ਰਿਸ਼ਭ ਪੰਤ ਨੇ ਰੌਤੇਲਾ ਨੂੰ ਕਿਹਾ- ''ਪਿੱਛਾ ਛੱਡੋ ਭੈਣ', ਅੱਗੋਂ ਬਾਲੀਵੁੱਡ ਅਦਾਕਾਰਾ ਨੇ ਕੀਤਾ ਪਲਟਵਾਰ

ਬਾਲੀਵੁੱਡ ਅਦਾਕਾਰਾ ਉਰਵਸ਼ੀ ਰੌਤੇਲਾ ਅਤੇ ਕ੍ਰਿਕਟਰ ਰਿਸ਼ਭ ਪੰਤ ਵਿਚਕਾਰ ਤਕਰਾਰ ਵਧਦੀ ਦਿਖਾਈ ਦੇ ਰਹੀ ਹੈ। ਇੰਸਟਾਗ੍ਰਾਮ ਪੋਸਟਾਂ ਤੋਂ ਇਹੀ ਲੱਗਦਾ ਹੈ ਕਿ ਇਹ ਜਲਦ ਖ਼ਤਮ ਨਹੀਂ ਹੋਣ ਵਾਲੀ।

ਰਿਸ਼ਭ ਪੰਤ ਨੇ ਉਰਵਸ਼ੀ ਦੀ ਇੱਕ ਵਾਇਰਲ ਇੰਟਰਵਿਊ 'ਤੇ ਪਲਟਵਾਰ ਕੀਤਾ ਸੀ। ਜਿਸ ਵਿਚ ਉਰਵਸ਼ੀ ਨੇ ਇਸ਼ਾਰਿਆਂ ਵਿਚ ਕਿਹਾ ਸੀ ਕਿ ਇੱਕ ਖਾਸ 'ਆਰ. ਪੀ.' ਨੇ ਇੱਕ ਹੋਟਲ ਦੀ ਲਾਬੀ ਵਿਚ ਉਨ੍ਹਾਂ ਦਾ ਘੰਟਿਆਂ ਤੱਕ ਇੰਤਜ਼ਾਰ ਕੀਤਾ ਸੀ।

ਰਿਸ਼ਭ ਪੰਤ ਨੇ ਇਸ ਦਾ ਖੰਡਨ ਕਰਦੇ ਇੰਸਟਾਗ੍ਰਾਮ 'ਤੇ ਕਿਹਾ ਸੀ ਕਿ ਲੋਕ ਮਾਮੂਲੀ ਪ੍ਰਸਿੱਧੀ ਲਈ ਇੰਟਰਵਿਊ ਵਿਚ ਝੂਠ ਬੋਲਦੇ ਹਨ। ਇਸ ਪੋਸਟ ਨੂੰ ਉਨ੍ਹਾਂ ਨੇ ਕੁਝ ਘੰਟਿਆਂ ਬਾਅਦ ਡਿਲੀਟ ਕਰ ਦਿੱਤਾ। ਹੁਣ ਉਰਵਸ਼ੀ ਨੇ ਵੀ ਇੰਸਟਾਗ੍ਰਾਮ 'ਤੇ ਪਲਟਵਾਰ ਕੀਤਾ ਹੈ। ਰਿਸ਼ਬ ਪੰਤ ਵੱਲੋਂ ਕੀਤੀ ਟਿੱਪਣੀ ਨੂੰ ਲੈ ਕੇ ਉਨ੍ਹਾਂ ਇੰਸਟਾਗ੍ਰਾਮ 'ਤੇ ਇੱਕ ਲੰਮਾ ਨੋਟ ਲਿਖਿਆ ਹੈ, ਜਿਸ ਵਿਚ ਉਨ੍ਹਾਂ ਨੇ ਰਿਸ਼ਬ ਪੰਤ ਦੀ- 'ਮੇਰਾ ਪਿੱਛਾ ਛੱਡੋ ਭੈਣ' ਦੀ ਟਿੱਪਣੀ 'ਤੇ ਜਵਾਬ ਦਿੱਤਾ ਹੈ।

ਉਰਵਸ਼ੀ ਨੇ ਲਿਖਿਆ, "ਛੋਟੂ ਭਈਆ ਬੈਟ-ਬਾਲ ਖੇਡੋ....ਮੈਂ ਕੋਈ ਮੁੰਨੀ ਨਹੀਂ ਹਾਂ ਡਾਰਲਿੰਗ ਬੱਚੇ ਤੇਰੇ ਲਈ ਬਦਨਾਮ ਹੋਣ ਲਈ #ਰਕਸ਼ਾਬੰਧਨ ਮੁਬਾਰਕ ਹੋ।" ਉਨ੍ਹਾਂ ਅੱਗੇ ਹੋਰ ਹੈਸ਼ਟੇਗ ਪਾਉਂਦੇ ਲਿਖਿਆ-"ਆਰ. ਪੀ. ਛੋਟੂ ਭਈਆ, ਕੌਗਰ ਹੰਟਰ, ਇੱਕ ਚੁੱਪ ਕੁੜੀ ਦਾ ਫਾਇਦਾ ਨਾ ਉਠਾਓ"।

ਗੌਰਤਲਬ ਹੈ ਕਿ 2018 ਵਿਚ ਮੁੰਬਈ ਦੇ ਕਈ ਪ੍ਰਸਿੱਧ ਰੈਸਟੋਰੈਂਟਾਂ, ਪਾਰਟੀਆਂ ਤੇ ਸਮਾਗਮਾਂ ਵਿਚ ਦੋਵਾਂ ਨੂੰ ਇਕੱਠੇ ਦੇਖਣ ਤੋਂ ਬਾਅਦ ਇਹ ਅਫਵਾਹਾਂ ਉੱਡਣੀਆਂ ਸ਼ੁਰੂ ਹੋ ਗਈਆਂ ਸਨ ਕਿ ਦੋਵਾਂ ਵਿਚਕਾਰ ਕੁਝ ਚੱਲ ਰਿਹਾ ਹੈ। ਉਸੇ ਸਾਲ ਰਿਪੋਰਟਾਂ ਵਿਚ ਦਾਅਵਾ ਕੀਤਾ ਗਿਆ ਕਿ ਦੋਵਾਂ ਨੇ ਇੱਕ-ਦੂਜੇ ਨੂੰ ਵਟਸਐਪ 'ਤੇ ਬਲਾਕ ਕਰ ਦਿੱਤਾ ਹੈ। ਜਨਵਰੀ 2019 ਵਿਚ ਰਿਸ਼ਭ ਪੰਤ ਨੇ ਇਨ੍ਹਾਂ ਦਾ ਖੰਡਨ ਕੀਤਾ ਅਤੇ ਕਿਹਾ ਕਿ ਉਹ ਆਪਣੀ ਗਰਲਫ੍ਰੈਂਡ ਈਸ਼ਾ ਨਾਗੀ ਨਾਲ ਰਿਸ਼ਤੇ ਵਿਚ ਹਨ। ਉਨ੍ਹਾਂ ਈਸ਼ਾ ਨਾਗੀ ਨਾਲ ਇੰਸਟਾਗ੍ਰਾਮ 'ਤੇ ਫੋਟੋ ਵੀ ਸਾਂਝੀ ਕੀਤੀ ਸੀ।

ਗੌਰਤਲਬ ਹੈ ਕਿ ਹਾਲ ਹੀ ਵਿਚ ਉਰਵਸ਼ੀ ਨੇ ਇੱਕ ਪੋਰਟਲ ਨੂੰ ਇੰਟਰਵਿਊ ਦਿੱਤਾ, ਜਿਸ ਦੀ ਕਲਿੱਪ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਈ ਹੈ। ਇੰਟਰਵਿਊ ਵਿਚ ਉਰਵਸ਼ੀ ਨੇ ਕਿਹਾ ਕਿ ਇੱਕ "ਮਿਸਟਰ ਆਰ. ਪੀ." ਨੇ ਉਸ ਨੂੰ ਮਿਲਣ ਲਈ ਇੱਕ ਹੋਟਲ ਦੀ ਲਾਬੀ ਵਿਚ ਲਗਭਗ 10 ਘੰਟੇ ਤੱਕ ਇੰਤਜ਼ਾਰ ਕੀਤਾ।" ਉਰਵਸ਼ੀ ਨੇ ਕਿਹਾ ਕਿ ਉਸ ਵਕਤ ਉਹ ਨੀਂਦ ਲੈ ਰਹੀ ਸੀ ਅਤੇ ਇੰਨਾ ਲੰਮਾ ਇੰਤਜ਼ਾਰ ਕਰਾਉਣਾ ਉਨ੍ਹਾਂ ਨੂੰ ਬੁਰਾ ਲੱਗਿਆ।