ਹਰਦੀਪ ਗਰੇਵਾਲ ਨੇ ਜਤਾਈ ਆਪਣੀ ਨਾਰਾਜ਼ਗੀ

ਪੰਜਾਬੀ ਅਦਾਕਾਰ ਹਰਦੀਪ ਗਰੇਵਾਲ ਨੇ ਪਿਛਲੇ ਦਿਨੀਂ ਇੰਸਟਾਗ੍ਰਾਮ ਲਾਈਵ 'ਤੇ ਪੰਜਾਬੀ ਫਿਲਮ ਉਦਯੋਗ 'ਚ ਰਿਲੀਜ਼ ਤਾਰੀਕਾਂ ਦੇ ਵਿਵਾਦ ਸੰਬੰਧੀ ਛਿੜੇ ਮੁੱਦੇ 'ਤੇ ਆਪਣੀ ਭਾਰੀ ਨਾਰਾਜ਼ਗੀ ਪ੍ਰਗਟਾਈ ਹੈ। ਹਰਦੀਪ ਗਰੇਵਾਲ ਜੋ ਕਿ ਆਪਣੀ ਆਉਣ ਵਾਲੀ ਫਿਲਮ ਜੋ ਕਿ ਸੁਪਰਸਿਕਸ ਦੀ ਰਿਲੀਜ਼ ਦੀਆਂ ਤਿਆਰੀਆਂ ਕਰ ਰਿਹਾ ਹੈ ਨੇ ਦੱਸਿਆ ਕਿ ਉਸ ਨੇ ਫ਼ਿਲਮ ਨੂੰ ਵੱਡੇ ਪਰਦੇ 'ਤੇ ਉਤਾਰਨ ਲਈ 14 ਮਾਰਚ ਦੀ ਤਾਰੀਕ ਨਿਸ਼ਚਿਤ ਕਰ ਲਈ ਹੈ। ਜਿਸ ਨਾਲ ਉਹ ਇਹ ਯਕੀਨੀ ਬਣਾਉਣ ਚਾਹੁੰਦਾ ਹੈ ਕਿ ਕੋਈ ਹੋਰ ਪੰਜਾਬੀ ਫ਼ਿਲਮ ਇਸੇ ਦਿਨ ਰਿਲੀਜ਼ ਨਹੀਂ ਹੋਵੇਗੀ। ਆਪਣੇ ਭਾਵੁਕਤਾ ਭਰੇ ਅਤੇ ਗੁੱਸੇ ਭਰੇ ਅੰਦਾਜ਼ 'ਚ ਅਭਿਨੇਤਾ ਨੇ ਕਿਹਾ ਕਿ ਰਿਲੀਜ਼ ਸੰਬੰਧੀ ਤਾਰੀਕ ਬੁੱਕ ਕਰਨ ਦੇ ਬਾਵਜੂਦ ਉਸੇ ਦਿਨ ਇਕ ਹੋਰ ਉੱਘੇ ਨਿਰਦੇਸ਼ਕ ਅਤੇ ਨਿਰਮਾਤਾ ਦੀ ਫ਼ਿਲਮ ਰਿਲੀਜ਼ ਕਰਨ ਦਾ ਐਲਾਨ ਕੀਤਾ ਗਿਆ ਸੀ।

ਉਸ ਨੇ ਕਿਹਾ ਕਿ ਪੰਜਾਬੀ ਫ਼ਿਲਮ ਇੰਡਸਟਰੀ 'ਚ ਵੱਡੇ ਨਿਰਮਾਤਾਵਾਂ ਵਲੋਂ ਧੱਕੇਸ਼ਾਹੀ ਕੀਤੀ ਜਾ ਰਹੀ ਹੈ,ਜਿਹੜੇ ਪਹਿਲਾਂ ਨਿਰਧਾਰਤ ਕੀਤੀਆਂ ਰਿਲੀਜ਼ ਤਾਰੀਕਾਂ ਦਾ ਸਨਮਾਨ ਨਹੀਂ ਕਰਦੇ। ਉਸ ਨੇ ਕਿਹਾ ਕਿ ਪਿਛਲੇ ਸਾਲ ਵੀ ਉਸ ਨੂੰ ਕਿਸੇ ਹੋਰ ਪ੍ਰੋਡਕਸ਼ਨ ਹਾਊਸ ਦੀ ਯੋਜਨਾ ਕਾਰਨ ਆਪਣੀ ਫਿਲਮ ਦੀ ਰਿਲੀਜ਼ ਤਾਰੀਕ ਨੂੰ ਬਦਲਣ ਲਈ ਮਜ਼ਬੂਰ ਹੋਣਾ ਪਿਆ ਸੀ ਪਰ ਇਸ ਵਾਰ ਉਹ ਪਿੱਛੇ ਨਹੀਂ ਹਟੇਗਾ। ਉਸ ਨੇ ਕਿਹਾ ਕਿ ਸੁਪਰਸਿਕਸ 14 ਮਾਰਚ ਨੂੰ ਹੀ ਰਿਲੀਜ਼ ਹੋਵੇਗੀ। ਹਰਦੀਪ ਨੇ ਕਿਹਾ ਕਿ ਉਹ ਇੰਡਸਟਰੀ ਚ ਦੂਜਿਆਂ ਦੀ ਕਾਰਵਾਈ ਤੋਂ ਪ੍ਰਭਾਵਿਤ ਨਹੀਂ ਹੋਵੇਗਾ।