ਕਰਨ ਔਜਲਾ ਅਤੇ ਅਰਜੁਨ ਢਿੱਲੋਂ ਇਕੱਠੇ ਦੇਣਗੇ ਪੇਸ਼ਕਾਰੀ

ਕਰਨ ਔਜਲਾ ਅਤੇ ਅਰਜੁਨ ਢਿੱਲੋਂ ਅਗਲੇ ਦਿਨਾਂ ’ਚ ਸਾਂਝੀ ਪੇਸ਼ਕਾਰੀ ਨਾਲ ਦਰਸ਼ਕਾਂ/ਸਰੋਤਿਆਂ ਦੇ ਰੂ-ਬ-ਰੂ ਹੋ ਸਕਦੇ ਹਨ। ਪੰਜਾਬੀ ਸੰਗੀਤ ਦੀਆਂ ਇਨ੍ਹਾਂ 2 ਨਾਮੀ ਸ਼ਖਸੀਅਤਾਂ ਕਰਨ ਔਜਲਾ ਅਤੇ ਅਰਜਨ ਢਿੱਲੋਂ ਨੇ ਸੋਸ਼ਲ ਮੀਡੀਆ ’ਤੇ ਹਾਲ ਹੀ ’ਚ ਇਕੱਠੇ ਮਸਤੀ ਮਾਰਨ ਦੀ ਇਕ ਵੀਡੀਓ ਸਾਂਝੀ ਕੀਤੀ ਹੈ। ਇਸ ਵੀਡੀਓ ਕਲਿਪ ਨੇ ਜਿੱਥੇ ਉਨ੍ਹਾਂ ਦੇ ਪ੍ਰੰਸ਼ਸਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ,

ਉੱਥੇ ਉਹ ਬਹੁਤ ਜ਼ਿਆਦਾ ਉਤਸ਼ਾਹਿਤ ਹੋ ਕੇ ਕੁਝ ਅਟਕਲਾਂ ਵੀ ਲਗਾ ਰਹੇ ਹਨ। ਕਰਨ ਔਜਲਾ ਨੇ ਆਪਣੇ ਇੰਡੀਆ ਟੂਰ ਨਾਲ ਸੰਗੀਤ ਪ੍ਰੇਮੀਆਂ ’ਚ ਇਕ ਵਿਸ਼ੇਸ਼ ਆਕਰਸ਼ਨ ਪੈਦਾ ਕੀਤਾ ਹੈ। ਜਿਸ ਦੌਰਾਨ ਉਸ ਨੇ ਸਟੇਜ ’ਤੇ ਪਰਣੀਤੀ ਚੋਪੜਾ, ਜੈਜ਼ੀ ਬੀ, ਹਨੀ ਸਿੰਘ ਅਤੇ ਵਿੱਕੀ ਕੋਸ਼ਲ ਨਾਲ ਇਕ ਤਹਿਲਕੇ ਦਾਰ ਪੇਸ਼ਕਾਰੀ ਦਿੱਤੀ।

ਹੁਣ ਵੀਡੀਓ ਕਲਿਪ ਸਾਹਮਣੇ ਆਉਣ ਤੋਂ ਬਾਅਦ ਸੰਗੀਤ ਪ੍ਰੇਮੀ ਇਹ ਮੰਨਣ ਲੱਗੇ ਹਨ ਕਿ ਇਹ ਜੋੜੀ ਆਉਣ ਵਾਲੇ ਸਮੇਂ ’ਚ ਕਈ ਵੱਡੇ ਪ੍ਰਾਜੈਕਟ ਲੈ ਕੇ ਆ ਸਕਦੀ ਹੈ। ਹਾਲਾਂਕਿ ਇਹ ਵੀਡੀਓ ਸਿਰਫ ਹਾਸੇ ਮਜ਼ਾਕ ਵਾਲੀ ਹੈ ਪਰ ਆਉਣ ਵਾਲੇ ਸਮੇਂ ’ਚ ਪਤਾ ਲਗੇਗਾ ਕਿ ਉਨ੍ਹਾਂ ਦੀ ਜੋੜੀ ਕੀ ਰੰਗ ਦਿਖਾਉਂਦੀ ਹੈ।