ਪੰਜਾਬ ਦੇ ਕਿਸੇ ਵੀ ਸਿਨੇਮਾ ਘਰ ’ਚ ਨਹੀਂ ਲੱਗੀ ਕੰਗਣਾ ਰਣੌਤ ਦੀ ਵਿਵਾਦਤ ਫਿਲਮ ‘ਐਮਰਜੈਂਸੀ’

ਪੰਜਾਬ ਵਿਚ ਕੰਗਨਾ ਰਣੌਤ ਦੀ ਵਿਵਾਦਤ ਫਿਲਮ ‘ਐਮਰਜੈਂਸੀ’ ਵੱਡੇ ਪਰਦੇ ’ਤੇ ਨਹੀਂ ਉਤਰ ਸਕੀ, ਫਿਲਮ ਨੂੰ ਸਿੱਖ ਜਥੇਬੰਦੀਆਂ ਅਤੇ ਐੱਸਜੀਪੀਸੀ ਦੇ ਭਾਰੀ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ, ਇਸ ਵਿਚਕਾਰ ਸੂਬੇ ਦੇ ਸਿਨੇਮਾ ਥੀਏਟਰ ਮਾਲਕਾਂ ਨੇ ਫਿਲਮ ਦਿਖਾਉਣ ਤੋਂ ਇਨਕਾਰ ਕਰ ਦਿੱਤਾ। ਸਿੱਖ ਸੰਗਠਨਾਂ ਨੇ ਅੰਮ੍ਰਿਤਸਰ, ਜਲੰਧਰ, ਲੁਧਿਆਣਾ ਅਤੇ ਮੋਹਾਲੀ ਵਿਚ ਸਿਨੇਮਾਘਰਾਂ ਦੇ ਬਾਹਰ ਕਾਲੇ ਝੰਡੇ ਲੈ ਕੇ ਵਿਰੋਧ ਪ੍ਰਦਰਸ਼ਨ ਕੀਤਾ, ਜਿਸ ਦੌਰਾਨ ਪੁਲਿਸ ਵੀ ਤਾਇਨਾਤ ਰਹੀ।

ਪੰਜਾਬ ਵਿਚ ਕਿਸੇ ਵੀ ਥੀਏਟਰ ਵਿਚ ਫਿਲਮ ਚੱਲਣ ਦੀ ਰਿਪੋਰਟ ਨਹੀਂ ਹੈ। ਪੀਵੀਆਰ. ਗਰੁੱਪ ਦੇ 70 ਤੋਂ 80 ਸਿਨੇਮਾਘਰਾਂ ਵਿਚ ਇਹ ਫਿਲਮ ਦਿਖਾਈ ਜਾਣੀ ਸੀ ਪਰ ਵਿਰੋਧ ਤੋਂ ਬਾਅਦ ਇਨ੍ਹਾਂ ਸਿਨੇਮਾਘਰਾਂ ਵਿਚ ਫਿਲਮ ਨਹੀਂ ਦਿਖਾਈ ਗਈ।

ਰਿਪੋਰਟਸ ਮੁਤਾਬਕ, ਫਿਲਮ ਦੇ ਪਹਿਲੇ ਰਿਲੀਜ਼ ਕੀਤੇ ਗਏ ਟਰੇਲਰ ਵਿਚ ਬੰਗਲਾਦੇਸ਼ ਦੀ ਆਜ਼ਾਦੀ ਦੇ ਦੌਰ ਨੂੰ ਵੀ ਦਿਖਾਇਆ ਗਿਆ ਸੀ, ਜਿਸ ਦੇ ਚੱਲਦੇ ਇਹ ਫਿਲਮ ਬੰਗਲਾਦੇਸ਼ ਵਿਚ ਵੀ ਬੈਨ ਹੋ ਚੁੱਕੀ ਹੈ।