ਗੁਰੂ ਰੰਧਾਵਾ ਨੇ ਐਕਸ 'ਤੇ ਆਪਣਾ ਖਾਤਾ ਕੀਤਾ ਬੰਦ

ਪੰਜਾਬੀ ਗਾਇਕ ਗੁਰੂ ਰੰਧਾਵਾ ਨੇ ਆਪਣਾ ਐਕਸ ਅਕਾਉਂਟ ਅਚਨਚੇਤ ਬੰਦ ਕਰ ਦਿੱਤਾ ਹੈ। ਅਜਿਹਾ ਉਸ ਨੇ ਇਕ ਭੇਤਭਰੀ ਪੋਸਟ ਤੋਂ ਬਾਅਦ ਕੀਤਾ, ਜਿਸ ਨੂੰ 'ਸਰਦਾਰ ਜੀ 3' ਦੇ ਵਿਵਾਦ ਦੌਰਾਨ ਦਿਲਜੀਤ ਦੀ ਆਲੋਚਨਾ ਸਮਝਿਆ ਜਾ ਰਿਹਾ ਸੀ। ਇਹ ਸਭ ਕੁਝ ਘੰਟਿਆ ਬਾਅਦ ਹੋਇਆ ਜਦੋਂ ਗੁਰੂ ਨੇ ਇਕ ਅਜਿਹਾ ਸੰਦੇਸ਼ ਐਕਸ ਤੇ ਸਾਂਝਾ ਕੀਤਾ ਸੀ, ਜਿਸ ਦਾ ਨਿਸ਼ਾਨਾ ਦਿਲਜੀਤ ਨੂੰ ਬਣਾਇਆ ਜਾਪਦਾ ਸੀ।

ਭਾਵੇਂ ਗੁਰੂ ਨੇ ਉਸ ਦਾ ਸਿੱਧੇ ਤੌਰ 'ਤੇ ਨਾਂਅ ਲੈ ਕੇ ਜ਼ਿਕਰ ਨਹੀਂ ਕੀਤਾ ਸੀ ਪਰ ਫਿਰ ਵੀ ਇਹ ਸਮਝਿਆ ਗਿਆ ਸੀ ਕਿ ਇਹ ਪੋਸਟ ਦਿਲਜੀਤ ਬਾਰੇ ਹੈ। ਜ਼ਿਕਰਯੋਗ ਹੈ ਕਿ 'ਸਰਦਾਰ ਜੀ 3' 'ਚ ਪਾਕਿਸਤਾਨੀ ਅਭਿਨੇਤਰੀ ਹਾਨੀਆ ਆਮਿਰ ਨਾਲ ਨਿਭਾਈ ਆਪਣੀ ਭੂਮਿਕਾ ਲਈ ਦਿਲਜੀਤ ਨੂੰ ਕਈ ਤਰ੍ਰਾਂ ਦੀਆਂ ਪ੍ਰਤੀਕਿਰਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।