ਯੂਕਰੇਨ ਨੇ ਰੂਸ ’ਤੇ 144 ਡਰੋਨ ਨਾਲ ਕੀਤਾ ਹਮਲਾ, 1 ਮਹਿਲਾ ਦੀ ਹੋਈ ਮੌਤ

ਯੂਕਰੇਨ ਨੇ ਮੰਗਲਵਾਰ ਨੂੰ ਰੂਸ ’ਤੇ 144 ਡਰੋਨ ਨਾਲ ਹਮਲਾ ਕੀਤਾ। ਇਸ ਹਮਲੇ ਵਿਚ ਕਈ ਰਿਹਾਇਸ਼ੀ ਇਮਾਰਤਾਂ ਨੂੰ ਵੀ ਨਿਸ਼ਾਨਾ ਬਣਾਇਆ ਗਿਆ। ਰਿਪੋਰਟਸ ਮੁਤਾਬਕ, ਰੂਸ ਦੀ ਰਾਜਧਾਨੀ ਮਾਸਕੋ ਨੇੜੇ ਕਰੀਬ 20 ਡਰੋਨ ਅਸਫਲ ਕੀਤੇ ਗਏ। ਇਸ ਹਮਲੇ ਵਿਚ ਇੱਕ ਔਰਤ ਦੀ ਵੀ ਮੌਤ ਹੋ ਗਈ। ਇਸ ਹਮਲੇ ਦੇ ਚੱਲਦੇ ਮਾਸਕੋ ਅਤੇ ਉਸ ਦੇ ਆਸਪਾਸ ਦੇ ਹਵਾਈ ਅੱਡਿਆਂ ਤੋਂ 50 ਤੋਂ ਵੱਧ ਉਡਾਣਾਂ ਨੂੰ ਡਾਇਵਰਟ ਵੀ ਕਰਨਾ ਪਿਆ।

ਰੂਸ ਦੇ ਅਧਿਕਾਰੀਆਂ ਮੁਤਾਬਕ, ਮਾਸਕੋ ਦੇ 4 ਵਿਚੋਂ ਤਿੰਨ ਏਅਪੋਰਟਸ ਨੂੰ 6 ਘੰਟਿਆਂ ਤੋਂ ਜ਼ਿਆਦਾ ਸਮੇਂ ਤੱਕ ਬੰਦ ਰੱਖਣਾ ਪਿਆ। ਉਥੇ ਹੀ, ਇਸ ਹਮਲੇ ਦਾ ਪਲਟਵਾਰ ਕਰਦੇ ਹੋਏ ਰੂਸ ਨੇ ਯੂਕਰੇਨ ’ਤੇ 46 ਡਰੋਨ ਨਾਲ ਹਮਲਾ ਬੋਲਿਆ, ਹਾਲਾਂਕਿ, ਯੂਕਰੇਨ ਮੁਤਾਬਕ, ਉਸ ਨੇ 38 ਡਰੋਨ ਅਸਫਲ ਕਰ ਦਿੱਤੇ।

ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਯੂਕਰੇਨ ਨੇ 31 ਅਗਸਤ ਨੂੰ ਰੂਸ ’ਤੇ 150 ਤੋਂ ਜ਼ਿਆਦਾ ਡਰੋਨ ਨਾਲ ਹਮਲਾ ਕੀਤਾ ਸੀ। ਢਾਈ ਸਾਲ ਤੋਂ ਜਾਰੀ ਜੰਗ ਵਿਚ ਪਹਿਲੀ ਵਾਰ ਯੂਕਰੇਨ ਨੇ ਰੂਸ ਖਿਲਾਫ ਇੰਨੀ ਜ਼ਿਆਦਾ ਵੱਡੀ ਗਿਣਤੀ ਵਿਚ ਡੋਰਨ ਹਮਲਾ ਕੀਤਾ ਸੀ।