ ਸ਼ੁਰੂ ਹੋਵੇਗਾ ਅਤੇ 29 ਦਸੰਬਰ ਨੂੰ ਗੁਹਾਟੀ ’ਚ ਸਮਾਪਤ ਹੋਵੇਗਾ।