ਆਰ.ਸੀ.ਐਮ.ਪੀ ਨੇ ਮਨੁੱਖੀ ਤਸਕਰੀ ਦੀ ਲੰਮੀ ਜਾਂਚ ਮਗਰੋਂ ਪਿਓ-ਪੁੱਤਰ ਨੂੰ ਕੀਤਾ ਗ੍ਰਿਫਤਾਰ

ਐਲਬਰਟਾ ਆਰ.ਸੀ.ਐਮ.ਪੀ ਨੇ ਉੱਤਰ-ਪੱਛਮੀ ਐਡਮਿੰਟਨ ਦੇ ਨੇੜੇ ਮਨੁੱਖੀ ਤਸਕਰੀ ਦੀ ਲੰਮੀ ਜਾਂਚ ਤੋਂ ਬਾਅਦ ਇੱਕ ਪਿਤਾ ਅਤੇ ਪੁੱਤਰ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਮੁਤਾਬਕ ਪਿਛਲੇ ਸਾਲ ਆਰ.ਸੀ.ਐਮ.ਪੀ ਅਤੇ ਐਲਬਰਟਾ ਰੁਜ਼ਗਾਰ ਮਿਆਰ ਦਫ਼ਤਰ ਨੂੰ ਫੌਕਸ ਕਰੀਕ ਹੋਟਲ ਅਤੇ ਕੈਲਮਾਰ ਗੈਸ ਸਟੇਸ਼ਨ ‘ਤੇ ਮਨੁੱਖੀ ਤਸਕਰੀ ਬਾਰੇ ਖਬਰ ਮਿਲੀ ਸੀ।

ਇਸ ਮਾਮਲੇ ਦੀ ਜਾਂਚ ਵਿੱਚ ਕਈ ਪ੍ਰਵਾਸੀ ਕਾਮਿਆਂ ਤੋਂ ਗ਼ੈਰਕਾਨੂੰਨੀ ਤਰੀਕੇ ਨਾਲ ਕੰਮ ਕਰਵਾਉਣ ਦਾ ਪਤਾ ਲੱਗਿਆ ਜਿਸ ਵਿੱਚ ਕਾਮਿਆਂ ਨੂੰ ਬਿਨਾਂ ਵਾਧੂ ਤਨਖ਼ਾਹ ਦਿੱਤੇ ਹਫ਼ਤੇ ਦੇ 80 ਤੋਂ 90 ਘੰਟੇ ਕੰਮ ਕਰਨ ਲਈ ਮਜਬੂਰ ਕੀਤਾ ਗਿਆ। ਇਸ ਤੋਂ ਇਲਾਵਾ ਕੰਮ ਦੀ ਝੂਠੀ ਸਮਾਂ-ਸਾਰਣੀ, ਘੱਟ ਤਨਖਾਹ ਵਿੱਚ ਵੱਧ ਕੰਮ ਕਰਾਉਣਾ, ਮਾਨਸਿਕ ਪਰੇਸ਼ਾਨੀ ਦੇਣ ਵਰਗੇ ਮਾਮਲੇ ਸ਼ਾਮਲ ਹਨ।

ਇਸ ਮਾਮਲੇ ਦੇ ਦੋਸ਼ੀ ਐਡਮਿੰਟਨ ਦੇ ਰਹਿਣ ਵਾਲੇ 55 ਸਾਲਾ ਯੇਓਨ ਸੂ ਲੀ ਅਤੇ ਉਸ ਦੇ ਪੁੱਤਰ 26 ਸਾਲਾ ਜੂ ਹਿਊਪ ਲੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਓਕਉਪੇਸ਼ਨਲ ਹੈਲਥ ਅਤੇ ਸੁਰੱਖਿਆ ਵੱਲੋਂ ਕਾਨੂੰਨ ਦੀ ਪਾਲਣਾ ਨਾ ਕਰਨ ਲਈ ਪਿਤਾ ਨੂੰ 60 ਹਜ਼ਾਰ ਦਾ ਜੁਰਮਾਨਾ ਲਗਾਇਆ ਗਿਆ ਹੈ ਅਤੇ ਅਧਿਕਾਰੀਆਂ ਦੇ ਕੰਮ ਵਿੱਚ ਦਖਲ ਦੇਣ ਦੇ ਦੋਸ਼ ਵਜੋਂ ਪੁੱਤਰ ਨੂੰ 10 ਹਜ਼ਾਰ ਦਾ ਜ਼ੁਰਮਾਨਾ ਲਗਾਇਆ ਗਿਆ ਹੈ। 11 ਅਗਸਤ ਨੂੰ ਆਦਲਤ ਵਿੱਚ ਪੇਸ਼ੀ ਹੋਣ ਤੱਕ ਪਿਓ ਪੁੱਤਰ ਨੂੰ ਰਿਹਾਅ ਕਰ ਦਿੱਤਾ ਗਿਆ ਹੈ।