17.38C Vancouver 17.38C VancouverJul 29, 2026 5:24 PM - Connect Newsroom - Ramanpreet kaur with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਸਰਕਾਰ ਵੱਲੋਂ ਨੌਕਰਸ਼ਾਹੀ ਘਟਾਉਣ ਦੀ ਯੋਜਨਾ ਤਹਿਤ ਸ਼ੁਰੂ ਕੀਤੇ ਗਏ ਅਰਲੀ ਰਿਟਾਇਰਮੈਂਟ Incentive Program ਲਈ ਲਗਭਗ 10,000 ਫੈਡਰਲ ਕਰਮਚਾਰੀਆਂ ਨੇ ਸਮੇਂ ਤੋਂ ਪਹਿਲਾਂ ਸੇਵਾਮੁਕਤੀ ਲਈ ਅਪਲਾਈ ਕੀਤਾ ਹੈ। ਖਜ਼ਾਨਾ ਬੋਰਡ ਮੁਤਾਬਕ, 24 ਜੁਲਾਈ ਨੂੰ ਖ਼ਤਮ ਹੋਈ ਅਪਲਾਈ ਕਰਨ ਦੀ ਆਖ਼ਰੀ ਤਾਰੀਖ਼ ਤੱਕ ਪ੍ਰਾਪਤ ਹੋਈਆਂ ਇਨ੍ਹਾਂ ਅਰਜ਼ੀਆਂ ਵਿਚੋਂ ਹੁਣ ਤੱਕ 6,855 ਕਰਮਚਾਰੀਆਂ ਨੂੰ ਯੋਗ ਪਾਇਆ ਗਿਆ ਹੈ, ਜਦੋਂ ਕਿ ਸਿਰਫ਼ 41 ਅਰਜ਼ੀਆਂ ਰੱਦ ਕੀਤੀਆਂ ਗਈਆਂ ਹਨ ਅਤੇ ਬਾਕੀ ਅਰਜ਼ੀਆਂ ਦੀ ਜਾਂਚ ਪ੍ਰਕਿਰਿਆ ਅਜੇ ਜਾਰੀ ਹੈ।
ਇਸ ਸਕੀਮ ਤਹਿਤ 31 ਦਸੰਬਰ 2012 ਤੋਂ ਪਹਿਲਾਂ ਭਰਤੀ ਹੋਏ 50 ਸਾਲ ਦੀ ਉਮਰ ਵਾਲੇ ਅਤੇ ਉਸ ਤੋਂ ਬਾਅਦ ਭਰਤੀ ਹੋਏ 55 ਸਾਲ ਦੀ ਉਮਰ ਵਾਲੇ ਮੁਲਾਜ਼ਮਾਂ ਨੂੰ ਬਿਨਾਂ ਕਿਸੇ ਪੈਨਸ਼ਨ ਕਟੌਤੀ ਦੇ ਜਲਦੀ ਰਿਟਾਇਰ ਹੋਣ ਦਾ ਮੌਕਾ ਦਿੱਤਾ ਗਿਆ ਹੈ,। ਪ੍ਰਵਾਨਿਤ ਮੁਲਾਜ਼ਮਾਂ ਨੂੰ 19 ਜਨਵਰੀ 2027 ਤੱਕ ਆਪਣੀ ਨੌਕਰੀ ਦਾ ਆਖਰੀ ਦਿਨ ਪੂਰਾ ਕਰਨਾ ਹੋਵੇਗਾ ਅਤੇ 20 ਜਨਵਰੀ 2027 ਨੂੰ ਉਨ੍ਹਾਂ ਦੀ ਅਧਿਕਾਰਤ ਰਿਟਾਇਰਮੈਂਟ ਮੰਨੀ ਜਾਵੇਗੀ।
ਹਾਲਾਂਕਿ, ਇਸ ਯੋਜਨਾ 'ਤੇ ਅਗਲੇ ਪੰਜ ਸਾਲਾਂ ਵਿਚ $1.5 ਬਿਲੀਅਨ ਦਾ ਖਰਚਾ ਆਉਣ ਦਾ ਅਨੁਮਾਨ ਹੈ ਪਰ ਇਸ ਨਾਲ ਸਰਕਾਰ ਨੂੰ ਪੈਨਸ਼ਨ ਫੰਡ ਦੇ ਯੋਗਦਾਨ ਵਿਚ ਸਾਲਾਨਾ $82 ਮਿਲੀਅਨ ਦੀ ਬਚਤ ਹੋਵੇਗੀ। ਦੂਜੇ ਪਾਸੇ, ਜਨਤਕ ਖੇਤਰ ਦੀਆਂ ਯੂਨੀਅਨ ਨੇ ਨੌਕਰੀਆਂ ਵਿਚ ਕਟੌਤੀ ਖਿਲਾਫ ਲੇਬਰ ਟ੍ਰਿਬਿਊਨਲ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ।
