21.3C Vancouver 21.3C VancouverJul 9, 2026 5:18 PM - Connect Newsroom - Jasmine Singh with files from The Canadian Press
ਬੀ. ਸੀ. ਵਿਚ ਗੈਰ-ਨਿਯੰਤ੍ਰਿਤ ਦਵਾਈਆਂ ਕਾਰਨ ਮਈ ਵਿਚ 109 ਲੋਕਾਂ ਦੀਆਂ ਮੌਤਾਂ ਹੋਈਆਂ ਹਨ, ਯਾਨੀ ਰੋਜ਼ਾਨਾ ਔਸਤਨ 3.5 ਲੋਕਾਂ ਨੇ ਨਸ਼ੇ ਕਾਰਨ ਜਾਨ ਗੁਆਈ ਹੈ। ਕੋਰੋਨਰ ਸਰਵਿਸਸ ਡਿਪਾਰਟਮੈਂਟ ਦੇ ਅੰਕੜਿਆਂ ਮੁਤਾਬਕ, ਫਰਵਰੀ 2020 ਵਿਚ ਦਰਜ ਹੋਈਆਂ 79 ਮੌਤਾਂ ਤੋਂ ਬਾਅਦ ਇਹ ਕਿਸੇ ਇੱਕ ਮਹੀਨੇ ਵਿਚ ਗੈਰ-ਨਿਯੰਤ੍ਰਿਤ ਦਵਾਈਆਂ ਕਾਰਨ ਮੌਤਾਂ ਦੀ ਸਭ ਤੋਂ ਘੱਟ ਗਿਣਤੀ ਹੈ।
ਸਰਕਾਰ ਮੁਤਾਬਕ, ਸਾਲ 2026 ਦੇ ਪਹਿਲੇ ਪੰਜ ਮਹੀਨਿਆਂ ਵਿਚ ਨਸ਼ੇ ਕਾਰਨ ਹੋਈਆਂ ਕੁੱਲ ਮੌਤਾਂ ਵਿਚੋਂ 68 ਫੀਸਦੀ ਲੋਕ 30 ਤੋਂ 59 ਸਾਲ ਦੀ ਉਮਰ ਦੇ ਸਨ ਅਤੇ ਇਹਨਾਂ ਵਿਚੋਂ 76 ਫੀਸਦੀ ਪੁਰਸ਼ ਸਨ। ਅੰਕੜਿਆਂ ਮੁਤਾਬਕ, ਕੁੱਲ ਮੌਤਾਂ ਵਿਚੋਂ 53 ਫੀਸਦੀ ਵੈਨਕੂਵਰ ਕੋਸਟਲ ਅਤੇ ਫਰੇਜ਼ਰ ਹੈਲਥ ਅਥਾਰਿਟੀ ਵਿਚ ਹੋਈਆਂ ਹਨ, ਇੱਥੇ ਕ੍ਰਮਵਾਰ 169 ਅਤੇ 166 ਲੋਕਾਂ ਨੇ ਜਾਨ ਗੁਆਈ ਹੈ। ਇਨ੍ਹਾਂ ਵਿਚੋਂ 81 ਫੀਸਦੀ ਮੌਤਾਂ ਨਿੱਜੀ ਘਰਾਂ, ਸ਼ੈਲਟਰਾਂ ਜਾਂ ਸਪੋਰਟਿਵ ਹਾਊਸਿੰਗ ਵਰਗੀਆਂ ਥਾਵਾਂ 'ਤੇ ਹੋਈਆਂ, ਜਦੋਂ ਕਿ 18 ਫੀਸਦੀ ਗੱਡੀਆਂ, ਸੜਕਾਂ ਜਾਂ ਪਾਰਕਾਂ ਵਰਗੇ ਖੁੱਲ੍ਹੇ ਸਥਾਨਾਂ 'ਤੇ ਮ੍ਰਿਤਕ ਪਾਏ ਗਏ ਸਨ।
ਜਾਂਚ ਦੌਰਾਨ ਮ੍ਰਿਤਕਾਂ ਦੇ ਸਰੀਰ ਵਿਚ ਮੁੱਖ ਤੌਰ 'ਤੇ fluorofentanyl, ਕੋਕੇਨ, ਫੈਂਟਾਨਿਲ ਅਤੇ ਮੈਥਾਮਫੇਟਾਮਾਈਨ ਵਰਗੇ ਘਾਤਕ ਨਸ਼ੀਲੇ ਪਦਾਰਥਾਂ ਦੀ ਪੁਸ਼ਟੀ ਹੋਈ। ਕੋਰੋਨਰ ਸਰਵਿਸ ਮੁਤਾਬਕ, ਇਹ ਰਿਪੋਰਟ ਫਿਲਹਾਲ ਸ਼ੁਰੂਆਤੀ ਹੈ ਅਤੇ ਅੰਤਿਮ ਨਤੀਜੇ ਆਉਣ ਤੋਂ ਬਾਅਦ ਇਸ ਵਿਚ ਬਦਲਾਅ ਹੋ ਸਕਦਾ ਹੈ।
