ਐਬਟਸਫੋਰਡ 'ਚ ਔਰਤ ਦੇ ਕਤਲ ਮਾਮਲੇ 'ਚ ਸ਼ੱਕੀ 'ਤੇ ਲੱਗੇ ਦੋਸ਼ ਕੀਤੇ ਗਏ ਸਖਤ

ਐਬਟਸਫੋਰਡ ਵਿਚ ਮਾਰਸ਼ਲ ਰੋਡ 'ਤੇ ਸਥਿਤ ਬੈਸਟ ਵੈਸਟਰਨ ਹੋਟਲ ਦੇ ਕਮਰੇ ਵਿਚ ਇੱਕ 30 ਸਾਲਾ ਮਹਿਲਾ ਦੇ ਹੋਏ ਕਤਲ ਦੇ ਮਾਮਲੇ ਵਿਚ ਪੁਲਿਸ ਵਲੋਂ ਗ੍ਰਿਫਤਾਰ ਕੀਤੇ ਗਏ 26 ਸਾਲਾ ਪੰਜਾਬੀ ਨੌਜਵਾਨ ਸੋਨਦੀਪ ਸਿੰਘ ਗਿੱਲ ਵਿਰੁੱਧ ਹੁਣ ਦੋਸ਼ਾਂ ਨੂੰ ਹੋਰ ਸਖ਼ਤ ਕਰ ਦਿੱਤਾ ਗਿਆ ਹੈ।​

15 ਜਨਵਰੀ 2026 ਨੂੰ ਹੋਈ ਇਸ ਵਾਰਦਾਤ ਦੀ ਇੰਟੀਗ੍ਰੇਟਿਡ ਹੋਮਿਸਾਈਡ ਇਨਵੈਸਟੀਗੇਸ਼ਨ ਟੀਮ ਵਲੋਂ ਕੀਤੀ ਗਈ ਜਾਂਚ ਦੇ ਆਧਾਰ 'ਤੇ ਬੀ.ਸੀ. ਪ੍ਰੌਸੀਕਿਊਸ਼ਨ ਸਰਵਿਸ ਨੇ ਸੋਨਦੀਪ ਸਿੰਘ ਗਿੱਲ 'ਤੇ ਲੱਗੇ ਸੈਕਿੰਡ ਡਿਗਰੀ ਮਰਡਰ ਦੇ ਦੋਸ਼ ਨੂੰ ਅਪਗ੍ਰੇਡ ਕਰਕੇ ਫਰਸਟ ਡਿਗਰੀ ਮਰਡਰ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਉਸ 'ਤੇ ਲਾਸ਼ ਨਾਲ ਅਣਮਨੁੱਖੀ ਵਰਤਾਰਾ ਕਰਨ ਦਾ ਦੋਸ਼ ਵੀ ਬਰਕਰਾਰ ਹੈ।

ਇੰਟੀਗ੍ਰੇਟਿਡ ਹੋਮਿਸਾਈਡ ਇਨਵੈਸਟੀਗੇਸ਼ਨ ਟੀਮ ਦੀ ਸਾਰਜੈਂਟ ਫਰੈਡਾ ਫੋਂਗ ਨੇ ਦੱਸਿਆ ਕਿ ਭਾਵੇਂ ਦੋਸ਼ ਪਹਿਲਾਂ ਹੀ ਲਗਾ ਦਿੱਤੇ ਗਏ ਸਨ, ਪਰ ਜਾਂਚ ਟੀਮ ਨੇ ਸਭ ਤੋਂ ਪੁਖ਼ਤਾ ਸਬੂਤ ਇਕੱਠੇ ਕਰਨ ਲਈ ਕੰਮ ਜਾਰੀ ਰੱਖਿਆ। ਉਨ੍ਹਾਂ ਕਿਹਾ ਕਿ ਕਤਲ ਵਰਗੇ ਗੰਭੀਰ ਮਾਮਲੇ ਵਿਚ ਸਿਰਫ਼ ਲੋੜੀਂਦੇ ਸਬੂਤ ਨਹੀਂ ਸਗੋਂ ਪੁਖਤੇ ਸਬੂਤ ਜੁਟਾਉਣਾ ਜ਼ਰੂਰੀ ਸੀ, ਜਿਸ ਕਾਰਨ ਇਹ ਨਵੇਂ ਦੋਸ਼ ਲਗਾਉਣ ਵਿਚ ਸਫ਼ਲਤਾ ਪ੍ਰਾਪਤ ਹੋਈ ਹੈ।