14.32C Vancouver 14.32C VancouverJul 27, 2022 12:34 PM - Agencies
ਦਿੱਗਜ ਪੰਜਾਬੀ ਗਾਇਕ ਬਲਵਿੰਦਰ ਸਫ਼ਰੀ ਮੰਗਲਵਾਰ ਨੂੰ ਦੁਨੀਆ ਨੂੰ ਅਲਵਿਦਾ ਕਹਿ ਗਏ। ਉਹ 63 ਸਾਲ ਦੇ ਸਨ।
ਦਿਲ ਨਾਲ ਸਬੰਧਤ ਸਮੱਸਿਆਵਾਂ ਕਾਰਨ ਉਹ ਅਪ੍ਰੈਲ 2022 ਵਿਚ ਯੂ. ਕੇ. ਦੇ ਵੁਲਵਰਹੈਂਪਟਨ ਵਿਚ ਨਿਊ ਕਰਾਸ ਹਸਪਤਾਲ ਵਿਚ ਦਾਖ਼ਲ ਕਰਵਾਏ ਗਏ ਸਨ।
'ਤੂੰ ਹੂਰ ਸੋਹਣੀਏ' ਦੇ ਗਾਇਕ ਬਲਵਿੰਦਰ ਸਫ਼ਰੀ ਦੀ ਤਿੰਨ ਵਾਰ ਬਾਈਪਾਸ ਸਰਜਰੀ ਹੋਈ ਸੀ। ਜਿਸ ਮਗਰੋਂ ਉਹ ਬ੍ਰੈਨ ਡੈਮੇਜ ਕਾਰਨ ਕੋਮਾ ਵਿਚ ਚਲੇ ਗਏ ਸਨ। ਹਸਪਤਾਲ ਵਿਚ 86 ਦਿਨ ਬਿਤਾਉਣ ਤੋਂ ਬਾਅਦ ਸਫ਼ਰੀ ਨੂੰ ਛੁੱਟੀ ਦੇ ਦਿੱਤੀ ਗਈ ਸੀ ਅਤੇ ਉਹ ਠੀਕ ਹੋਣ ਦੇ ਰਾਹ 'ਤੇ ਸਨ ਪਰ ਬਚ ਨਹੀਂ ਸਕੇ ਅਤੇ 26 ਜੁਲਾਈ ਨੂੰ ਉਨ੍ਹਾਂ ਦੀ ਮੌਤ ਹੋ ਗਈ।
ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਦੇ ਕਈ ਕਲਾਕਾਰਾਂ ਨੇ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੱਤੀ ਹੈ।
ਨੀਰੂ ਬਾਜਵਾ ਨੇ 'ਪਾਰ ਲੰਘਾਦੇ' ਗਾਇਕ ਨੂੰ ਯਾਦ ਕਰਦੇ ਹੋਏ ਲਿਖਿਆ, ''ਬਿਊਟੀਫੁੱਲ ਬਿਲੋ ਦੀ ਸ਼ੂਟਿੰਗ ਦੌਰਾਨ ਮੈਂਨੂੰ ਯਾਦ ਹੈ ਬਲਵਿੰਦਰ ਜੀ ਨੂੰ ਅਸੀਂ ਵਿੰਡੋ ਤੋਂ ਦੇਖਿਆ ਸੀ...ਅਸੀਂ ਬਹੁਤ ਉਤਸ਼ਾਹਿਤ ਸੀ। ਉਹ ਬੜੀ ਦਰਿਆਦਿਲੀ ਨਾਲ ਸਾਨੂੰ ਮਿਲਣ ਆਏ। ਉਨ੍ਹਾਂ ਜਿਹਾ ਕੋਈ ਨਹੀਂ..ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਇੰਨਾ ਦੇਣ ਲਈ ਸਰ ਤੁਹਾਡਾ ਧੰਨਵਾਦ। ਬਲਵਿੰਦਰ ਸਫ਼ਰੀ ਜੀ ਤੁਸੀਂ ਸਾਡੇ ਦਿਲਾਂ ਵਿਚ ਹਮੇਸ਼ਾ ਰਹੋਗੇ।'' ਉੱਥੇ ਹੀ, ਗੁਰਦਾਸ ਮਾਨ ਨੇ ਮਰਹੂਮ ਗਾਇਕ ਦੀ ਤਸਵੀਰ ਸਾਂਝੀ ਕੀਤੀ ਅਤੇ ਹੱਥ ਜੋੜੇ ਹੋਏ ਇੱਕ ਇਮੋਟਿਕੌਨ ਨਾਲ ਲਿਖਿਆ, "ਸਫਰੀ ਸਾਬ੍ਹ"।
ਗਾਇਕ ਜੱਸੀ ਗਿੱਲ ਨੇ ਇੰਸਟਾਗ੍ਰਾਮ 'ਤੇ ਇੱਕ ਵੀਡੀਓ ਸਾਂਝੀ ਕੀਤੀ, ਜਿਸ ਵਿਚ ਉਹ ਤੇ ਬੱਬਲ ਰਾਏ ਬਲਵਿੰਦਰ ਸਫ਼ਰੀ ਨਾਲ ਨਜ਼ਰ ਆ ਰਹੇ ਹਨ। ਜੱਸੀ ਗਿੱਲ ਨੇ ਇਸ ਨੂੰ ਕੈਪਸ਼ਨ ਦਿੱਤਾ- "ਇਹ ਮੁਲਾਕਾਤ ਹਮੇਸ਼ਾ ਯਾਦ ਰਹੂਗੀ। ਵਾਹਿਗੁਰੂ ਆਪਣੇ ਚਰਨਾਂ ਵਿਚ ਨਿਵਾਸ ਬਖਸ਼ਣ"। ਸਫ਼ਰੀ ਭੰਗੜਾ ਸਟਾਰ ਵਜੋਂ ਜਾਣੇ ਜਾਂਦੇ ਸਨ। ਉਹ ਯੂ. ਕੇ. ਬੇਸਡ ਪੰਜਾਬੀ ਗਾਇਕ ਸਨ। ਸਫ਼ਰੀ 'ਓ ਚੰਨ ਮੇਰਾ ਮੱਖਣਾ', 'ਪਾਓ ਭੰਗੜਾ', 'ਗੱਲ ਸੁਣ ਕੁੜੀਏ' ਅਤੇ 'ਨੱਚਦੀ ਨੂੰ' ਵਰਗੇ ਪ੍ਰਸਿੱਧ ਟਰੈਕਾਂ ਨਾਲ ਮਸ਼ਹੂਰ ਹੋਏ ਸਨ।
