ਮੱਧ ਪ੍ਰਦੇਸ਼ ਦੇ ਗ੍ਰਹਿ ਮੰਤਰੀ ਨੇ ਬਾਲੀਵੁੱਡ ਅਦਾਕਾਰ ਅਰਜੁਨ ਕਪੂਰ ਨੂੰ ਦੱਸਿਆ- 'ਫਲਾਪ ਐਕਟਰ'

ਮੱਧ ਪ੍ਰਦੇਸ਼ ਦੇ ਗ੍ਰਹਿ ਮੰਤਰੀ ਨਰੋਤਮ ਮਿਸ਼ਰਾ ਨੇ ਬਾਲੀਵੁੱਡ ਅਦਾਕਾਰ ਅਰਜੁਨ ਕਪੂਰ ਨੂੰ 'ਫਲਾਪ ਐਕਟਰ' ਕਰਾਰ ਦਿੱਤਾ ਹੈ। ਉਨ੍ਹਾਂ ਇਹ ਟਿੱਪਣੀ ਅਰਜੁਨ ਕਪੂਰ ਵੱਲੋਂ ਬਾਈਕਾਟ ਟ੍ਰੈਂਡ ਖਿਲਾਫ਼ ਬੋਲਣ ਮਗਰੋਂ ਕੀਤੀ।

ਮਿਸ਼ਰਾ ਨੇ ਇੱਕ ਪ੍ਰੈੱਸ ਵਾਰਤਾ ਦੌਰਾਨ ਕਿਹਾ, ''ਅਰਜੁਨ ਕਪੂਰ ਨੂੰ ਲੋਕਾਂ ਨੂੰ ਧਮਕਾਉਣ ਦੀ ਬਜਾਏ ਆਪਣੀ ਅਦਾਕਾਰੀ 'ਤੇ ਧਿਆਨ ਦੇਣਾ ਚਾਹੀਦਾ ਹੈ।'' ਉਨ੍ਹਾਂ ਇਸ ਦੀ ਫੁਟੇਜ ਆਪਣੇ ਟਵਿੱਟਰ 'ਤੇ ਵੀ ਸਾਂਝੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਆਪਣੀਆਂ ਫਿਲਮਾਂ ਵਿਚ ਹਿੰਦੂ ਧਰਮ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਕਲਾਕਾਰ ਤੇ ਟੁਕੜੇ-ਟੁਕੜੇ ਗੈਂਗ ਦੇ ਸਮਰਥਕ ਜਨਤਾ ਨੂੰ ਧਮਕਾਉਣ ਦੀ ਕੋਸ਼ਿਸ਼ ਨਾ ਕਰਨ।

ਇੱਕ ਇੰਟਰਵਿਊ ਵਿਚ ਅਰਜੁਨ ਕਪੂਰ ਨੇ ਕਿਹਾ ਸੀ, ''ਮੈਨੂੰ ਲੱਗਦਾ ਹੈ ਕਿ ਅਸੀਂ ਇੰਨੇ ਲੰਮੇ ਸਮੇਂ ਤੱਕ ਚੁੱਪ ਰਹਿ ਕੇ ਗਲਤੀ ਕੀਤੀ ਹੈ। ਸਾਡੇ ਸ਼ਿਸ਼ਟਾਚਾਰ ਨੂੰ ਸਾਡੀ ਕਮਜ਼ੋਰੀ ਸਮਝ ਲਿਆ ਗਿਆ। ਅਸੀਂ ਹਮੇਸ਼ਾ ਇਸ ਗੱਲ ਵਿਚ ਵਿਸ਼ਵਾਸ ਰੱਖਦੇ ਹਾਂ ਕਿ ਕੰਮ ਨੂੰ ਆਪਣੇ-ਆਪ ਬੋਲਣ ਦਿਓ ਪਰ ਇਹ ਸਭ ਕੁਝ ਮਾਇਨੇ ਨਹੀਂ ਰੱਖਦਾ।'' ਉਨ੍ਹਾਂ ਇਹ ਵੀ ਕਿਹਾ ਕਿ ਫਿਲਮ ਇੰਡਸਟਰੀ ਨੂੰ ਇਕੱਠੇ ਹੋ ਕੇ ਇਸ ਮੁੱਦੇ ਦੀ ਜੜ੍ਹ ਤੱਕ ਪਹੁੰਚਣ ਦੀ ਲੋੜ ਹੈ।

ਬਾਲੀਵੁੱਡ ਨੂੰ ਪ੍ਰਭਾਵਿਤ ਕਰਨ ਵਾਲੇ ਸੋਸ਼ਲ ਮੀਡੀਆ 'ਤੇ ਕੈਂਸਲ ਕਲਚਰ ਬਾਰੇ ਗੱਲ ਕਰਦੇ ਹੋਏ ਅਰਜੁਨ ਕਪੂਰ ਨੇ ਅੱਗੇ ਕਿਹਾ, "ਅਸੀਂ ਥੋੜਾ ਬਹੁਤ ਬਰਦਾਸ਼ਤ ਕੀਤਾ। ਹੁਣ ਲੋਕ ਇਸ ਦੇ ਆਦੀ ਹੋ ਗਏ ਹਨ।" ਬਾਈਕਾਟ ਟ੍ਰੈਂਡ 'ਤੇ ਉਨ੍ਹਾਂ ਦੇ ਕੁਮੈਂਟਸ ਮਗਰੋਂ ਅਰਜੁਨ ਨੂੰ ਉਨ੍ਹਾਂ ਦੀ 'ਏਕ ਵਿਲੇਨ ਰਿਟਰਨਜ਼' ਨੂੰ ਲੈ ਕੇ ਆਨਲਾਈਨ ਟ੍ਰੋਲ ਦਾ ਜਮ ਕੇ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਪਿਛਲੇ ਕੁਝ ਸਮੇਂ ਤੋਂ ਬਾਈਕਾਟ ਟ੍ਰੈਂਡ ਨੇ ਬਾਲੀਵੁੱਡ ਨੂੰ ਖਾਸਾ ਪ੍ਰਭਾਵਿਤ ਕੀਤਾ ਹੈ। 2015 ਵਿਚ ਦਿੱਤੇ ਬਿਆਨ ਨੂੰ ਲੈ ਕੇ ਆਮਿਰ ਦੀ ਲਾਲ ਸਿੰਘ ਚੱਢਾ ਖਿਲਾਫ਼ ਨੈਗੇਟਿਵ ਕੰਪੇਨ ਜਮ ਕੇ ਚਲਾਈ ਗਈ। ਉੱਥੇ ਹੀ, ਫਿਲਮ ਰਾਈਟਰ ਕਨਿਕਾ ਢਿੱਲੋਂ ਦੇ ਟਵੀਟਸ ਨੂੰ ਲੈ ਕੇ ਅਕਸ਼ੈ ਕੁਮਾਰ ਦੀ 'ਰਕਸ਼ਾ ਬੰਧਨ' ਨੂੰ ਵੀ ਬਾਈਕਾਟ ਦੀ ਗਰਮੀ ਦਾ ਸਾਹਮਣਾ ਕਰਨਾ ਪਿਆ। ਰਿਤਿਕ ਰੋਸ਼ਨ ਵੱਲੋਂ 'ਲਾਲ ਸਿੰਘ ਚੱਢਾ' ਦਾ ਸਮਰਥਨ ਕਰਨ 'ਤੇ ਉਨ੍ਹਾਂ ਦੀ ਫਿਲਮ 'ਵਿਕਰਮ ਵੇਧਾ' ਵੀ ਬਾਈਕਾਟ ਟ੍ਰੈਂਡ ਦਾ ਸ਼ਿਕਾਰ ਹੋਈ ਹੈ।