ਸਿੱਧੂ ਮੂਸੇਵਾਲਾ ਬਾਰੇ ਗਾਣਾ ਗਾਉਣ ਤੋਂ ਬਾਅਦ ਰੈਪਰ ਐਮੀਵੇਅ ਨੂੰ ਮਿਲੀ ਜਾਨੋ ਮਾਰਨ ਦੀ ਧਮਕੀ

ਲੋਕਪ੍ਰਿਅ ਰੈਪਰ ਮੁਹੰਮਦ ਬਿਲਾਲ ਸ਼ੇਖ ਜਿਸ ਨੂੰ ਕਿ ਐਮੀਵੇਅ ਬੰਤਾਈ ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ ਨੂੰ ਜਾਨੋ ਮਾਰਨ ਦੀ ਧਮਕੀ ਮਿਲੀ ਹੈ। ਇਸ ਦੇ ਨਾਲ ਹੀ ਉਸ ਤੋਂ 1 ਕਰੋੜ ਰੁਪਏ ਦੀ ਫਿਰੋਤੀ ਵੀ ਮੰਗੀ ਗਈ ਹੈ। ਇਹ ਧਮਕੀ ਉਸ ਨੂੰ ਗੋਲਡੀ ਬਰਾੜ ਵਲੋਂ ਭੇਜੀ ਗਈ ਜਿਹੜਾ ਕਿ ਲਾਰੈਂਸ ਬਿਸ਼ਨੋਈ ਨਾਲ ਸੰਬੰਧਤ ਹੈ। ਉਸ ਦੇ ਸੂਤਰਾਂ ਅਨੁਸਾਰ ਧਮਕੀ ਵਾਲੇ ਸੰਦੇਸ਼ ਵਿੱਚ ਬਿਸ਼ਨੋਈ ਦੇ ਇਕ ਹੋਰ ਵਿਦੇਸ਼ੀ ਸਹਿਯੋਗੀ ਰੋਹਿਤ ਗੋਦਾਰਾ ਦਾ ਵੀ ਨਾਮ ਵੀ ਸ਼ਾਮਲ ਹੈ।

ਰੈਪਰ ਨੂੰ ਇਹ ਸੰਦੇਸ਼ 25 ਮਈ ਨੂੰ ਮਿਲਿਆ ਸੀ, ਜਿਸ 'ਚ ਇਕ ਕਰੋੜ ਰੁਪਇਆ ਦੇਣ ਜਾਂ ਘਾਤਕ ਨਤੀਜੇ ਭੁਗਤਣ ਲਈ 24 ਘੰਟਿਆਂ ਦਾ ਸਮਾਂ ਦਿੱਤਾ ਗਿਆ। ਰੈਪਰ ਦੀ ਕੰਪਨੀ ਬੰਤਾਈ ਰਿਕਾਰਡਜ਼ ਦੇ ਰਜਿਸਟਰਡ ਨੰਬਰ 'ਤੇ ਭੇਜੇ ਸੰਦੇਸ਼ 'ਚ ਲਿਖਿਆ ਸੀ। "ਮੈਂ ਗੈਂਗਸਟਰ ਗੋਲਡੀ ਬਰਾੜ ਹਾਂ। ਤੁਹਾਡੇ ਗਾਇਕ ਕੋਲ 24 ਘੰਟੇ ਹਨ।ਮੈਨੂੰ 1 ਕਰੋੜ ਰੁਪਏ ਚਾਹੀਦੇ ਹਨ ਨਹੀਂ ਤਾਂ ਮੈਂ ਉਸਨੂੰ ਮਾਰ ਦੇਵਾਂਗਾ," ਜਦੋਂ ਇਕ ਕਰਮਚਾਰੀ ਨੇ ਇਹ ਸੰਦੇਸ਼ ਦੇਖਿਆ ਤਾਂ ਬਿਲਾਲ ਸ਼ੇਖ ਵਲੋਂ ਪੁਲਿਸ ਕੋਲ ਰਿਪੋਰਟ ਦਰਜ ਕਰਵਾ ਦਿੱਤੀ।

ਸਿੱਧੂ ਮੂਸੇਵਾਲਾ ਨੂੰ 2022 'ਚ ਗੋਲੀਆਂ ਮਾਰ ਕੇ ਮਾਰ ਦਿੱਤਾ ਗਿਆ ਸੀ ਅਤੇ ਉਸ ਦੇ ਕਤਲ ਦਾ ਮਾਸਟਰ ਮਾਈਂਡ ਬਿਸ਼ਨੋਈ ਜੇਲ਼੍ਹ 'ਚ ਹੈ ਜਦੋਂ ਕਿ ਬਰਾੜ ਨੇ ਇਸ ਵਾਰਦਾਤ ਦੀ ਜਨਤਕ ਜ਼ਿੰਮੇਵਾਰੀ ਕਬੂਲੀ ਸੀ। ਜ਼ਿਕਰਯੋਗ ਹੈ ਕਿ ਐਮੀਵੇਅ ਵਲੋਂ 26 ਮਈ ਨੂੰ ਸਿੱਧੂ ਮੂਸੇਵਾਲਾ ਨੂੰ ਸ਼ਰਧਾਂਜਲੀ ਦੇਣ ਸੰਬੰਧੀ ਇਕ ਗੀਤ ਜਾਰੀ ਕੀਤਾ ਗਿਆ ਹੈ। ਜਦੋਂ ਕਿ ਉਸ ਤੋਂ ਇਕ ਦਿਨ ਪਹਿਲਾਂ ਹੀ ਇਹ ਧਮਕੀ ਆ ਗਈ ਸੀ।