ਅਭਿਨੇਤਰੀ ਮੌਨੀ ਰਾਏ ਨੇ ਟ੍ਰੋਲਰ ਨੂੰ ਦਿੱਤਾ ਕਰਾਰਾ ਜਵਾਬ

ਟੈਲੀਵਿਜ਼ਨ ਅਤੇ ਫ਼ਿਲਮਾਂ ਦੀ ਅਦਾਕਾਰਾ ਮੌਨੀ ਰਾਏ ਹਾਲ ਹੀ 'ਚ ਇਕ ਨਵੇਂ ਹੇਅਰ ਸਟਾਈਲ ਨੂੰ ਅਪਣਾਉਣ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਤਿੱਖੀ ਬਹਿਸ ਦਾ ਵਿਸ਼ਾ ਬਣ ਗਈ ਹੈ। ਇਸ ਸੰਬੰਧ 'ਚ ਆਨਲਾਈਨ ਟਿੱਪਣੀਆਂ ਕੀਤੀਆਂ ਜਾ ਰਹੀਆਂ ਹਨ ਕਿ ਸ਼ਾਇਦ ਅਭਿਨੇਤਰੀ ਨੇ ਆਪਣੇ ਮੱਥੇ ਦੀ ਦਿਖ ਨੂੰ ਸੁੰਦਰ ਬਣਾਉਣ ਲਈ ਸਰਜਰੀ ਕਰਵਾਈ ਹੋਵੇਗੀ। ਇਸ ਕਰਕੇ ਉਸ ਨੇ ਵਾਲਾਂ ਦਾ ਅਜਿਹਾ ਸਟਾਈਲ ਅਪਣਾਇਆ ਹੈ।

ਵੱਖ-ਵੱਖ ਪਲੇਟਫਾਰਮਾਂ 'ਤੇ ਬਹੁਤ ਤੇਜ਼ੀ ਨਾਲ ਅਫਵਾਹਾਂ ਫੈਲੀਆਂ ਅਤੇ ਕਈਆਂ ਨੇ ਉਸ ਦੇ ਚਿਹਰੇ ਦੀਆਂ ਤਬਦੀਲੀਆਂ ਸੰਬੰਧੀ ਕਈ ਤਰ੍ਰਾਂ ਦੀਆਂ ਟਿੱਪਣੀਆਂ ਕੀਤੀਆਂ। ਮੀਡੀਆ 'ਤੇ ਉਸ ਦੀਆਂ ਨਵੇਂ ਹੇਅਰ ਸਟਾਈਲ ਅਤੇ ਉਸ ਤੋਂ ਪਹਿਲਾਂ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ ਗਈਆਂ।

ਕਾਫੀ ਸਮਾਂ ਮੌਨੀ ਇਸ ਚਰਚਾ ਦੌਰਾਨ ਚੁੱਪ ਰਹੀ ਪਰ ਅਖੀਰ ਉਸ ਨੇ ਆਪਣੀ ਆਉਣ ਵਾਲੀ ਡਰਾਉਣੀ ਅਤੇ ਕਾਮੇਡੀ ਫ਼ਿਲਮ 'ਦਿ ਭੂਤਨੀ' ਦੇ ਟ੍ਰੇਲਰ ਲਾਂਚ ਮੌਕੇ ਆਪਣੇ ਬਾਰੇ ਛਿੜੀ ਚਰਚਾ ਦਾ ਜਵਾਬ ਦਿੱਤਾ। ਜਦੋਂ ਉਸ ਤੋਂ ਪਲਾਸਟਿਕ ਸਰਜਰੀ ਦੀਆਂ ਅਫਵਾਹਾਂ ਬਾਰੇ ਪੁੱਛਿਆ ਤਾਂ ਉਸ ਨੇ ਕਿਹਾ ਅਜਿਹਾ ਕੁਝ ਨਹੀਂ ਹੈ। ਉਸ ਨੇ ਇਹ ਵੀ ਆਖਿਆ ਕਿ ਹਰ ਕਿਸੇ ਨੂੰ ਆਪਣਾ ਕੰਮ ਕਰਨ ਦਿਓ। ਮੈਂ ਅਜਿਹੀਆਂ ਟਿੱਪਣੀਆਂ ਬਾਰੇ ਧਿਆਨ ਨਹੀਂ ਦਿੰਦੀ। ਜੇ ਤੁਹਾਨੂੰ ਇਸ 'ਚ ਖੁਸ਼ੀ ਮਿਲਦੀ ਹੈ ਤਾਂ ਅਜਿਹਾ ਹੋਣ ਦਿਓ।