ਕੀ ਬਾਲੀਵੁੱਡ ਡਰਿਆ ਹੋਇਆ ਹੈ-ਜਾਵੇਦ ਅਖਤਰ

ਬਾਲੀਵੁੱਡ ਦੇ ਪ੍ਰਸਿੱਧ ਗੀਤਕਾਰ ਜਾਵੇਦ ਅਖਤਰ ਜਿਹੜੇ ਫਿਲਮ ਉਦਯੋਗ ਦੀਆਂ ਕੁਝ ਉਨ੍ਹਾਂ ਬੁਲੰਦ ਹਸਤੀਆਂ 'ਚੋਂ ਇਕ ਹਨ , ਜਿਹੜੀਆਂ ਕੇਂਦਰ ਸਰਕਾਰ ਦੀ ਖੁੱਲ੍ਹ ਕੇ ਆਲੋਚਨਾ ਕਰਦੀਆਂ ਹਨ। ਜਾਵੇਦ ਦੀ ਗੱਲਬਾਤ 'ਚ ਅਸਹਿਮਤੀ ਦਾ ਅੰਦਾਜ਼ ਤਾਂ ਘੱਟ ਹੀ ਹੁੰਦਾ ਹੈ ਅਤੇ ਉਹ ਇੰਡਸਟਰੀ ਦੇ ਆਪਣੇ ਸਾਥੀਆਂ ਪ੍ਰਤੀ ਜਿਨ੍ਹਾਂ 'ਚ ਚੋਟੀ ਦੇ ਅਭਿਨੇਤਾ ਵੀ ਸ਼ਾਮਲ ਹਨ ਦੇ ਖਿਲਾਫ ਉਹ ਕਦੇ ਵੀ ਬੜਬੋਲਾਪਣ ਨਹੀਂ ਦਿਖਾਉਂਦਾ।

ਉਸ ਨੇ ਹਾਲ ਹੀ 'ਚ ਇਕ ਟਿੱਪਣੀ ਕੀਤੀ ਕਿ ਮੈਰਿਲ ਸਟ੍ਰੀਪ ਨੇ ਅਮਰੀਕੀ ਸਰਕਾਰ ਵਿਰੁੱਧ ਇਕ ਬਿਆਨ ਦਿੱਤਾ ਸੀ, ਪਰ ਉਸ ਦੇ ਖਿਲਾਫ ਆਮਦਨ ਟੈਕਸ ਵਿਭਾਗ ਦੀ ਕੋਈ ਛਾਪੇਮਾਰੀ ਨਹੀਂ ਹੋਈ। ਮੈਂ ਇਸ ਗੱਲ 'ਚ ਨਹੀਂ ਜਾਂਦਾ ਕਿ ਡਰ ਹਕੀਕਤ 'ਚ ਹੈ ਜਾਂ ਨਹੀਂ ਪਰ ਅਜਿਹੀ ਧਾਰਨਾ ਜ਼ਰੂਰ ਹੈ। ਜੇਕਰ ਕਿਸੇ ਦੇ ਅੰਦਰ ਇਸ ਡਰ ਅਤੇ ਦਹਿਸ਼ਤ ਦੀ ਭਾਵਨਾ ਮੌਜੂਦ ਹੈ ਤਾਂ ਉਹ ਈ.ਡੀ. ਜਾਂ ਸੀ.ਬੀ.ਆਈ. ਦੀ ਜਾਂਚ ਦਾ ਸਾਹਮਣਾ ਕਰਨ ਦੀ ਚਿੰਤਾ ਕਰ ਸਕਦੇ ਹਨ।

ਜਾਵੇਦ ਨੇ ਇਕ ਇੰਟਰਵਿਊ 'ਚ ਦੱਸਿਆ ਕਿ ਬਾਲੀਵੁੱਡ 'ਚ ਸਹਿਮਤੀ ਦੀ ਘਾਟ ਇੰਡਸਟਰੀ ਦੇ ਅੰਦਰੋਂ ਨਹੀਂ ਸਗੋਂ ਬਾਹਰੀ ਪ੍ਰਭਾਵਾਂ ਕਾਰਨ ਹੁੰਦੀ ਹੈ, ਜਿਹੜੇ ਲੋਕ ਇਸ ਇੰਡਸਟਰੀ 'ਚ ਕੰਮ ਕਰਦੇ ਹਨ ਉਹ ਵੀ ਹੋਰਾਂ ਵਾਂਗ ਸਮਾਜ ਦਾ ਹਿੱਸਾ ਹਨ। ਉਨ੍ਹਾਂ ਦੇ ਪੇਸ਼ੇ 'ਚ ਕਾਫੀ ਗਲੈਮਰ ਹੋ ਸਕਦਾ ਹੈ। ਪਰ ਇਸ ਦੇ ਬਾਵਜੂਦ ਉਹ ਸਾਧਾਰਨ ਲੋਕਾਂ ਵਰਗੇ ਹੀ ਹਨ। ਉਸ ਨੇ ਕਿਹਾ ਬਾਲੀਵੁੱਡ 'ਚ ਜੇਕਰ ਕੋਈ ਡਰ ਦਾ ਮਾਹੌਲ ਹੈ ਤੇ ਉਹ ਬਾਹਰੀ ਕਾਰਨਾਂ ਕਰਕੇ ਹੈ।