ਫਿਲਮਫੇਅਰ ਐਵਾਰਡਜ਼ ਦੇ ਜਸ਼ਨ 'ਚ ਸਿੱਧੂ ਮੂਸੇਵਾਲਾ ਦੇ ਗਾਣੇ 'ਤੇ ਥਿਰਕੇ ਵਿੱਕੀ ਕੌਸ਼ਲ, ਰਣਵੀਰ ਸਿੰਘ

30 ਅਗਸਤ ਨੂੰ ਮੁੰਬਈ ਦੇ ਜੀਓ ਵਰਲਡ ਕਨਵੈਨਸ਼ਨ ਸੈਂਟਰ ਵਿਚ 67ਵੇਂ ਫਿਲਮਫੇਅਰ ਐਵਾਰਡਸ ਦਾ ਆਯੋਜਨ ਕੀਤਾ ਗਿਆ। ਇਸ ਵਿਚ ਅਦਾਕਾਰ ਵਿੱਕੀ ਕੌਸ਼ਲ ਨੂੰ ਆਪਣੀ ਫਿਲਮ 'ਸਰਦਾਰ ਊਧਮ' ਲਈ ਸਰਵੋਤਮ ਅਦਾਕਾਰ 'ਕ੍ਰਿਟਿਕਸ' ਦਾ ਪੁਰਸਕਾਰ ਮਿਲਿਆ, ਜਦੋਂ ਕਿ ਰਣਵੀਰ ਸਿੰਘ ਨੂੰ '83' ਲਈ ਬੈਸਟ ਐਕਟਰ ਦੇ ਐਵਾਰਡ ਨਾਲ ਨਿਵਾਜੇ ਗਏ।

ਪੁਰਸਕਾਰ ਨਾਲ ਸਨਮਾਨਿਤ ਹੋਣ ਮਗਰੋਂ ਦੋਵੇਂ ਸਿਤਾਰੇ ਮਰਹੂਮ ਗਾਇਕ ਸਿੱਧੂ ਮੂਸੇਵਾਲਾ ਦੇ ਗਾਣੇ 'ਤੇ ਥਿਰਕਦੇ ਨਜ਼ਰ ਆਏ, ਜਿਸ ਦੀ ਵੀਡੀਓ ਇੰਟਰਨੈਟ 'ਤੇ ਧੂਮ ਮਚਾ ਰਹੀ ਹੈ। ਦੋਵੇਂ ਅਦਾਕਾਰਾਂ ਨੂੰ ਜਿੱਤ ਤੋਂ ਬਾਅਦ ਸਿੱਧੂ ਮੂਸੇਵਾਲਾ ਦੇ ਗਾਣੇ 'ਗਬਰੂ' 'ਤੇ ਨੱਚਦੇ ਹੋਏ ਖੁਸ਼ੀ ਦਾ ਜਸ਼ਨ ਮਨਾਉਂਦੇ ਦੇਖਿਆ ਜਾ ਸਕਦਾ ਹੈ। ਰਣਵੀਰ ਸਿੰਘ ਲਾਲ ਰੰਗ ਦੇ ਪਹਿਰਾਵੇ ਵਿਚ ਸ਼ਾਨਦਾਰ ਦਿਖਾਈ ਦੇ ਰਹੇ ਹਨ, ਜਦੋਂ ਕਿ ਵਿੱਕੀ ਕਾਲੇ ਰੰਗ ਦੇ ਪਹਿਰਾਵੇ ਵਿਚ ਠਾਠ-ਬਾਠ ਦਿਸ ਰਹੇ ਹਨ।

ਅਦਾਕਾਰਾ ਦੀਪਿਕਾ ਪਾਦੁਕੋਣ ਅਤੇ ਬੈਸਟ ਫੀਮੈਲ ਐਕਟਰ ਦੀ ਜੇਤੂ ਕ੍ਰਿਤੀ ਸੈਨਨ ਨੂੰ ਵੀ ਬੈਕਸਟੇਜ 'ਤੇ ਉਨ੍ਹਾਂ ਦੀ ਪ੍ਰਫੋਰਮੈਂਸ ਦਾ ਆਨੰਦ ਲੈਂਦੇ ਦੇਖਿਆ ਜਾ ਸਕਦਾ ਹੈ।