ਦਿਲਜੀਤ ਦੋਸਾਂਝ ਦੀ ਇਮੋਸ਼ਨਲ ਥ੍ਰਿਲਰ ਫਿਲਮ 'ਜੋਗੀ' ਦੀ ਰਿਲੀਜ਼ ਡੇਟ ਤੋਂ ਉੱਠਿਆ ਪਰਦਾ

ਦਿਲਜੀਤ ਦੋਸਾਂਝ ਅਤੇ ਮੁਹੰਮਦ ਜ਼ੀਸ਼ਾਨ ਅਯੂਬ ਦੀ ਅਗਲੀ ਇਮੋਸ਼ਨਲ ਥ੍ਰਿਲਰ ਫਿਲਮ 'ਜੋਗੀ' ਦੇ ਮੇਕਰਸ ਨੇ ਫਿਲਮ ਦੇ ਪਹਿਲੇ ਪੋਸਟਰ ਅਤੇ ਰਿਲੀਜ਼ ਡੇਟ ਦਾ ਖੁਲਾਸਾ ਕਰ ਦਿੱਤਾ ਹੈ।

'ਜੋਗੀ' 16 ਸਤੰਬਰ, 2022 ਤੋਂ ਓ. ਟੀ. ਟੀ. ਪਲੇਟਫਾਰਮ ਨੈੱਟਫਲਿਕਸ 'ਤੇ ਰਿਲੀਜ਼ ਹੋਵੇਗੀ। 'ਸੁਲਤਾਨ' ਦੇ ਨਿਰਦੇਸ਼ਕ ਅਲੀ ਅੱਬਾਸ ਜ਼ਫਰ ਵੱਲੋਂ ਨਿਰਦੇਸ਼ਤ ਇਸ ਫਿਲਮ ਵਿਚ ਕੁਮੁਦ ਮਿਸ਼ਰਾ, ਅਮਾਇਰਾ ਦਸਤੂਰ ਅਤੇ ਹਿਤੇਨ ਤੇਜਵਾਨੀ ਵੀ ਪ੍ਰਮੁੱਖ ਭੂਮਿਕਾਵਾਂ ਵਿਚ ਹਨ।

ਨੈੱਟਫਲਿਕਸ ਨੇ ਇੰਸਟਾਗ੍ਰਾਮ 'ਤੇ ਇਸ ਦਾ ਪੋਸਟਰ ਲਾਂਚ ਕੀਤਾ ਹੈ, ਜਿਸ ਦਾ ਉਸ ਨੇ ਕੈਪਸ਼ਨ ਲਿਖਿਆ, "ਹਿੰਮਤ ਦਾ ਨਾਮ ਜੋਗੀ। ਉਮੀਦ ਦਾ ਨਾਮ ਜੋਗੀ। ਬਹਾਦਰੀ, ਦੋਸਤੀ, ਓਮੀਦ ਤੇ ਹਰ ਚੀਜ਼ ਨਾਲ ਭਰਪੂਰ ਇਹ ਦਿਲਚਸਪ ਕਹਾਣੀ ਵੇਖੋ, 16 ਸਤੰਬਰ ਨੂੰ, ਸਿਰਫ ਨੈੱਟਫਲਿਕਸ 'ਤੇ। !" ਇਹ ਫਿਲਮ 1984 ਦੀ ਪਿੱਠਭੂਮੀ 'ਤੇ ਆਧਾਰਿਤ ਹੈ, ਜਿਸ ਵਿਚ ਮੁਸੀਬਤ ਦੇ ਸਮੇਂ ਸੱਚੀ ਦੋਸਤੀ ਅਤੇ ਹਿੰਮਤ ਦੀ ਕਹਾਣੀ ਦਿਖਾਈ ਗਈ ਹੈ।

ਫਿਲਮ ਵਿਚ ਆਪਣੀ ਭੂਮਿਕਾ ਬਾਰੇ ਗੱਲ ਕਰਦੇ ਹੋਏ ਦਿਲਜੀਤ ਨੇ ਕਿਹਾ, "ਜੋਗੀ ਦੀ ਭੂਮਿਕਾ ਨਿਭਾਉਣਾ ਸਭ ਤੋਂ ਵਧੀਆ ਅਨੁਭਵਾਂ ਵਿਚੋਂ ਇੱਕ ਰਿਹਾ ਅਤੇ ਮੈਂ ਨੈੱਟਫਲਿਕਸ 'ਤੇ ਆਪਣੇ ਡਿਜੀਟਲ ਡੈਬਿਊ ਨੂੰ ਲੈ ਕੇ ਉਤਸ਼ਾਹਤ ਹਾਂ।" 'ਟਾਈਗਰ ਜ਼ਿੰਦਾ ਹੈ' ਦੇ ਨਿਰਦੇਸ਼ਕ ਨੇ ਕਿਹਾ, "ਜੋਗੀ ਮੇਰੇ ਲਈ ਬਹੁਤ ਖਾਸ ਫਿਲਮ ਹੈ ਅਤੇ 'ਜੋਗੀ' ਦੀ ਭੂਮਿਕਾ ਨਿਭਾਉਣ ਲਈ ਦਿਲਜੀਤ ਤੋਂ ਬਿਹਤਰ ਕੌਣ ਹੈ!

ਇਸ ਵਿਚਕਾਰ ਦਿਲਜੀਤ ਆਪਣੀ ਆਉਣ ਵਾਲੀ ਪੰਜਾਬੀ ਫਿਲਮ 'ਬਾਬੇ ਭੰਗੜੇ ਪਾਉਂਦੇ ਨੇ' ਵਿਚ ਵੀ ਨਜ਼ਰ ਆਉਣਗੇ, ਜੋ ਕਿ 30 ਸਤੰਬਰ, 2022 ਨੂੰ ਰਿਲੀਜ਼ ਹੋਵੇਗੀ। ਇਸ ਫਿਲਮ ਵਿਚ ਉਨ੍ਹਾਂ ਨਾਲ ਅਦਾਕਾਰਾ ਸਰਗੁਣ ਮਹਿਤਾ ਨੇ ਕੰਮ ਕੀਤਾ ਹੈ। ਉੱਥੇ ਹੀ, ਅਲੀ ਵੀ ਅਦਾਕਾਰ ਸ਼ਾਹਿਦ ਕਪੂਰ ਨਾਲ ਆਪਣੀ ਅਗਲੀ ਐਕਸ਼ਨ ਥ੍ਰਿਲਰ ਫਿਲਮ 'ਬਲੱਡੀ ਡੈਡੀ' 'ਤੇ ਕੰਮ ਕਰ ਰਹੇ ਹਨ। ਇਹ ਫਿਲਮ ਫ੍ਰੈਂਚ ਫਿਲਮ 'ਨੂਟ ਬਲੈਂਚੇ' ਦਾ ਹਿੰਦੀ ਰੂਪਾਂਤਰ ਹੈ।