ਏਅਰ ਕੈਨੇਡਾ ਦੇ ਸੀ.ਈ.ਓ.ਮਾਈਕਲ ਰੂਸੋ ਆਪਣੇ ਅਹੁਦੇ ਤੋਂ ਹੋਣਗੇ ਸੇਵਾਮੁਕਤ

ਏਅਰ ਕੈਨੇਡਾ ਨੇ ਸੋਮਵਾਰ ਨੂੰ ਐਲਾਨ ਕੀਤਾ ਹੈ ਕਿ ਏਅਰਲਾਈਨ ਦੇ President ਅਤੇ ਸੀਈਓ ਮਾਈਕਲ ਰੂਸੋ ਸਾਲ 2026 ਦੀ ਤੀਜੀ ਤਿਮਾਹੀ ਦੇ ਅੰਤ ਤੱਕ ਆਪਣੇ ਅਹੁਦੇ ਤੋਂ ਸੇਵਾਮੁਕਤ ਹੋ ਜਾਣਗੇ। ਰੂਸੋ ਪਿਛਲੇ ਲਗਭਗ 20 ਸਾਲਾਂ ਤੋਂ ਕੰਪਨੀ ਨਾਲ ਜੁੜੇ ਹੋਏ ਸਨ।

ਉਨ੍ਹਾਂ ਦਾ ਨਾਮ ਹਾਲ ਹੀ ਵਿਚ ਸੁਰਖੀਆਂ ਵਿਚ ਉਦੋਂ ਆਇਆ ਸੀ ਜਦੋਂ ਨਿਊ ਯਾਰਕ ਦੇ ਲਾਗਾਰਡੀਆ ਹਵਾਈ ਅੱਡੇ 'ਤੇ ਏਅਰਲਾਈਨ ਦੇ ਜਹਾਜ਼ ਨਾਲ ਵਾਪਰੇ ਹਾਦਸੇ ਮਗਰੋਂ ਉਨ੍ਹਾਂ ਨੇ ਪੀੜਤਾਂ ਲਈ ਦਿੱਤੇ ਹਮਦਰਦੀ ਸੰਦੇਸ਼ ਦੌਰਾਨ ਸਿਰਫ਼ ਇੰਗਲਿਸ਼ ਭਾਸ਼ਾ ਦੀ ਵਰਤੋਂ ਸੀ, ਉਨ੍ਹਾਂ ਦੀ ਚਾਰ ਮਿੰਟ ਦੀ ਵੀਡੀਓ ਵਿਚ ਸਿਰਫ਼ ਦੋ ਸ਼ਬਦ ਹੀ ਫ੍ਰੈਂਚ ਦੇ ਸਨ ਅਤੇ ਇਸ ਕਾਰਨ ਉਨ੍ਹਾਂ ਦੀ ਕਾਫੀ ਆਲੋਚਨਾ ਹੋਈ ਸੀ, ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਇਸ 'ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ।

ਰੂਸੋ ਨੇ ਬਾਅਦ ਵਿਚ ਮਾਫੀ ਮੰਗਦੇ ਹੋਏ ਕਿਹਾ ਸੀ ਕਿ ਕਈ ਸਾਲਾਂ ਤੱਕ ਸਿੱਖਣ ਦੇ ਬਾਵਜੂਦ ਉਹ ਅਜੇ ਵੀ ਫਰੈਂਚ ਭਾਸ਼ਾ ਵਿਚ ਆਪਣੇ-ਆਪ ਨੂੰ ਸਹੀ ਢੰਗ ਨਾਲ ਬਿਆਨ ਕਰਨ ਵਿਚ ਅਸਮਰੱਥ ਹਨ। ਕਿਊਬੈਕ ਵਿਚ ਏਅਰ ਕੈਨੇਡਾ ਦਾ ਮੁੱਖ ਦਫ਼ਤਰ ਹੋਣ ਕਾਰਨ ਸੀ.ਈ.ਓ. ਲਈ ਫਰੈਂਚ ਬੋਲਣਾ ਇੱਕ ਅਹਿਮ ਮੁੱਦਾ ਬਣਿਆ। ਬੋਰਡ ਵੱਲੋਂ ਹੁਣ ਨਵੇਂ ਸੀ.ਈ.ਓ.ਦੀ ਚੋਣ ਵੇਲੇ ਫਰੈਂਚ ਭਾਸ਼ਾ ਦੀ ਮੁਹਾਰਤ ਨੂੰ ਵੀ ਇੱਕ ਮੁੱਖ ਸ਼ਰਤ ਵਜੋਂ ਸ਼ਾਮਲ ਕੀਤੇ ਜਾਣ ਦਾ ਵਿਚਾਰ ਕੀਤਾ ਜਾ ਰਿਹਾ ਹੈ।