ਰਿਹਾਨਾ ਤੋਂ ਬਾਅਦ ਹੋਰ ਅੰਤਰਰਾਸ਼ਟਰੀ ਸ਼ਖਸੀਅਤਾਂ ਦੀ ਨਜ਼ਰ 'ਚ ਆਇਆ ਕਿਸਾਨ ਅੰਦੋਲਨ; ਖੂਬ ਵਾਇਰਲ ਹੋ ਰਹੇ ਟਵੀਟ

ਦਿੱਲੀ 'ਚ ਜਾਰੀ ਕਿਸਾਨ ਅੰਦੋਲਨ ਦੀ ਆਵਾਜ਼ ਹੁਣ ਅੰਤਰਰਾਸ਼ਟਰੀ ਪੱਧਰ ਦੀਆਂ ਨਾਮੀ ਸ਼ਖਸੀਅਤਾਂ ਤਕ ਪਹੁੰਚਣ ਲੱਗੀ ਹੈ।

ਅੰਤਰਰਾਸ਼ਟਰੀ ਪੌਪ ਸਟਾਰ ਰਿਹਾਨਾ ਨੇ ਦਿੱਲੀ 'ਚ ਅੰਦੋਲਨ ਕਰ ਰਹੇ ਕਿਸਾਨਾਂ ਦੇ ਪੱਖ 'ਚ ਆਵਾਜ਼ ਬੁਲੰਦ ਕੀਤੀ।

ਇਸ ਤੋਂ ਬਾਅਦ ਨਾਮੀ ਮੌਸਮ ਅਤੇ ਵਾਤਾਵਰਨ ਸੰਬੰਧੀ ਐਕਟੀਵਿਸਟ, ਗਰੇਟਾ ਥਨਬਰਗ ਨੇ ਵੀ ਕਿਸਾਨ ਅੰਦੋਲਨ ਦੇ ਪੱਖ 'ਚ ਆਵਾਜ਼ ਚੁੱਕੀ ਹੈ।

ਗਰੇਟਾ ਥਨਬਰਗ ਨੇ ਕਿਸਾਨ ਅੰਦੋਲਨ ਦੀ ਇੱਕ ਤਸਵੀਰ ਟਵੀਟ ਕਰਦੇ ਹੋਏ ਕਿਹਾ ਕਿ ਉਹ ਕਿਸਾਨ ਅੰਦੋਲਨ ਦੇ ਸਹਿਯੋਗ 'ਚ ਖੜੀ ਹਨ।

ਰਿਹਾਨਾ ਦੀ ਤਰ੍ਹਾਂ ਉਨ੍ਹਾਂ ਵੀ ਆਪਣੇ ਟਵੀਟ ਦੇ ਨਾਲ ਸੀ.ਐਨ.ਐਨ. ਨਿਊਜ਼ ਦੀ ਇੱਕ ਰਿਪੋਰਟ ਸਾਂਝੀ ਕੀਤੀ।

ਇਸ ਤੋਂ ਪਹਿਲਾਂ ਰਿਹਾਨਾ ਨੇ ਇੱਕ ਟਵੀਟ ਕਰਦੇ ਹੋਏ ਪੁੱਛਿਆ, ਆਖਿਰ ਲੋਕ ਇਸ ਬਾਰੇ ਗੱਲ ਕਿਉਂ ਨਹੀਂ ਕਰ ਰਹੇ।

ਰਿਹਾਨਾ ਨੇ ਆਪਣੇ ਟਵੀਟ ਦੇ ਨਾਲ ਸੀ.ਐਨ.ਐਨ. ਨਿਊਜ਼ ਦੀ ਇੱਕ ਰਿਪੋਰਟ ਵੀ ਸਾਂਝੀ ਕੀਤੀ।

32 ਸਾਲਾ ਪੌਪ ਸਟਾਰ ਨੇ ਹਰਿਆਣਾ ਅਤੇ ਦਿੱਲੀ 'ਚ ਇੰਟਰਨੈਟ ਸੇਵਾਵਾਂ ਬੰਦ ਕੀਤੇ ਜਾਣ 'ਤੇ ਵੀ ਸਵਾਲ ਚੁੱਕੇ।

ਉਨ੍ਹਾਂ ਆਪਣੇ ਟਵੀਟ ਦੇ ਨਾਲ ਹੈਸ਼ਟੈਗ #FarmersProtest ਦੀ ਵੀ ਵਰਤੋਂ ਕੀਤੀ।

ਆਪਣੇ ਇਸ ਟਵੀਟ ਤੋਂ ਬਾਅਦ ਰਿਹਾਨਾ ਭਾਰਤ 'ਚ ਨੰਬਰ 1 'ਤੇ ਟ੍ਰੈਂਡ ਕਰ ਰਹੀ ਸੀ।

ਇਸ ਦੇ ਨਾਲ ਹੀ ਨਾਮੀ ਅਦਾਕਾਰਾ ਅਤੇ ਸੋਸ਼ਲ ਮੀਡੀਆ 'ਤੇ ਸੁਰਖੀਆਂ 'ਚ ਰਹਿਣ ਵਾਲੀ ਅਮੈਂਡਾ ਸਰਨੀ ਨੇ ਵੀ ਇਸ ਮਾਮਲੇ 'ਤੇ ਇੱਕ ਇੰਸਟਾਗ੍ਰਾਮ ਪੋਸਟ ਸਾਂਝੀ ਕੀਤੀ।

ਇਸ ਪੋਸਟ 'ਤੇ 6 ਘੰਟੇ ਵਿਚਾਲੇ 300,000 ਤੋਂ ਵਧੇਰੇ ਲਾਈਕ ਆ ਚੁੱਕੇ ਸਨ।

ਯਾਦ ਰਹੇ ਕੇਂਦਰ ਸਰਕਾਰ ਵੱਲੋਂ ਜਾਰੀ 3 ਖੇਤੀ ਕਨੂੰਨਾਂ ਨੂੰ ਵਾਪਿਸ ਕੀਤੇ ਜਾਣ ਅਤੇ ਐਮ.ਸੀ.ਪੀ. ਨੂੰ ਕਨੂੰਨੀਜਾਮਾ ਪਹਿਨਾਏ ਜਾਣ ਦੀ ਮੰਗ ਚੁੱਕ ਰਹੇ ਕਿਸਾਨ, 2 ਮਹੀਨੇ ਤੋਂ ਵੱਧ ਸਮੇਂ ਤੋਂ ਦਿੱਲੀ ਦੀਆਂ ਵੱਖ-ਵੱਖ ਸਰਹੱਦਾਂ 'ਤੇ ਪ੍ਰਦਰਸ਼ਨ ਕਰ ਰਹੇ ਹਨ।

ਰਿਹਾਨਾ ਦਾ ਟਵੀਟ:

Why aren’t we talking about this?! #FarmersProtest

ਗਰੇਟਾ ਥਨਬਰਗ ਦਾ ਟਵੀਟ:

We stand in solidarity with the #FarmersProtest in India.

ਅਮੈਂਡਾ ਸਰਨੀ ਦੀ ਇੰਸਟਾਗ੍ਰਾਮ ਪੋਸਟ:

The world is watching. You don't have to be Indian or Punjabi or South Asian to understand the issue. All you have to do is care about humanity. Always demand freedom of speech, freedom of press, basic human and civil rights-equity and dignity for workers. ❤️ #FarmersProtest #internetshutdown