ਇਸ ਦੀਵਾਲੀ 'ਤੇ ਰਿਲੀਜ਼ ਹੋਵੇਗੀ ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਦੀ 'ਰਾਮ ਸੇਤੂ'

ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਦੀ ਫਿਲਮ ਰਾਮ ਸੇਤੂ ਦੀ ਰਿਲੀਜ਼ ਡੇਟ ਦਾ ਖੁਲਾਸਾ ਹੋ ਗਿਆ ਹੈ। ਇਹ ਫਿਲਮ ਇਸ ਦੀਵਾਲੀ 'ਤੇ ਸਿਨੇਮਾਘਰਾਂ ਵਿਚ ਆਉਣ ਵਾਲੀ ਹੈ।

ਰਿਲੀਜ਼ ਡੇਟ ਦਾ ਐਲਾਨ ਕਰਦੇ ਹੋਏ ਅਕਸ਼ੈ ਕੁਮਾਰ ਨੇ ਰਾਮ ਸੇਤੂ ਦਾ ਟੀਜ਼ਰ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਤੇ ਸ਼ੇਅਰ ਕੀਤਾ ਹੈ। ਟੀਜ਼ਰ ਵਿਚ ਅਕਸ਼ੈ ਇੱਕ ਪੁਰਾਤੱਤਵ ਵਿਗਿਆਨੀ ਦੇ ਰੂਪ ਵਿਚ ਦਿਖਾਈ ਦੇ ਰਹੇ ਹਨ, ਜੋ ਰਾਮ ਸੇਤੂ ਨੂੰ ਬੁਰੇ ਲੋਕਾਂ ਤੋਂ ਤਬਾਹ ਹੋਣ ਤੋਂ ਬਚਾਉਣ ਲਈ ਇੱਕ ਖਤਰਨਾਕ ਮਿਸ਼ਨ 'ਤੇ ਜਾਂਦੇ ਹਨ। ਟੀਜ਼ਰ ਵੀਡੀਓ ਵਿਚ ਜ਼ਿਆਦਾ ਕੁਝ ਨਹੀਂ ਦਿਖਾਇਆ ਗਿਆ ਹੈ ਪਰ ਇਸ ਵਿਚ ਅਡਵੈਂਚਰ ਖੂਬ ਦੇਖਣ ਨੂੰ ਮਿਲੇਗਾ।

ਟੀਜ਼ਰ ਵਿਚ ਨੁਸ਼ਰਤ ਭਰੂਚਾ ਨਹੀਂ ਹਨ, ਜਦੋਂ ਕਿ ਜੈਕਲੀਨ ਫਰਨਾਂਡੀਜ਼ ਦੀ ਇੱਕ ਹਲਕੀ ਝਲਕ ਨਜ਼ਰ ਆ ਰਹੀ ਹੈ। ਟੀਜ਼ਰ ਵਿਚ ਅਕਸ਼ੈ ਇਹ ਕਹਿੰਦੇ ਹੋਏ ਸੁਣੇ ਗਏ ਹਨ ਕਿ ਰਾਮ ਸੇਤੂ ਨੂੰ ਬਚਾਉਣ ਲਈ ਉਨ੍ਹਾਂ ਕੋਲ ਸਿਰਫ ਤਿੰਨ ਦਿਨ ਹਨ। ਫਿਲਮ ਦੀ ਝਲਕ ਸਾਂਝੀ ਕਰਦੇ ਹੋਏ ਉਨ੍ਹਾਂ ਲਿਖਿਆ, "ਰਾਮ ਸੇਤੂ ਦੀ ਪਹਿਲੀ ਝਲਕ... ਸਿਰਫ਼ ਤੁਹਾਡੇ ਲਈ। ਬਹੁਤ ਪਿਆਰ ਨਾਲ ਬਣਾਈ ਹੈ, ਉਮੀਦ ਹੈ ਤੁਹਾਨੂੰ ਪਸੰਦ ਆਵੇਗੀ 'ਰਾਮਸੇਤੂ'। ਇਹ 25 ਅਕਤੂਬਰ ਨੂੰ ਦੁਨੀਆ ਭਰ ਦੇ ਸਿਨੇਮਾਘਰਾਂ ਵਿਚ ਰਿਲੀਜ਼ ਹੋਵੇਗੀ।''