26.59C Vancouver 26.59C VancouverAug 30, 2022 12:30 PM - Agencies
ਬਾਲੀਵੁੱਡ ਅਦਾਕਾਰਾਂ ਵਿਰੁੱਧ ਆਪਣੀਆਂ ਨਕਾਰਾਤਮਕ ਅਤੇ ਅਪਮਾਨਜਨਕ ਟਿੱਪਣੀਆਂ ਲਈ ਜਾਣੇ ਜਾਂਦੇ ਕਮਾਲ ਰਾਸ਼ਿਦ ਖਾਨ ਉਰਫ ਕੇ. ਆਰ. ਕੇ. ਗੰਭੀਰ ਮੁਸੀਬਤ ਵਿਚ ਫਸ ਗਏ ਹਨ। ਕੇ. ਆਰ. ਕੇ. ਨੂੰ ਮੁੰਬਈ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਹੈ।
ਦੁਬਈ ਤੋਂ ਮੁੰਬਈ ਏਅਰਪੋਰਟ 'ਤੇ ਪਹੁੰਚਦੇ ਹੀ ਉਸ ਨੂੰ ਹਿਰਾਸਤ ਵਿਚ ਲੈ ਲਿਆ ਗਿਆ। ਕੇ. ਆਰ. ਕੇ. ਖਿਲਾਫ਼ ਯੁਵਾ ਸੈਨਾ ਦੇ ਮੈਂਬਰ ਰਾਹੁਲ ਕਾਨਾਲ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ।
ਗ੍ਰਿਫਤਾਰੀ ਮਗਰੋਂ ਰਾਹੁਲ ਨੇ ਦੱਸਿਆ, ''ਕਮਾਲ ਰਾ. ਖਾਨ ਨੂੰ ਮੇਰੀ ਸ਼ਿਕਾਇਤ 'ਤੇ ਅੱਜ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਮੈਂ ਮੁੰਬਈ ਪੁਲਿਸ ਦੇ ਇਸ ਕੰਮ ਲਈ ਧੰਨਵਾਦ ਕਰਦਾ ਹਾਂ। ਉਹ ਸੋਸ਼ਲ ਮੀਡੀਆ 'ਤੇ ਅਪਮਾਨਜਨਕ ਟਿੱਪਣੀਆਂ ਤੇ ਭੱਦੀ ਭਾਸ਼ਾ ਦੀ ਵਰਤੋਂ ਕਰਦਾ ਹੈ। ਸਮਾਜ ਵਿਚ ਇਸ ਤਰ੍ਹਾਂ ਦਾ ਵਤੀਰਾ ਸਵੀਕਾਰ ਨਹੀਂ ਕੀਤਾ ਜਾ ਸਕਦਾ। ਕੇ. ਆਰ. ਕੇ. ਦੀ ਗ੍ਰਿਫਤਾਰੀ ਨਾਲ ਮੁੰਬਈ ਪੁਲਿਸ ਨੇ ਅਜਿਹੇ ਲੋਕਾਂ ਨੂੰ ਸਖ਼ਤ ਸੰਦੇਸ਼ ਭੇਜਿਆ ਹੈ।"
ਮਰਹੂਮ ਰਿਸ਼ੀ ਕਪੂਰ ਤੇ ਇਰਫਾਨ ਖਾਨ ਖਿਲਾਫ ਅਪਮਾਨਜਨਕ ਟਿੱਪਣੀਆਂ ਨੂੰ ਲੈ ਕੇ ਕੇ. ਆਰ. ਕੇ. 'ਤੇ ਜਨਤਕ ਤੌਰ 'ਤੇ ਅਸ਼ਲੀਲ ਕੰਮ ਜਾਂ ਸ਼ਬਦਾਂ ਲਈ ਸੈਕਸ਼ਨ 294 ਅਤੇ ਆਈ. ਪੀ. ਸੀ. ਦੀਆਂ ਹੋਰ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਦੱਸਣਯੋਗ ਹੈ ਕਿ ਕੇ. ਆਰ. ਕੇ. ਦੀ ਗ੍ਰਿਫਤਾਰੀ ਕੁਝ ਸਾਲ ਪਹਿਲਾਂ ਉਸ ਵੱਲੋਂ ਸਾਂਝੇ ਕੀਤੇ ਕੁਝ ਟਵੀਟਸ ਨਾਲ ਸਬੰਧਤ ਹੈ। ਉਸ ਨੇ ਮਰਹੂਮ ਬਾਲੀਵੁੱਡ ਅਦਾਕਾਰ ਰਿਸ਼ੀ ਕਪੂਰ ਤੇ ਇਰਫਾਨ ਖਾਨ ਖਿਲਾਫ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ ਸਨ।
