14.82C Vancouver 14.82C VancouverMar 21, 2023 6:26 PM - BC Government
ਬੀ.ਸੀ. ਦੇ ਲਗਭਗ 75% ਬੱਚਿਆਂ ਵਾਲੇ ਪਰਿਵਾਰਾਂ ਨੂੰ ਆਪਣੇ ਬੈਂਕ ਖਾਤਿਆਂ ਵਿੱਚ ਬੀ.ਸੀ. ਫੈਮਿਲੀ ਬੈਨੀਫਿਟ ਦੇ ਤੀਜੇ ਵਿਸਤਰਿਤ ਭੁਗਤਾਨ ਤੋਂ ਹੋਰ ਪੈਸੇ ਜਮ੍ਹਾਂ ਹੋਏ ਨਜ਼ਰ ਆਉਣਗੇ।
ਬੀ.ਸੀ. ਵਿੱਚ, 2023 ਦੇ ਪਹਿਲੇ ਤਿੰਨ ਮਹੀਨਿਆਂ ਲਈ, ਪਰਿਵਾਰਾਂ ਲਈ ਮਹੀਨਾਵਾਰ ਬੈਨੀਫਿਟ ਭੁਗਤਾਨ ਅਸਥਾਈ ਤੌਰ 'ਤੇ ਵਧਾ ਦਿੱਤਾ ਗਿਆ ਸੀ। ਜਨਵਰੀ ਤੋਂ ਮਾਰਚ 2023 ਤੱਕ ਕੁੱਲ ਮਿਲਾ ਕੇ, ਦੋ ਬੱਚਿਆਂ ਵਾਲੇ ਪਰਿਵਾਰ ਲਈ, ਬੀ.ਸੀ. ਫੈਮਿਲੀ ਬੈਨੀਫਿਟ ਭੁਗਤਾਨ ਨੇ $350 ਤੱਕ ਵਾਧੂ ਪ੍ਰਦਾਨ ਕੀਤੇ ਹਨ।
"ਜਦੋਂ ਕਿ ਵਿਸ਼ਵ ਭਰ ਦੀ ਮਹਿੰਗਾਈ ਜ਼ਿਆਦਾਤਰ ਘਰੇਲੂ ਬੱਜਟਾਂ ‘ਤੇ ਦਬਾਅ ਪਾ ਰਹੀ ਹੈ, ਇਹ ਉਹਨਾਂ ਲੋਕਾਂ ਲਈ ਬੇਹੱਦ ਮੁਸ਼ਕਲ ਹੋ ਸਕਦਾ ਹੈ ਜੋ ਪਹਿਲਾਂ ਤੋਂ ਹੀ ਆਪਣੇ ਖਰਚੇ ਪੂਰੇ ਕਰਨ ਲਈ ਸੰਘਰਸ਼ ਕਰ ਰਹੇ ਹਨ," ਵਿੱਤ ਮੰਤਰੀ, ਕਟਰੀਨ ਕੌਨਰੌਏ ਨੇ ਕਿਹਾ। "ਲੋਕਾਂ ਦੀ ਮਦਦ ਕਰਦੇ ਰਹਿਣਾ ਸਾਡੀ ਸਰਕਾਰ ਦਾ ਮੁੱਖ ਕੇਂਦਰ ਹੈ, ਅਤੇ ਬੱਜਟ 2023 ਵਿੱਚ ਸਾਡੇ ਨਵੇਂ ਨਿਵੇਸ਼ ਇਸ ਤਰਜੀਹ ਨੂੰ ਦਰਸਾਉਂਦੇ ਹਨ। ਜਿਹੜੇ ਪਰਿਵਾਰ ਇਹ ਮਹਿਸੂਸ ਕਰਦੇ ਹਨ ਕਿ ਉਹ ਮੁਸ਼ਕਲ ਨਾਲ ਗੁਜ਼ਾਰਾ ਕਰ ਰਹੇ ਹਨ - ਅਤੇ ਕਦੇ ਵੀ ਅੱਗੇ ਨਹੀਂ ਵਧ ਪਾ ਰਹੇ - ਅਸੀਂ ਉਹਨਾਂ ਦੀ ਮਦਦ ਕਰਨ ਲਈ ਇੱਥੇ ਮੌਜੂਦ ਹਾਂ।"
ਅਸਥਾਈ ਟੌਪ-ਅੱਪ ਮਾਰਚ ਵਿੱਚ ਖਤਮ ਹੋ ਰਹੇ ਹਨ। ਹਾਲਾਂਕਿ, ਬੱਜਟ 2023 ਵਿੱਚ ਬੀ ਸੀ ਫੈਮਿਲੀ ਬੈਨੀਫਿਟ ਵਿੱਚ ਇੱਕ ਨਵਾਂ 10% ਦਾ ਸਥਾਈ ਵਾਧਾ ਸ਼ਾਮਲ ਹੈ। ਜੁਲਾਈ 2023 ਤੋਂ, ਮਾਪਿਆਂ ਨੂੰ ਆਪਣੇ ਪਹਿਲੇ ਬੱਚੇ ਲਈ $1,750, ਦੂਜੇ ਲਈ $1,100 ਅਤੇ ਹਰ ਅਗਲੇ ਬੱਚੇ ਲਈ $900 ਪ੍ਰਤੀ ਸਾਲ ਪ੍ਰਾਪਤ ਹੋਣਗੇ। ਸਿੰਗਲ ਮਾਪਿਆਂ ਨੂੰ 10% ਵਾਧੇ ਤੋਂ ਇਲਾਵਾ, ਹੋਰ $500 ਤੱਕ ਮਿਲ ਸਕਦੇ ਹਨ।
ਭੁਗਤਾਨ ਮਿਲਣ ਦੀ ਯੋਗਤਾ, ਆਮਦਨ ਅਤੇ ਬੱਚਿਆਂ ਦੀ ਸੰਖਿਆ 'ਤੇ ਅਧਾਰਤ ਹੈ। ਬੀ ਸੀ ਫੈਮਿਲੀ ਬੈਨੀਫਿਟ ਉਹਨਾਂ ਪਰਿਵਾਰਾਂ ਨੂੰ ਔਟੋਮੈਟਿਕ ਤੌਰ 'ਤੇ ਭੇਜਿਆ ਜਾਂਦਾ ਹੈ ਜੋ ਫੈਡਰਲ ਕੈਨੇਡਾ ਚਾਈਲਡ ਬੈਨੀਫਿਟ ਲਈ ਯੋਗ ਹਨ ਅਤੇ ਕੈਨੇਡਾ ਰੈਵੇਨਿਊ ਏਜੰਸੀ ਦੁਆਰਾ ਜਮ੍ਹਾਂ ਕਰਵਾਉਣ ਲਈ 10 ਦਿਨਾਂ ਤੱਕ ਦਾ ਸਮਾਂ ਲੱਗ ਸਕਦਾ ਹੈ।
