ਮੈਨੂੰ ਨਹੀਂ ਪਤਾ ਕਿ ਦੋਹਾਂ ’ਚ ਪਿਆਰ ਸੀ: ਸੁੱਖ ਸੰਘੇੜਾ

ਪੰਜਾਬੀ ਸਿਨੇਮਾ ਦੇ ਨਿਰਦੇਸ਼ਕ ਸੁੱਖ ਸੰਘੇੜਾ ਇਨ੍ਹੀਂ ਦਿਨੀਂ ਆਪਣੀ ਆਉਣ ਵਾਲੀ ਫ਼ਿਲਮ ‘ਗੋਰਿਆਂ ਨਾਲ ਲੱਗਦੀ ਜ਼ਮੀਨ ਜੱਟ ਦੀ’ ਨੂੰ ਲੈ ਕੇ ਕਾਫ਼ੀ ਰੁਝੇ ਹੋਏ ਹਨ। ਕੁਨੈਕਟ ਮੀਡੀਆ ਨੈੱਟਵਰਕ ਨਾਲ ਵਿਸ਼ੇਸ਼ ਗੱਲਬਾਤ ’ਚ ਉਸ ਨੇ ਆਪਣੀ ਫ਼ਿਲਮ ਸੰਬੰਧੀ ਕਈ ਗੱਲਾਂ ਸਾਂਝੀਆਂ ਕੀਤੀਆਂ ਅਤੇ ਇਹ ਵੀ ਜ਼ਿਕਰ ਕੀਤਾ ਕਿ ਫ਼ਿਲਮ ’ਚ ਪੰਜਾਬੀ ਗਾਇਕ ਗੈਰੀ ਸੰਧੂ ਅਤੇ ਜੈਸਮੀਨ ਸੈਂਡਲਾਸ ਦੀ ਜੋੜੀ ਨੇ ਮੁੱਖ ਭੂਮਿਕਾਵਾਂ ਨਿਭਾਈਆਂ ਹਨ। ਫ਼ਿਲਮ ਦੇ ਸੈੱਟ ’ਤੇ ਦੋਹਾਂ ਨਾਲ ਹੋਏ ਤਜ਼ਰਬੇ ਸੰਬੰਧੀ ਵੀ ਸੁੱਖ ਸੰਘੇੜਾ ਨੇ ਬਹੁਤ ਕੁਝ ਸਾਂਝਾ ਕੀਤਾ।

ਸੁੱਖ ਨੇ ਦੱਸਿਆ ਕਿ ਉਸ ਨੇ ਗੈਰੀ ਵਾਸਤੇ ਕਈ ਗੀਤਾਂ ਦੀ ਰਚਨਾ ’ਚ ਸਹਿਯੋਗ ਕੀਤਾ ਹੈ। ਭਾਵੇਂ ਕਿ ਉਸ ਨੇ ਮਜ਼ਾਕ ’ਚ ਇਹ ਵੀ ਕਿਹਾ ਕਿ ਗੈਰੀ ਨੂੰ ਹੁਣ ਗੱਲਾਂ ਯਾਦ ਨਹੀਂ। ‘ਗੋਰਿਆਂ ਨਾਲ ਲੱਗਦੀ ਜ਼ਮੀਨ ਜੱਟ ਦੀ’ ਦੇ ਪ੍ਰੋਜੈਕਟ ਸੰਬੰਧੀ ਵੀ ਉਸ ਨੇ ਜ਼ਿਕਰ ਕੀਤਾ ਕਿ ਗੈਰੀ ਅਤੇ ਜੈਸਮੀਨ ਨੇ ਇਸ ਵਿੱਚ ਵਧੀਆ ਢੰਗ ਨਾਲ ਕੰਮ ਕੀਤਾ ਹੈ।

ਜੈਸਮੀਨ ਕਾਫ਼ੀ ਦਲੇਰ ਹੈ ਅਤੇ ਮਜ਼ਬੂਤ ਇੱਛਾ ਸ਼ਕਤੀ ਵਾਲੀ ਸ਼ਖ਼ਸੀਅਤ ਹੈ। ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਜਦੋਂ ਉਹ ਇੱਥੇ ਹੁੰਦੇ ਸਨ ਤਾਂ ਉਨ੍ਹਾਂ ’ਚ ਰੋਮਾਂਟਿਕ ਭਾਵਨਾਵਾਂ ਦਾ ਅਦਾਨ-ਪ੍ਰਦਾਨ ਵੀ ਹੁੰਦਾ ਸੀ ਤਾਂ ਸੁੱਖ ਨੇ ਸਪੱਸ਼ਟ ਕਿਹਾ ਕਿ ਇਮਾਨਦਾਰੀ ਨਾਲ ਮੈਂ ਕਹਿ ਸਕਦਾ ਹਾਂ ਕਿ ਮੈਨੂੰ ਇਸ ਬਾਰੇ ਕੁਝ ਨਹੀਂ ਪਤਾ ਕਿ ਉਨ੍ਹਾਂ ’ਚ ਪਿਆਰ ਵਰਗੀ ਕੋਈ ਗੱਲ ਹੈ।