ਪੰਜਾਬੀ ਸਿਨੇਮਾ ਨੇ ਕੀਤਾ ਇਤਿਹਾਸ ਵੱਲ ਰੁਖ

ਪੰਜਾਬੀ ਸਿਨੇਮਾ ਦੇ ਵਿਸ਼ਿਆਂ ’ਚ ਵਿਭਿੰਨਤਾ ਅਤੇ ਸਾਰਥਕਤਾ ਦੀ ਘਾਟ ਬਾਰੇ ਅਕਸਰ ਲੋਕਾਂ ਨੂੰ ਗੱਲਾਂ ਕਰਦਿਆਂ ਸੁਣਿਆ ਜਾਂਦਾ ਹੈ। ਪੰਜਾਬੀ ਫਿਲਮ ਨਿਰਮਾਤਾ ਕਈ ਵਰਿ੍ਹਆਂ ਤੋਂ ਇਕ ਹੀ ਜਾਲ ’ਚ ਉਲਝੇ ਹੋਏ ਹਨ ਜਾਂ ਤਾਂ ਉਹ ਹਲਕੀ ਫੁਲਕੀ ਕਾਮੇਡੀ ’ਤੇ ਧਿਆਨ ਕੇਂਦਰਿਤ ਕਰਦੇ ਹਨ ਜਾਂ ਫਿਰ ਪਿਆਰ ਭਰੀਆਂ ਕਹਾਣੀਆਂ ਨੂੰ ਆਧਾਰ ਬਣਾਉਂਦੇ ਹਨ। ਇਸ ਸੰਦਰਭ ’ਚ 2025 ਦਾ ਵਰ੍ਹਾ ਵੱਖਰਾ ਰੂਪ ਧਾਰਨ ਕਰਨ ਜਾ ਰਿਹਾ ਹੈ। ਇੰਝ ਲੱਗਦਾ ਹੈ ਜਿਵੇਂ ਪੰਜਾਬੀ ਸਿਨੇਮਾ ਇਕ ਨਵਾਂ ਵਰਕਾ ਪਰਤ ਰਿਹਾ ਹੈ।

ਹੁਣ ਇਸ ’ਚ ਸਿੱਖ ਇਤਿਹਾਸ ਦੀਆਂ ਅਮੀਰ ਅਤੇ ਅਣਕਹੀਆਂ ਕਹਾਣੀਆਂ ਦੀ ਗੱਲ ਹੋਣ ਲੱਗੀ ਹੈ। ਪਿਛਲੇ ਸਾਲ ਤਰਸੇਮ ਜੱਸੜ ਦੀ ‘ਮਸਤਾਨੇ’ ਅਤੇ ਅਮਰ ਹੁੰਦਲ ਵਲੋਂ ਬਣਾਈ ‘ਬੀਬੀ ਰਜਨੀ’ ਵਰਗੀਆਂ ਫਿਲਮਾਂ ਵੀ ਵੇਖੀਆਂ। ਜਿਨ੍ਹਾਂ ਨੇ ਕੁਝ ਨਵੇਂ ਵਿਸ਼ਿਆਂ ਨੂੰ ਛੂਹਣ ਦੀ ਗੱਲ ਕੀਤੀ। ਇਨ੍ਹਾਂ ਫਿਲਮਾਂ ਨੇ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕੀਤਾ ਸਗੋਂ ਬਾਕਸ ਆਫਿਸ ’ਤੇ ਵੀ ਸਫਲਤਾ ਹਾਸਲ ਕੀਤੀ। ਇਨ੍ਹਾਂ ਫਿਲਮਾਂ ਦੀ ਸਫਲਤਾ ਕਾਰਨ ਪੰਜਾਬੀ ਸਿਨੇਮਾ ਇਸ ਸਾਲ ’ਚ ਸਿੱਖ ਇਤਿਹਾਸ ਨਾਲ ਸੰਬੰਧਿਤ ਵਿਸ਼ਿਆਂ ਵੱਲ ਮੁੜਦਾ ਜਾਪਦਾ ਹੈ।

ਗਿੱਪੀ ਗਰੇਵਾਲ ਦੀ ‘ਅਕਾਲ’ ਤੋਂ ਲੈ ਕੇ ਤਰਸੇਮ ਜੱਸੜ ਦੀ ‘ਗੁਰੂ ਨਾਨਕ ਜਹਾਜ਼’ ਅਤੇ ਸਿੱਪੀ ਗਿਲ ਦੀ ‘ਗਦਰੀ ਯੋਧੇ’ ਨਾਲ ਸੰਬੰਧਤ ਫਿਲਮ ਚਰਚਾ ’ਚ ਆਈ। ਇਸ ਤੋਂ ਅੱਗੇ ਵੱਧ ਕੇ ਹੁਣ ਪੰਜਾਬੀ ਸਿਨੇਮਾ ’ਚ ਹਰੀ ਸਿੰਘ ਨਲੂਆ ਨਾਲ ਸੰਬੰਧਤ ਪ੍ਰਾਜੈਕਟ ਦੇ ਚਰਚੇ ਛਿੜੇ ਹਨ। ਇਸ ਨਾਲ ਸਿੱਖ ਇਤਿਹਾਸ ਦੀ ਅਮੀਰ ਅਤੇ ਬਹਾਦਰੀ ਭਰੀ ਵਿਰਾਸਤ ਨੂੰ ਪੇਸ਼ ਕਰਨ ਦਾ ਉਪਰਾਲਾ ਹੋਵੇਗਾ। ਇਸ ਤਬਦੀਲੀ ਦੇ ਪਿਛੇ ਭਾਵੇਂ ਕੁਝ ਵੀ ਕਾਰਨ ਹੋਣ ਪਰ ਇਹ ਸਹੀ ਦਿਸ਼ਾ ’ਚ ਚੁੱਕਿਆ ਇਕ ਚੰਗਾ ਕਦਮ ਹੈ।

ਜੇਕਰ ਸਿਨੇਮਾ ਅਜਿਹੀਆਂ ਕਹਾਣੀਆਂ ਨੂੰ ਪੇਸ਼ ਕਰਦਾ ਹੈ ਅਤੇ ਇਸ ਰਾਹੀਂ ਸਾਡੇ ਪੁਰਖਿਆਂ ਦੇ ਬਹਾਦਰੀ ਭਰੇ ਕਿੱਸੇ ਅਤੇ ਅਣਗਿਣਤ ਸੰਘਰਸ਼ਾਂ ਨੂੰ ਸਾਹਮਣੇ ਲਿਆਂਦਾ ਹੈ ਤਾਂ ਇਹ ਸਿਰਫ ਮਨੋਰੰਜਕ ਹੀ ਨਹੀਂ ਹੋਵੇਗਾ ਸਗੋਂ ਇਹ ਜ਼ਰੂਰੀ ਸੱਭਿਆਚਾਰਕ ਅਤੇ ਇਤਿਹਾਸਕ ਸੇਵਾ ਹੀ ਹੋਵੇਗੀ। ਪੰਜਾਬੀ ਸਿਨੇਮਾ ’ਚ ਅਜਿਹਾ ਮੋੜ ਪ੍ਰਸ਼ੰਸਾ ਦਾ ਹੱਕਦਾਰ ਹੈ ਅਤੇ ਅਸੀਂ ਆਸ ਕਰ ਸਕਦੇ ਹਾਂ ਕਿ ਇਹ ਆਉਣ ਵਾਲੇ ਸਾਲਾ ’ਚ ਸਾਡੇ ਲਈ ਪ੍ਰੇਰਣਾ ਅਤੇ ਸਿੱਖਿਆ ਦਾ ਸੋਮਾ ਬਣਦਾ ਰਹੇਗਾ।