ਦਿਲਜੀਤ ਲਈ ਟਰਾਫੀ ਨਹੀਂ ਸਗੋਂ ਐਮੀ ਐਵਾਰਡ ਸਮਾਗਮ ਵਿੱਚ ਸ਼ਮੂਲੀਅਤ ਹੀ ਬਣ ਗਈ ਵੱਡੀ ਗੱਲ

ਦਿਲਜੀਤ ਦੋਸਾਂਝ ਦੀ ਐਮੀ ਐਵਾਰਡ ਵਿੱਚ ਸ਼ਮੂਲੀਅਤ ਉਸ ਦੇ ਪ੍ਰਸ਼ੰਸਕਾਂ ਲਈ ਮਾਣ ਵਾਲੀ ਗੱਲ਼ ਬਣ ਗਈ, ਜਿਸ ਤਰ੍ਹਾਂ ਉਸ ਨੇ ਵੱਡੇ ਵਿਸ਼ਵਾਸ ਨਾਲ ਸਿਰ 'ਤੇ ਪੱਗੜੀ ਸਜਾ ਕੇ ਮੰਚ 'ਤੇ ਆਪਣੀ ਹਾਜ਼ਰੀ ਦਰਸਾਈ ਇਹ ਸੰਸਾਰ ਭਰ ਵਿੱਚ ਰਹਿਣ ਵਾਲੇ ਪੰਜਾਬੀ ਸੰਗੀਤ ਪ੍ਰੇਮੀਆਂ ਲਈ ਮਾਣ ਵਾਲੀ ਗੱਲ਼ ਬਣ ਗਈ। ਹਰ ਥਾਂ ਉਸ ਦੀ ਇਸ ਪੇਸ਼ਕਾਰੀ ਲਈ ਜਸ਼ਨ ਮਨਾਏ ਗਏ।

ਐਮੀ ਐਵਾਰਡ ਦੀ ਇਸ ਵੱਕਾਰੀ ਸਟੇਜ 'ਤੇ ਦਿਲਜੀਤ ਅਮਰ ਸਿੰਘ ਚਮਕੀਲਾ ਫਿਲਮ ਦੀ ਪੂਰੀ ਟੀਮ ਨਾਲ ਪਹੁੰਚਿਆ ਸੀ ਅਤੇ ਉਸ ਨੇ ਸਾਬਤ ਕਰ ਦਿੱਤਾ ਕਿ ਐਨੇ ਵੱਡੇ ਸਮਾਗਮ ਵਿੱਚ ਸ਼ਾਮਲ ਹੋਣਾ ਹੀ ਕਿਸੇ ਵੀ ਟਰਾਫੀ ਨਾਲੋਂ ਵੱਡੀ ਗੱਲ ਹੈ। 'ਅਮਰ ਸਿੰਘ ਚਮਕੀਲਾ' ਫਿਲਮ ਨੂੰ ਇਸ ਸਾਲ ਦੇ ਐਮੀ ਐਵਾਰਡ ਵਿੱਚ 2 ਨਾਮਜ਼ਦਗੀਆਂ ਲਈ ਚੁਣਿਆ ਗਿਆ ਸੀ।

ਪਹਿਲੀ ਦਿਲਜੀਤ ਲਈ ਵਧੀਆ ਅਦਾਕਾਰ ਦੀ ਅਤੇ ਦੂਜੀ ਵਧੀਆ ਫਿਲਮ ਦੀ ਭਾਵੇਂ ਇਹ ਦੋਵੇਂ ਖਿਤਾਬ ਹੋਰ ਲੋਕਾਂ ਨੇ ਜਿੱਤ ਲਏ ਪਰ ਦਿਲਜੀਤ ਨੇ ਨਾ ਸਿਰਫ ਭਾਰਤੀ ਸਿਨੇਮਾ ਲਈ ਸਗੋਂ ਪੰਜਾਬੀ ਸੱਭਿਆਚਾਰ ਲਈ ਵੀ ਮਾਣ ਮੱਤੇ ਪਲਾਂ ਦਾ ਅਹਿਸਾਸ ਕਰਵਾਇਆ। ਦਿਲਜੀਤ ਦਾ ਇਸ ਮੰਚ 'ਤੇ ਜਾਣਾ ਹੀ ਆਪਣੇ ਆਪ ਵਿੱਚ ਇਕ ਮੀਲ ਪੱਥਰ ਸੀ ਅਤੇ ਉਸ ਦੀ ਮੌਜੂਦਗੀ ਨਾਲ ਨਿਊਯਾਰਕ ਦੇ ਮੰਚ ਤੱਕ ਪੰਜਾਬ ਦੀ ਗੂੰਜ ਪਹੁੰਚ ਗਈ।