ਆ ਰਿਹਾ ਹੈ 'ਸ਼ੌਕੀ ਸਰਦਾਰ'

ਪੰਜਾਬੀ ਫ਼ਿਲਮ 'ਸ਼ੌਕੀ ਸਰਦਾਰ' ਦਾ ਟੀਜ਼ਰ ਆਖਰਕਾਰ ਰਿਲੀਜ਼ ਹੋ ਗਿਆ ਹੈ ਅਤੇ ਇਸ ਨਾਲ ਪੰਜਾਬੀ ਸਿਨੇਮਾ ਦੇ ਦਰਸ਼ਕਾਂ 'ਚ ਜ਼ੋਸ਼ ਦੀ ਲਹਿਰ ਦੌੜ ਗਈ ਹੈ। ਜੀ ਸਟੂਡੀਓ ਦਾ ਸਹਿਯੋਗ ਪ੍ਰਾਪਤ ਇਸ ਫ਼ਿਲਮ 'ਚ ਗਾਇਕ ਅਤੇ ਅਭਿਨੇਤਾ ਮਾਨ ਦੇ ਨਾਲ ਬੜੇ ਤਜ਼ਰਬੇਕਾਰ ਅਤੇ ਉਘੇ ਅਭਿਨੇਤਾ ਗੁੱਗੂ ਗਿੱਲ ਤੋਂ ਇਲਾਵਾ ਸੰਗੀਤ ਦੀ ਦੁਨੀਆ 'ਚ ਜਾਦੂ ਬਿਖੇਰਨ ਵਾਲੇ ਗੁਰੂ ਰੰਧਾਵਾ ਅਤੇ ਨਿਮਰਤ ਕੌਰ ਆਹਲੂਵਾਲੀਆ ਪਰਦੇ 'ਤੇ ਨਜ਼ਰ ਆਉਣਗੇ। ਨਿਮਰਤ ਇਸ ਫ਼ਿਲਮ ਨਾਲ ਪੰਜਾਬੀ ਸਿਨੇਮਾ 'ਚ ਸ਼ੁਰੂਆਤ ਕਰ ਰਹੀ ਹੈ। ਫ਼ਿਲਮ ਦਾ ਨਿਰਦੇਸ਼ਨ ਧੀਰਜ ਕੇਦਾਰਨਾਥ ਰਤਨ ਵਲੋਂ ਕੀਤਾ ਗਿਆ ਹੈ ਅਤੇ ਇਸ 'ਚ ਐਕਸ਼ਨ ਅਤੇ ਰੋਮਾਂਸ ਦਾ ਸੁਮੇਲ ਦੇਖਣ ਨੂੰ ਮਿਲੇਗਾ।

ਫ਼ਿਲਮ 16 ਮਈ ਨੂੰ ਵੱਡੇ ਪਰਦੇ ਦਾ ਸ਼ਿੰਗਾਰ ਬਣੇਗੀ। ਟੀਜ਼ਰ ਤੋਂ ਇਸ ਗੱਲ ਦੀ ਝਲਕ ਮਿਲਦੀ ਹੈ ਕਿ ਫ਼ਿਲਮ 'ਚ ਨਾਟਕੀ ਅੰਦਾਜ਼ ਸ਼ਕਤੀ ਦਰਮਿਆਨ ਤਿੱਖਾ ਸੰਘਰਸ਼ ਅਤੇ ਐਕਸ਼ਨ ਨੂੰ ਕਹਾਣੀ ਵਿੱਚ ਗੁੰਦਿਆ ਗਿਆ ਹੈ। 'ਸ਼ੌਕੀ ਸਰਦਾਰ' 'ਚ ਆਪਣੀ ਵਿਰਾਸਤ ਨੂੰ ਸੰਭਾਲਣ ਲਈ ਲੜਨ ਵਾਲੇ ਯੋਧਿਆਂ ਲਈ ਮਹਾਨ ਗਾਥਾ ਦੀ ਗੱਲ ਵੀ ਕਰੇਗੀ।