ਮੀਕਾ ਖੁੱਲ੍ਹ ਕੇ ਬੋਲੇ ਬਿਪਾਸ਼ਾ ਤੇ ਕਰਨ ਬਾਰੇ

ਬਾਲੀਵੁੱਡ ਗਾਇਕ ਅਤੇ ਚਰਚਿਤ ਸੰਗੀਤਕਾਰ ਮੀਕਾ ਸਿਘ ਵੈਬਸੀਰੀਜ਼ ਡੇਂਜਰਸ ਨਾਲ ਇਕ ਨਿਰਮਾਤਾ ਦੇ ਰੂਪ ’ਚ ਦਰਸ਼ਕਾਂ ਦੇ ਦਿਲਾਂ ’ਤੇ ਸ਼ਾਪ ਛੱਡਣ ਲਈ ਆ ਰਿਹਾ ਹੈ। ਪਿਛਲੇ ਦਿਨੀਂ ਉਸ ਨੇ ਇਸ ਪ੍ਰਾਜੈਕਟ ਸੰਬੰਧੀ ਆਪਣੇ ਕਈ ਚੁਣੌਤੀਪੂਰਨ ਅਨੁਭਵ ਸਾਂਝੇ ਕੀਤੇ। ਮੀਕਾ ਨੇ ਦੱਸਿਆ ਕਿ ਇਸ ਪ੍ਰਾਜੈਕਟ ’ਚ ਇਕ ਨਿਰਮਾਤਾ ਵਜੋਂ ਉਸ ਦੀ ਸ਼ੁਰੂਆਤ ਉਮੀਦ ਨਾਲੋਂ ਕਿਤੇ ਜ਼ਿਆਦਾ ਮੁਸ਼ਕਲਾਂ ਭਰੀ ਸਾਬਤ ਹੋਈ।

ਇਸ ਸੀਰੀਜ਼ ’ਚ ਬਿਪਾਸ਼ਾ ਬਾਸੂ ਅਤੇ ਕਰਨ ਸਿੰਘ ਗਰੋਵਰ ਪ੍ਰਮੁੱਖ ਭੂਮਿਕਾਵਾਂ ਕਰ ਰਹੇ ਹਨ। ਇਸ ਜੋੜੀ ਦੇ ਅਦਾਕਾਰੀ ਬਾਰੇ ਅਤੇ ਕੰਮ ਸੰਬੰਧੀ ਅਨੁਭਵ ਬਾਰੇ ਮੀਕਾ ਨੇ ਖੁੱਲ੍ਹ ਕੇ ਗੱਲਾਂ ਕੀਤੀਆ। ਮੀਕਾ ਨੇ ਕਿਹਾ ਕਿ ਸ਼ੁਰੂ ’ਚ ਕਰਨ ਗਰੋਵਰ ਦੇ ਨਾਲ ਕਿਸੇ ਨਵੀਂ ਅਭਿਨੇਤਰੀ ਨੂੰ ਲਿਆਂਦੇ ਜਾਣ ਦੀ ਯੋਜਨਾ ਸੀ ਪਰ ਅਖੀਰ ’ਚ ਬਿਪਾਸ਼ਾ ਬਾਸੂ ਦਾ ਨਾਂਅ ਫਾਈਨਲ ਹੋਇਆ।

ਮੀਕਾ ਨੇ ਕਿਹਾ ਕਿ ਇਸ ਬਦਲਾਅ ਨਾਲ ਬਜਟ ’ਤੇ ਭਾਵੇਂ ਕੋਈ ਬਹੁਤ ਅਸਰ ਨਹੀਂ ਪਿਆ ਪਰ ਇਸ ਨਾਲ ਕਈ ਹੋਰ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਜੋੜੀ ਦੀ ਸਮੱਸਿਆ ਰਿਹਾਇਸ਼ ਨਾਲ ਸੰਬੰਧਿਤ ਵੀ ਸੀ। ਹਾਲਾਂਕਿ ਉਹ ਪਤੀ ਪਤਨੀ ਹਨ ਪਰ ਉਨ੍ਹਾਂ ਨੇ ਵੱਖਰੇ ਕਮਰਿਆਂ ਦਾ ਪ੍ਰਬੰਧ ਕਰਨ ਦੀ ਜਿੱਦ ਕੀਤੀ। ਮੀਕਾ ਨੇ ਕਿਹਾ ਕਿ ਮੈਂ ਤਾਂ ਉਨ੍ਹਾਂ ਲਈ ਇਕ ਕਮਰਾ ਬੁੱਕ ਕਰਵਾਇਆ ਸੀ ਪਰ ਉਨ੍ਹਾਂ ਨੇ ਨਾਂਹ ਕਰ ਦਿੱਤੀ ਕਿਹਾ ਕਿ ਸਾਨੂੰ ਵੱਖੋ-ਵੱਖਰੇ ਕਮਰੇ ਚਾਹੀਦੇ ਹਨ।

ਮੀਕਾ ਨੇ ਕਿਹਾ ਕਿ ਮੈਨੂੰ ਉਨ੍ਹਾਂ ਦਾ ਤਰਕ ਸਮਝ ਨਹੀਂ ਆਇਆ। ਮੀਕਾ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਜਦੋਂ ਉਨ੍ਹਾਂ ਨਾਲ ਇਕ ਕੰਟਰੈਟਕ ਸਾਂਝਾ ਕੀਤਾ ਸੀ ਤਾ ਉਸ ’ਚ ਸਪੱਸ਼ਟ ਤੌਰ ਤੇ ਚੁੰਮਣ ਸੰਬੰਧੀ ਇਕ ਸੀਨ ਦਾ ਜ਼ਿਕਰ ਕੀਤਾ ਗਿਆ ਸੀ ਪਰ ਬਾਅਦ ’ਚ ਸਮਾਂ ਆਉਣ ਤੇ ਉਨ੍ਹਾਂ ਨੇ ਇਹ ਸ਼ੂਟ ਕਰਨ ਤੋਂ ਮਨਾ ਕਰ ਦਿੱਤਾ।