20.9C Vancouver 20.9C VancouverNov 20, 2020 3:40 AM -
ਅੱਜ ਬੀ.ਸੀ. 'ਚ ਕੋਵਿਡ-19 ਦੇ 538 ਹੋਰ ਮਾਮਲੇ ਸਾਹਮਣੇ ਆਉਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਇੱਕ ਵਾਇਰਸ ਪੀੜਤ ਦੇ ਦਮ ਤੋੜਨ ਬਾਰੇ ਦੱਸਿਆ ਗਿਆ ਹੈ।
ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ 24,960 ਹੋ ਗਈ ਹੈ।
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਵੱਲੋਂ ਅੱਜ ਦੇ ਮਾਮਲਿਆਂ ਦੀ ਜਾਣਕਾਰੀ ਸਾਂਝੀ ਕੀਤੀ ਗਈ ਹੈ।
ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 321 ਹੋ ਗਈ ਹੈ।
ਬੀ.ਸੀ. 'ਚ ਵਾਇਰਸ ਸੰਬੰਧੀ ਐਕਟਿਵ ਮਾਮਲੇ 6,929 ਤੱਕ ਪਹੁੰਚ ਗਏ ਹਨ।
ਹਸਪਤਾਲ 'ਚ ਦਾਖਿਲ ਵਾਇਰਸ ਪੀੜਤਾਂ ਦੀ ਗਿਣਤੀ ਵੀ 200 ਤੋਂ ਪਾਰ ਹੋ ਗਈ ਹੈ।
ਕੁੱਲ 217 ਲੋਕ ਹਸਪਤਾਲ 'ਚ ਦਾਖਿਲ ਹਨ, ਤੇ ਇਸ 'ਚ 59 ਨੂੰ ਆਈ.ਸੀ.ਯੂ. 'ਚ ਰੱਖਿਆ ਗਿਆ ਹੈ।
ਯਾਦ ਰਹੇ ਅੱਜ ਇਕੱਲੇ ਫਰੇਜ਼ਰ ਹੈਲਥ ਇਲਾਕੇ 'ਚ 309 ਮਾਮਲੇ ਰਿਪੋਰਟ ਹੋਏ ਹਨ।
ਵੈਨਕੂਵਰ ਕੋਸਟਲ ਹੈਲਥ ਰਿਜਨ 'ਚ 178 ਮਾਮਲੇ ਰਿਪੋਰਟ ਹੋਏ ਹਨ।
ਬੀ.ਸੀ. 'ਚ ਜਾਰੀ ਕੀਤੀਆਂ ਪਬੰਦੀਆਂ ਦਾ ਵੇਰਵਾ
ਅੱਜ ਬੀ.ਸੀ. 'ਚ ਨਵੇਂ ਜਨਤਕ ਸਿਹਤ ਨਿਰਦੇਸ਼ ਵੀ ਜਾਰੀ ਕੀਤੇ ਗਏ ਹਨ।
ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਫਰੇਜ਼ਰ ਹੈਲਥ ਰਿਜਨ ਅਤੇ ਵੈਨਕੂਵਰ ਕੋਸਟਲ ਹੈਲਥ ਰਿਜਨ ਵਿੱਚ 7 ਨਵੰਬਰ ਨੂੰ ਲਾਗੂ ਕੀਤੀਆਂ ਗਈਆਂ ਪਬੰਦੀਆਂ ਦੀ ਮਿਆਦ ਨੂੰ ਹੁਣ ਪੂਰੇ ਸੂਬੇ 'ਤੇ ਲਾਗੂ ਕਰ ਦਿੱਤਾ ਗਿਆ ਹੈ।
ਬੀ.ਸੀ. ਵਿੱਚ 7 ਦਸੰਬਰ ਤੱਕ ਘਰਾਂ ਵਿੱਚ ਸਿਰਫ਼ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਹੀ ਮੇਲ ਜੋਲ ਦੀ ਇਜਾਜ਼ਤ ਹੋਵੇਗੀ।
ਦੋਸਤਾਂ ਅਤੇ ਪਰਿਵਾਰਾਂ ਨੂੰ ਘਰ ਬੁਲਾਉਣ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਹੁਣ ਤੋਂ ਬੀ.ਸੀ. ਦੇ ਇੰਡੋਰ ਥਾਵਾਂ ਅਤੇ ਰਿਟੇਲ ਸਟੋਰਾਂ 'ਤੇ ਮਾਸਕ ਪਹਿਨਣਾ ਲਾਜ਼ਮੀ ਕਰ ਦਿੱਤਾ ਗਿਆ ਹੈ। ਇਸ 'ਚ ਸਟਾਫ਼ ਅਤੇ ਕਸਟਮਰ ਸ਼ਾਮਿਲ ਹਨ।
ਅਗਲੇ ਦੋ ਹਫ਼ਤਿਆਂ ਲਈ 50 ਲੋਕਾਂ ਦੇ ਇਕੱਠ ਵਾਲੇ ਕਮਿਊਨਿਟੀ ਆਧਾਰਿਤ ਸਮਾਜਿਕ ਇਕੱਠਾਂ/ਸਮਾਗਮਾਂ ਅਤੇ ਧਾਰਮਿਕ ਥਾਵਾਂ ਤੇ ਹੋਣ ਵਾਲੇ ਇਕੱਠਾਂ 'ਤੇ ਵੀ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਵਿਆਹਾਂ ਅਤੇ ਫਿਊਨਰਲਸ ਮੌਕੇ ਵੱਧ ਤੋਂ ਵੱਧ 10 ਲੋਕਾਂ ਦੇ ਇਕੱਤਰ ਹੋਣ ਦੀ ਇਜਾਜ਼ਤ ਦਿੱਤੀ ਗਈ ਹੈ।
ਵਪਾਰਾਂ 'ਚ ਇੰਸਪੈਕਸ਼ਨ ਨੂੰ ਵਧਾਏ ਜਾਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਨਿਰਦੇਸ਼ਾਂ ਦਾ ਉਲੰਘਣ ਕਰਨ ਵਾਲੇ ਵਪਾਰਾਂ ਖਿਲਾਫ਼ ਸਖਤ ਕਾਰਵਾਈ ਕੀਤੀ ਜਾ ਸਕਦੀ ਹੈ, ਜਿਸ 'ਚ ਵਪਾਰਾਂ ਨੂੰ ਬੰਦ ਕਰਨ ਜਿਹੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।
ਹਾਲਾਂਕਿ ਸਪੋਰਟਸ ਗਤੀਵਿਧੀਆਂ ਜਾਰੀ ਰਹਿਣਗੀਆਂ ਪਰ ਦਰਸ਼ਕਾਂ ਅਤੇ ਕਮਿਊਨਿਟੀ ਤੋਂ ਬਾਹਰ ਖੇਡ ਸਬੰਧੀ ਯਾਤਰਾ 'ਤੇ ਪਬੰਦੀ ਹੋਵੇਗੀ।
