ਸੁਸ਼ਾਂਤ ਸਿੰਘ ਦੀ ਫੋਟੋ ਵਾਲੀ ਟੀ-ਸ਼ਰਟ ਨੂੰ ਲੈ ਕੇ ਟਵਿੱਟਰ 'ਤੇ 'ਬਾਇਕਾਟ ਫਲਿੱਪਕਾਰਟ' ਹੋਇਆ ਟ੍ਰੈਂਡ

ਬਾਲੀਵੁੱਡ ਅਭਿਨੇਤਾ ਸੁਸ਼ਾਂਤ ਸਿੰਘ ਰਾਜਪੂਤ ਦੇ ਪ੍ਰਸ਼ੰਸਕਾਂ ਨੇ ਟਵਿੱਟਰ 'ਤੇ ਫਲਿੱਪਕਾਰਟ ਖਿਲਾਫ਼ ਬਾਇਕਾਟ ਮੁਹਿੰਮ ਛੇੜ ਦਿੱਤੀ ਹੈ। ਈ-ਕਾਮਰਸ ਸਾਈਟ ਵੱਲੋਂ ਸੁਸ਼ਾਂਤ ਸਿੰਘ ਦੀ ਫੋਟੋ ਦੀ ਦੁਰਵਰਤੋਂ ਕਰਨ ਦੇ ਮੱਦੇਨਜ਼ਰ ਇਹ ਮਾਮਲਾ ਭਖਿਆ ਹੈ।

ਦਰਅਸਲ, ਈ-ਕਾਮਰਸ ਸਾਈਟ 'ਤੇ ਸੁਸ਼ਾਂਤ ਸਿੰਘ ਦੀ ਫੋਟੋ ਵਾਲੀ ਟੀ-ਸ਼ਰਟ 'ਤੇ 'ਡਿਪਰੈਸ਼ਨ' ਦੇ ਸੰਦਰਭ ਨਾਲ ਲਿਖੀ ਗਈ ਇੱਕ ਟਿੱਪਣੀ ਦੇਖਣ ਤੋਂ ਬਾਅਦ ਟਵਿੱਟਰ 'ਤੇ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੇ 'ਬਾਈਕਾਟ ਫਲਿੱਪਕਾਰਟ' ਹੈਸ਼ਟੈਗ ਨੂੰ ਜਮ ਕੇ ਟ੍ਰੈਂਡ ਕੀਤਾ।

ਫਲਿੱਪਕਾਰਟ 'ਤੇ ਵਿਕਰੀ ਲਈ ਲਿਸਟ ਕੀਤੀ ਗਈ ਸੁਸ਼ਾਂਤ ਦੀ ਫੋਟੋ ਵਾਲੀ ਟੀ-ਸ਼ਰਟ 'ਤੇ "ਡਿਪਰੈਸ਼ਨ ਇਜ਼ ਲਾਈਕ ਡ੍ਰੋਨਇੰਗ" ਯਾਨੀ 'ਨਿਰਾਸ਼ਾ ਡੁੱਬਣ ਵਾਂਗ ਹੈ' ਲਿਖਿਆ ਹੋਇਆ ਸੀ। ਇਸ ਨੂੰ ਦੇਖਣ ਤੋਂ ਤੁਰੰਤ ਬਾਅਦ ਸੁਸ਼ਾਂਤ ਸਿੰਘ ਦੇ ਪ੍ਰਸ਼ੰਸਕਾਂ ਨੇ ਇਸ ਨੂੰ ਸੋਸ਼ਲ ਮੀਡੀਆ 'ਤੇ ਸਾਂਝਾ ਕੀਤਾ ਅਤੇ "ਫਲਿੱਪਕਾਰਟ ਦਾ ਬਾਈਕਾਟ ਕਰੋ" ਨੇ ਤੂਲ ਫੜ੍ਹ ਲਿਆ।

ਕਈ ਲੋਕਾਂ ਨੇ ਲੇਬਲ ਨੂੰ ਹਟਾਉਣ ਦੀ ਮੰਗ ਕੀਤੀ। ਉੱਥੇ ਹੀ, ਕੁਝ ਨੇ ਟੀ-ਸ਼ਰਟ ਨੂੰ ਸਾਈਟ 'ਤੇ ਲਿਸਟ ਕਰਨ ਅਤੇ ਇਸ ਦੀ ਮਾਰਕੀਟਿੰਗ ਕਰਨ ਲਈ ਫਲਿੱਪਕਾਰਟ ਦੀ ਆਲੋਚਨਾ ਵੀ ਕੀਤੀ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਟੀ-ਸ਼ਰਟ ਨੂੰ ਇੱਥੋਂ ਜਲਦ ਤੋਂ ਜਲਦ ਹਟਾਇਆ ਜਾਵੇ।