ਬੀ.ਸੀ. ਕੰਜ਼ਰਵੇਟਿਵ ਦੇ ਤਿੰਨ ਵਿਧਾਇਕ ਪਾਰਟੀ ਤੋਂ ਹੋਏ ਵੱਖ

ਬੀ.ਸੀ. ਕੰਜ਼ਰਵੇਟਿਵ ਪਾਰਟੀ ਵਿਚ ਸੰਕਟ ਗਹਿਰਾ ਗਿਆ ਹੈ। ਰਿਹਾਇਸ਼ੀ ਸਕੂਲ ਬਾਰੇ ਵਿਵਾਦਿਤ ਟਿੱਪਣੀ ਮਾਮਲੇ ਵਿਚ ਵੈਨਕੂਵਰ-ਕੁਇਲਚੇਨਾ ਦੀ ਵਿਧਾਇਕ ਡੱਲਾਸ ਬ੍ਰੋਡੀ ਨੂੰ ਪਾਰਟੀ ਤੋਂ ਬਾਹਰ ਦਾ ਰਸਤਾ ਦਿਖਾਏ ਜਾਣ ਤੋਂ ਬਾਅਦ ਬੀ.ਸੀ. ਕੰਜ਼ਰਵੇਟਿਵ ਦੇ ਦੋ ਹੋਰ ਵਿਧਾਇਕ ਪਾਰਟੀ ਤੋਂ ਵੱਖ ਹੋ ਗਏ ਹਨ। ਇਨ੍ਹਾਂ ਵਿਚ ਪੀਸ ਰਿਵਰ ਨੌਰਥ ਤੋਂ ਵਿਧਾਇਕ ਜੌਰਡਨ ਕੇਲੀ ਅਤੇ ਕੇਲੋਨਾ-ਲੇਕ ਕੰਟਰੀ-ਕੋਲਡਸਟ੍ਰੀਮ ਦੀ ਵਿਧਾਇਕਾ ਤਾਰਾ ਆਰਮਸਟ੍ਰਾਂਗ ਸ਼ਾਮਲ ਹਨ।

ਖਾਸ ਗੱਲ ਇਹ ਹੈ ਕਿ ਬ੍ਰੋਡੀ, ਕੇਲੀ ਅਤੇ ਆਰਮਸਟ੍ਰਾਂਗ ਇਹ ਸਾਰੇ ਪਹਿਲੀ ਵਾਰ ਦੇ ਵਿਧਾਇਕ ਹਨ। ਕੇਲੀ ਨੇ ਕਿਹਾ ਕਿ ਉਹ ਨਵੀਂ ਪਾਰਟੀ ਬਣਾਉਣ ਦਾ ਵੀ ਵਿਚਾਰ ਕਰ ਰਹੇ ਹਨ। ਬੀ.ਸੀ. ਕੰਜ਼ਰਵੇਟਿਵ ਵਿਚ ਫੁੱਟ ਉਦੋਂ ਸਾਹਮਣੇ ਆਈ ਸੀ ਜਦੋਂ ਬੀ. ਸੀ. ਐੱਨ. ਡੀ. ਪੀ. ਨੇ ਟਰੰਪ ਦੀਆਂ ਟੈਰਿਫ ਧਮਕੀਆਂ ਦੀ ਨਿੰਦਾ ਕਰਨ ਦਾ ਪ੍ਰਸਤਾਵ ਲਿਆਂਦਾ ਸੀ।

ਉਸ ਸਮੇਂ ਬ੍ਰੋਡੀ, ਕੇਲੀ ਅਤੇ ਆਰਮਸਟ੍ਰਾਂਗ ਸਣੇ ਪੰਜ ਕੰਜ਼ਰਵੇਟਿਵ ਵਿਧਾਇਕ ਨੇ ਇਸ ਪ੍ਰਸਤਾਵ ਦੇ ਵਿਰੋਧ ਵਿਚ ਵੋਟ ਕੀਤੀ ਸੀ।ਇਹ ਸਾਰੇ ਪਹਿਲੀ ਵਾਰ ਦੇ ਵਿਧਾਇਕ ਹਨ, ਜੋ ਹੁਣ ਸੂਬੇ ਦੀ ਵਿਧਾਨ ਸਭਾ ਵਿਚ ਆਜ਼ਾਦ ਐੱਮ.ਐੱਲ.ਏ. ਵਜੋਂ ਬੈਠਣਗੇ।