13.29C Vancouver 13.29C VancouverOct 14, 2022 9:18 PM - Connect News
ਸਰੀ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਇਲਾਕੇ 'ਚ ਫਰੰਟਲਾਈਨ ਅਫਸਰਾਂ ਨੇ ਏਅਰ 1 ਦੀ ਮਦਦ ਨਾਲ ਇੱਕ ਸ਼ੱਕੀ ਨੂੰ ਹਿਰਾਸਤ ਵਿੱਚ ਲਿਆ ਹੈ ਅਤੇ ਚੋਰੀ ਦਾ ਮੋਟਰਸਾਈਕਲ ਅਤੇ ਗੈਰਕਨੂੰਨੀ ਡਰੱਗਸ ਬਰਾਮਦ ਕੀਤੇ ਹਨ।
ਮਾਮਲਾ 6 ਅਕਤੂਬਰ ਦਾ ਦੱਸਿਆ ਗਿਆ ਹੈ। ਅਫਸਰਾਂ ਨੇ ਵੇਖਿਆ ਕਿ ਇੱਕ ਮੋਟਰਸਾਈਕਲ 'ਤੇ ਲਾਈਸੈਂਸ ਪਲੇਟ ਨਹੀਂ ਸੀ ਅਤੇ ਇਹ ਮੋਟਰਸਾਈਕਲ ਲਾਲ ਬੱਤੀ ਟੱਪ ਗਿਆ ਸੀ।
ਇਸੇ ਮੌਕੇ ਅਫਸਰਾਂ ਨੇ ਇਲਾਕੇ 'ਚ ਮੌਜੂਦ ਏਅਰ 1 ਹੈਲੀਕਾਪਟਰ ਤੋਂ ਮਦਦ ਮੰਗੀ ਅਤੇ ਹੈਲੀਕਾਪਟਰ ਨੇ ਮੋਟਰਸਾਈਕਲ ਦਾ ਪਿੱਛਾ ਕੀਤਾ।
ਇਹ ਮੋਟਰਸਾਈਕਲ 62 ਐਵੀਨਿਊ ਅਤੇ 136 ਸਟ੍ਰੀਟ ਕੋਲ ਜਾ ਕੇ ਰੁਕਿਆ।
ਪੁਲਿਸ ਵੀ ਜਾਣਕਾਰੀ ਮਿਲਣ 'ਤੇ ਜਲਦੀ ਹੀ ਮੌਕੇ 'ਤੇ ਪਹੁੰਚ ਗਈ ਅਤੇ ਇੱਕ 38 ਸਾਲਾ ਵਿਅਕਤੀ ਨੂੰ ਕਾਬੂ ਕਰ ਲਿਆ ਗਿਆ।
ਸ਼ੱਕੀ ਖਿਲਾਫ ਇੱਕ ਆਊਟਸਟੈਂਡਿੰਗ ਵਾਰੰਟ ਹੋਣ ਦੀ ਵੀ ਜਾਣਕਾਰੀ ਦਿੱਤੀ ਗਈ।
ਪੁਲਿਸ ਨੂੰ ਮੌਕੇ ਤੋਂ 600 ਗਰਾਮ ਸ਼ੱਕੀ ਮੈਥਮਫਿਟਾਮੀਨ, ਕੋਕੇਨ ਅਤੇ ਫੈਂਟਾਨਿਲ ਬਰਾਮਦ ਹੋਈ। ਬਾਅਦ 'ਚ ਪਤਾ ਲੱਗਿਆ ਕਿ ਮੋਟਰਸਾਈਕਲ 20 ਸਿਤੰਬਰ ਨੂੰ ਚੋਰੀ ਕੀਤਾ ਗਿਆ ਸੀ।
ਉਸ ਮੌਕੇ ਮੋਟਰਸਾਈਕਲ ਖਰੀਦਣ ਦੇ ਬਹਾਨੇ ਨਾਲ ਇੱਕ ਵਿਅਕਤੀ ਕੋਲ ਪਹੁੰਚ ਕੀਤੀ ਗਈ ਸੀ ਅਤੇ ਟੈਸਟ ਡਰਾਈਵ ਦੇ ਬਹਾਨੇ ਮੋਟਰਸਾਈਕਲ ਚੋਰੀ ਕਰ ਲਿਆ ਗਿਆ ਸੀ।
