ਧਮਕੀ ਮਿਲਣ ਤੋਂ ਬਾਅਦ ਏਅਰ ਇੰਡੀਆ ਫਲਾਈਟ ਨੇ ਕੀਤੀ ਐਮਰਜੈਂਸੀ ਲੈਂਡਿੰਗ

ਨਵੀਂ ਦਿੱਲੀ ਤੋਂ ਸ਼ਿਕਾਗੋ ਜਾ ਰਹੀ ਏਅਰ ਇੰਡੀਆ ਦੀ ਉਡਾਣ AI127 ਨੇ ਮੰਗਲਵਾਰ ਸਵੇਰੇ ਨੂਨਾਵਟ ਦੇ ਇਕਾਲੂਇਟ ਹਵਾਈ ਅੱਡੇ ’ਤੇ ਐਮਰਜੈਂਸੀ ਲੈਂਡਿੰਗ ਕੀਤੀ, ਜਦੋਂ ਓਨਲਾਈਨ ਇਕ ਸੁਰੱਖਿਆ ਖ਼ਤਰਾ ਪੋਸਟ ਕੀਤਾ ਗਿਆ।

ਆਰਸੀਐਮਪੀ (RCMP) ਨੇ ਦੱਸਿਆ ਕਿ ਸਵੇਰੇ 5:21 ਵਜੇ ਜਹਾਜ਼ ਸੁਰੱਖਿਅਤ ਤੌਰ ’ਤੇ ਉਤਾਰਿਆ ਗਿਆ ਅਤੇ ਸਾਰੇ 211 ਯਾਤਰੀ ਤੇ ਕ੍ਰੂ ਮੈਂਬਰਾਂ ਨੂੰ ਟਰਮੀਨਲ ’ਤੇ ਭੇਜ ਦਿੱਤਾ ਗਿਆ ਜਿੱਥੇ ਉਨ੍ਹਾਂ ਦੀ ਦੁਬਾਰਾ ਸੁਰੱਖਿਆ ਜਾਂਚ ਕੀਤੀ ਜਾ ਰਹੀ ਹੈ।

ਏਅਰ ਇੰਡੀਆ ਨੇ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਇਹ ਲੈਂਡਿੰਗ ਪ੍ਰੀ-ਕਾਊਸ਼ਨਰੀ ਕਦਮ ਵਜੋਂ ਕੀਤੀ ਗਈ। ਏਅਰਲਾਈਨ ਨੇ ਕਿਹਾ ਕਿ ਹਾਲੀਆ ਦਿਨਾਂ ਵਿਚ ਉਸਨੂੰ ਅਤੇ ਹੋਰ ਏਅਰਲਾਈਨਾਂ ਨੂੰ ਕਈ ਝੂਠੇ ਸੁਰੱਖਿਆ ਖ਼ਤਰਿਆਂ ਦਾ ਸਾਹਮਣਾ ਕਰਨਾ ਪਿਆ ਹੈ, ਜੋ ਬਾਅਦ ਵਿਚ ਨਿਰਾਧਾਰ ਸਾਬਤ ਹੋਏ ਹਨ।

ਆਰਸੀਐਮਪੀ ਅਤੇ ਟ੍ਰਾਂਸਪੋਰਟ ਕੈਨੇਡਾ ਅਧਿਕਾਰੀਆਂ ਨੇ ਜਹਾਜ਼ ਅਤੇ ਸਾਰੇ ਯਾਤਰੀਆਂ ਦੀ ਵਿਸਥਾਰ ਨਾਲ ਜਾਂਚ ਕੀਤੀ। ਜਹਾਜ਼ ਨੂੰ ਸੁਰੱਖਿਅਤ ਘੋਸ਼ਿਤ ਕੀਤੇ ਜਾਣ ਤੋਂ ਬਾਅਦ ਉਸਦੀ ਉਡਾਣ ਮੁੜ ਸ਼ੁਰੂ ਕੀਤੀ ਜਾਵੇਗੀ।

ਭਾਰਤੀ ਮੀਡੀਆ ਦੇ ਮੁਤਾਬਕ, ਇਸ ਤੋਂ ਇਕ ਦਿਨ ਪਹਿਲਾਂ ਹੀ ਮੁੰਬਈ ਤੋਂ ਨਿਊਯਾਰਕ ਜਾਣ ਵਾਲੀ ਇਕ ਹੋਰ ਏਅਰ ਇੰਡੀਆ ਉਡਾਣ ਨੂੰ ਵੀ ਓਨਲਾਈਨ ਬੰਬ ਧਮਕੀ ਤੋਂ ਬਾਅਦ ਦਿੱਲੀ ਵੱਲ ਮੋੜਿਆ ਗਿਆ ਸੀ।

ਇਕਾਲੂਇਟ ਦੀ ਇਹ ਲੈਂਡਿੰਗ ਕੈਨੇਡਾ ਦੇ ਆਰਕਟਿਕ ਖੇਤਰ ਵਿਚ ਕਿਸੇ ਅੰਤਰਰਾਸ਼ਟਰੀ ਉਡਾਣ ਦੀ ਵਿਰਲ ਘਟਨਾ ਹੈ, ਜਿੱਥੇ ਕੁਝ ਚੁਣਿੰਦੀਆਂ ਹਵਾਈ ਪੱਟੀਆਂ ਨੂੰ ਐਮਰਜੈਂਸੀ ਲੈਂਡਿੰਗ ਲਈ ਮਨਜ਼ੂਰੀ ਹੈ।