ਫਿਲਮ ‘ਓ ਰੋਮੀਓ’ ਵਿੱਚ ਸ਼ਾਹਿਦ ਕਪੂਰ ਵੱਖਰੇ ਅੰਦਾਜ਼ ਵਿੱਚ ਆਉਣਗੇ ਨਜ਼ਰ

ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਸ਼ਾਹਿਦ ਕਪੂਰ ਅਤੇ ਨਿਰਦੇਸ਼ਕ ਵਿਸ਼ਾਲ ਭਾਰਦਵਾਜ ਦੀ ਸੁਪਰਹਿੱਟ ਜੋੜੀ ਇੱਕ ਵਾਰ ਫਿਰ ਪਰਦੇ 'ਤੇ ਵੱਡਾ ਧਮਾਕਾ ਕਰਨ ਲਈ ਤਿਆਰ ਹੈ। ਸ਼ਾਹਿਦ ਦੀ ਬਹੁ-ਪ੍ਰਤੀਖਿਆਿਤ ਫਿਲਮ ‘ਓ ਰੋਮੀਓ’ ਦਾ ਅਧਿਕਾਰਤ ਟੀਜ਼ਰ ਰਿਲੀਜ਼ ਕਰ ਦਿੱਤਾ ਗਿਆ ਹੈ, ਜਿਸ ਵਿੱਚ ਸ਼ਾਹਿਦ ਦਾ ਬਿਲਕੁਲ ਵੱਖਰਾ ਅਤੇ ਖੂੰਖਾਰ ਅੰਦਾਜ਼ ਦੇਖਣ ਨੂੰ ਮਿਲ ਰਿਹਾ ਹੈ।

1 ਮਿੰਟ 35 ਸਕਿੰਟ ਦੇ ਇਸ ਟੀਜ਼ਰ ਦੀ ਸ਼ੁਰੂਆਤ ਇੱਕ ਕਰੂਜ਼ ਤੋਂ ਹੁੰਦੀ ਹੈ, ਜਿੱਥੇ ਸ਼ਾਹਿਦ ਕਪੂਰ ਸਿਰ 'ਤੇ ਹੈਟ ਲਗਾਏ ਸ਼ਰਟਲੈੱਸ ਅੰਦਾਜ਼ ਵਿੱਚ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਦੇ ਪੂਰੇ ਸਰੀਰ 'ਤੇ ਬਣੇ ਕਈ ਤਰ੍ਹਾਂ ਦੇ ਟੈਟੂ ਅਤੇ ਹੱਥ ਵਿੱਚ ਫੜੀ ਬੰਦੂਕ ਦਰਸ਼ਕਾਂ ਵਿੱਚ ਉਤਸੁਕਤਾ ਵਧਾ ਰਹੀ ਹੈ। ਟੀਜ਼ਰ ਵਿੱਚ ਸ਼ਾਹਿਦ ਨੂੰ ਗੋਲੀਆਂ ਚਲਾਉਂਦੇ, ਖੂਨ ਵਹਾਉਂਦੇ ਅਤੇ ਅੰਤ ਵਿੱਚ ਰੋਮਾਂਟਿਕ ਅੰਦਾਜ਼ ਵਿੱਚ ਵੀ ਦਿਖਾਇਆ ਗਿਆ ਹੈ।

ਬੈਕਗ੍ਰਾਊਂਡ ਵਿੱਚ ਵੱਜ ਰਿਹਾ ਰੇਟਰੋ ਸੰਗੀਤ ਫਿਲਮ ਨੂੰ ਇੱਕ ਖ਼ਾਸ ਮਾਹੌਲ ਪ੍ਰਦਾਨ ਕਰ ਰਿਹਾ ਹੈ।ਇਸ ਫਿਲਮ ਵਿੱਚ ਸਿਰਫ਼ ਸ਼ਾਹਿਦ ਹੀ ਨਹੀਂ, ਬਲਕਿ ਬਾਲੀਵੁੱਡ ਦੇ ਕਈ ਹੋਰ ਵੱਡੇ ਚਿਹਰੇ ਵੀ ਆਪਣੀ ਅਦਾਕਾਰੀ ਦਾ ਜੌਹਰ ਦਿਖਾਉਣਗੇ। ਟੀਜ਼ਰ ਵਿੱਚ ਨਾਨਾ ਪਾਟੇਕਰ, ਤ੍ਰਿਪਤੀ ਡਿਮਰੀ, ਤਮੰਨਾ ਭਾਟੀਆ, ਦਿਸ਼ਾ ਪਾਟਨੀ, ਅਵਿਨਾਸ਼ ਤਿਵਾਰੀ ਅਤੇ ਫਰੀਦਾ ਜਲਾਲ ਦੀ ਝਲਕ ਵੀ ਦੇਖਣ ਨੂੰ ਮਿਲਦੀ ਹੈ। ਹਾਲਾਂਕਿ ਸ਼ਾਹਿਦ ਤੋਂ ਇਲਾਵਾ ਸਿਰਫ਼ ਫਰੀਦਾ ਜਲਾਲ ਅਤੇ ਨਾਨਾ ਪਾਟੇਕਰ ਦੇ ਹੀ ਡਾਇਲਾਗ ਸੁਣਾਈ ਦਿੰਦੇ ਹਨ।