News

ਕੈਨੇਡਾ ਦੇ ਇਤਿਹਾਸ ਵਿਚ ਟੋਰੌਂਟੋ ਏਅਰਪੋਰਟ 'ਤੇ ਹੋਈ ਸੋਨੇ ਦੀ ਸਭ ਤੋਂ ਵੱਡੀ ਚੋਰੀ ਦੇ ਮਾਮਲੇ ਵਿਚ ਨਾਮਜ਼ਦ ਬ੍ਰੈਂਪਟਨ ਦੇ 56 ਸਾਲਾ ਪਰਮਪਾਲ ਸਿੱਧੂ ਅਤੇ 39 ਸਾਲਾ ਅਰਚਿਤ ਗਰੋਵਰ ਦੇ ਟ੍ਰਾਇਲ ਨੂੰ ਇੱਕ-ਦੂਜੇ ਤੋਂ ਵੱਖ ਕਰ ਦਿੱਤਾ ਗਿਆ ਹੈ, ਪਹਿਲਾਂ ਉਨ੍ਹਾਂ ਦਾ ਇੱਕੋ ਸਾਂਝਾ ਜਿਊਰੀ Trial ਹੋਣਾ ਸੀ। ਓਨਟਾਰੀਓ ਕੋਰਟ ਦੀ ਜੱਜ ਨੈਨਸੀ ਡੈਨਿਸਨ ਨੇ ਗਰੋਵਰ ਦੇ ਵਕੀਲ ਦੀ ਅਪੀਲ 'ਤੇ ਦੋਵਾਂ ਦੇ ਮੁਕੱਦਮਿਆਂ ਨੂੰ ਵੱਖ ਕਰਨ ਦੀ ਮਨਜ਼ੂਰੀ ਦਿੱਤੀ।

ਐਲਬਰਟਾ ਦੇ ਆਉਣ ਵਾਲੇ ਰੈਫਰੈਂਡਮ ਲਈ ਮੇਲ-ਇਨ ਬੈਲਟ ਦੀ ਅਰਜ਼ੀ ਦੇਣ ਦੀ ਆਖ਼ਰੀ ਮਿਤੀ ਅੱਜ ਰਾਤ ਹੈ। ਇਲੈਕਸ਼ਨ ਐਲਬਰਟਾ ਵੱਲੋਂ ਅੱਜ ਅੱਧੀ ਰਾਤ ਤੱਕ ਹੀ ਮੇਲ-ਇਨ ਬੈਲਟ ਲਈ ਅਰਜ਼ੀਆਂ ਸਵੀਕਾਰ ਕੀਤੀਆਂ ਜਾਣਗੀਆਂ। ਇਨ੍ਹਾਂ ਬੈਲਟ ਪੇਪਰਾਂ ਨੂੰ ਵਾਪਸ ਜਮ੍ਹਾਂ ਕਰਵਾਉਣ ਜਾਂ ਭੇਜਣ ਦੀ ਸਮਾਂ-ਸੀਮਾ 16 ਅਕਤੂਬਰ ਸ਼ਾਮ 5 ਵਜੇ ਤੱਕ ਤੈਅ ਕੀਤੀ ਗਈ ਹੈ।

ਬੀ.ਸੀ. ਦੇ ਟੰਬਲਰ ਰਿਜ ਵਿਚ ਹੋਈ Mass ਸ਼ੂਟਿੰਗ ਦੇ ਹਮਲਾਵਰ ਦੀ ਚੈਟਜੀਪੀਟੀ ਹਿਸਟਰੀ ਨੂੰ ਲੈ ਕੇ ਅਮਰੀਕਾ ਦੀ ਮੈਗਜ਼ੀਨ ਮਦਰ ਜੋਨਸ ਨੇ ਕਈ ਖੁਲਾਸੇ ਕੀਤੇ ਹਨ। ਰਿਪੋਰਟ ਮੁਤਾਬਕ, 18 ਸਾਲਾ ਜੈਸੀ ਵੈਨ ਰੂਟਸਲਾਰ ਨੂੰ ਚੈਟਜੀਪੀਟੀ ਨੇ ਨਾ ਸਿਰਫ਼ ਕਲਾਸਰੂਮ ਵਰਗੀ ਭੀੜ ਵਾਲੀ ਥਾਂ 'ਤੇ ਸ਼ੌਟਗਨ ਦੇ ਘਾਤਕ ਪ੍ਰਭਾਵਾਂ ਬਾਰੇ ਵਿਸਥਾਰ ਵਿਚ ਦੱਸਿਆ ਬਲਕਿ ਇਹ ਵੀ ਸਿਖਾਇਆ ਕਿ ਉਹ ਆਪਣੀ ਹਿੰਸਕ ਯੋਜਨਾ ਨੂੰ ਕਾਲਪਨਿਕ scenario ਦੇ ਰੂਪ ਵਿਚ ਪੇਸ਼ ਕਰਕੇ ਏ.ਆਈ. ਦੇ ਸੁਰੱਖਿਆ ਨਿਯਮਾਂ ਨੂੰ ਕਿਵੇਂ ਬਾਈਪਾਸ ਕਰ ਸਕਦਾ ਹੈ।

ਬੀ.ਸੀ. ਚੋਣਾਂ ਵਿਚ ਦੋ ਅਜਿਹੇ ਉਮੀਦਵਾਰ ਮੈਦਾਨ ਵਿਚ ਉਤਰ ਸਕਦੇ ਹਨ ਜੋ ਗੰਭੀਰ ਅਪਰਾਧਿਕ ਮਾਮਲਿਆਂ ਦਾ ਸਾਹਮਣਾ ਕਰ ਰਹੇ ਹਨ। ਪੀਸ ਰਿਵਰ ਨੌਰਥ ਤੋਂ ਸਾਬਕਾ ਬੀਸੀ ਕੰਜ਼ਰਵੇਟਿਵ ਵਿਧਾਇਕ ਜੌਰਡਨ ਕੇਲੀ ਇੰਡੀਪੈਂਡੈਂਟ ਵਜੋਂ ਮੁੜ ਚੋਣ ਲੜਨ ਦੀ ਪਹਿਲਾਂ ਹੀ ਪੁਸ਼ਟੀ ਕਰ ਚੁੱਕੇ ਹਨ। ਉਨ੍ਹਾਂ ਨੂੰ ਜੂਨ ਵਿਚ sexual assault ਦੇ ਦੋਸ਼ ਨਾਲ ਚਾਰਜ ਕੀਤਾ ਗਿਆ ਸੀ, ਜੋ ਸਾਲ 2024 ਵਿਚ ਉਨ੍ਹਾਂ ਦੇ ਐਮ.ਐਲ.ਏ. ਬਣਨ ਤੋਂ ਪਹਿਲਾਂ ਦੇ ਸਮੇਂ ਨਾਲ ਸਬੰਧਤ ਸਨ। ਕੇਲੀ ਖ਼ੁਦ ਨੂੰ ਬੇਕਸੂਰ ਦੱਸਦੇ ਹਨ ਅਤੇ ਅਜੇ ਇਸ ਮਾਮਲੇ ਵਿਚ ਟ੍ਰਾਇਲ ਸ਼ੁਰੂ ਨਹੀਂ ਹੋਇਆ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਕੈਨੇਡਾ 'ਤੇ ਸੰਭਾਵੀ ਹਮਲੇ ਦੇ ਜਤਾਏ ਖ਼ਦਸ਼ੇ 'ਤੇ ਵ੍ਹਾਈਟ ਹਾਊਸ ਨੇ ਪਲਟਵਾਰ ਕੀਤਾ ਹੈ। ਵ੍ਹਾਈਟ ਹਾਊਸ ਦੀ ਪ੍ਰਮੁੱਖ ਡਿਪਟੀ ਪ੍ਰੈੱਸ ਸਕੱਤਰ ਐਨਾ ਕੈਲੀ ਦਾ ਕਹਿਣਾ ਹੈ ਕਿ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਕੈਨੇਡਾ ਨੂੰ ਪ੍ਰੋਟੈਕਟ ਕਰਨ ਲਈ ਕਿਸੇ ਵੀ ਹੋਰ ਲੀਡਰ ਨਾਲੋਂ ਸਭ ਤੋਂ ਵੱਧ ਕੰਮ ਕੀਤਾ ਹੈ ਅਤੇ ਪ੍ਰਧਾਨ ਮੰਤਰੀ ਕਾਰਨੀ ਨੂੰ ਇਸ ਦਾ ਸ਼ੁਕਰਗੁਜ਼ਾਰ ਹੋਣਾ ਚਾਹੀਦਾ ਹੈ।