ਐਲਬਰਟਾ ਦੀ ਪ੍ਰੀਮੀਅਰ ਨੇ ਵੈਸਟ ਕੋਸਟ ਤੱਕ ਪ੍ਰਸਤਾਵਿਤ ਤੇਲ ਪਾਈਪਲਾਈਨ ਬਾਰੇ ਅਪਡੇਟ ਕੀਤੀ ਮੁਲਤਵੀ

ਐਲਬਰਟਾ ਸਰਕਾਰ ਨੇ ਵੈਸਟ ਕੋਸਟ ਤੱਕ ਪ੍ਰਸਤਾਵਿਤ ਨਵੀਂ ਤੇਲ ਪਾਈਪਲਾਈਨ ਯੋਜਨਾ ਬਾਰੇ ਦਿੱਤੀ ਜਾਣ ਵਾਲੀ ਅਧਿਕਾਰਤ ਅਪਡੇਟ ਨੂੰ ਫਿਲਹਾਲ ਕੁਝ ਸਮੇਂ ਲਈ ਟਾਲ ਦਿੱਤਾ ਹੈ। ਪਹਿਲਾਂ ਤੈਅ ਪ੍ਰੋਗਰਾਮ ਮੁਤਾਬਕ, ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਸਵੇਰੇ ਇੱਕ ਪ੍ਰੈੱਸ ਕਾਨਫਰੰਸ ਰਾਹੀਂ ਇਸ ਮਹੱਤਵਪੂਰਨ ਪ੍ਰੋਜੈਕਟ ਦੇ ਅਗਲੇ ਪੜਾਵਾਂ ਅਤੇ ਰੂਟ ਬਾਰੇ ਜਾਣਕਾਰੀ ਸਾਂਝੀ ਕਰਨੀ ਸੀ ਪਰ ਹੁਣ ਇਸ ਨੂੰ ਦਿਨ ਦੇ ਅਗਲੇ ਹਿੱਸੇ ਤੱਕ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ।

ਕੈਨੇਡਾ ਡੇਅ ਦੀ ਛੁੱਟੀ ਅਤੇ ਖਰਾਬ ਮੌਸਮ ਕਾਰਨ ਪ੍ਰਧਾਨ ਮੰਤਰੀ ਦੇ ਦੌਰੇ ਵਿੱਚ ਹੋਈ ਦੇਰੀ ਦੇ ਚੱਲਦਿਆਂ ਇਸ ਐਲਾਨ ਨੂੰ ਇੱਕ ਦਿਨ ਅੱਗੇ ਵਧਾਇਆ ਗਿਆ ਸੀ ਅਤੇ ਅੱਜ ਸਵੇਰ ਦੀ ਮੀਟਿੰਗ ਨੂੰ ਵੀ ਕੁਝ ਘੰਟਿਆਂ ਲਈ ਅੱਗੇ ਖਿਸਕਾ ਦਿੱਤਾ ਗਿਆ ਹੈ।ਜੇਕਰ ਸਭ ਕੁਝ ਯੋਜਨਾ ਮੁਤਾਬਕ ਰਿਹਾ ਤਾਂ ਫੈਡਰਲ ਸਰਕਾਰ 1 ਅਕਤੂਬਰ, 2026 ਤੱਕ ਇਸ ਨੂੰ Project of National Interest ਐਲਾਨ ਸਕਦੀ ਹੈ ਅਤੇ 1 ਸਤੰਬਰ 2027 ਤੋਂ ਇਸ ਦਾ ਨਿਰਮਾਣ ਸ਼ੁਰੂ ਹੋਣ ਦੀ ਉਮੀਦ ਹੈ। ਐਲਬਰਟਾ ਸਰਕਾਰ ਦਾ ਟੀਚਾ ਇਸ ਨੂੰ 2033–34 ਤੱਕ ਪੂਰੀ ਤਰ੍ਹਾਂ ਚਾਲੂ ਕਰਨਾ ਹੈ।

ਇਸ ਪ੍ਰਸਤਾਵਿਤ ਪਾਈਪਲਾਈਨ ਰਾਹੀਂ ਅਲਬਰਟਾ ਤੋਂ ਕੈਨੇਡਾ ਦੇ ਪੱਛਮੀ ਤੱਟ ਤੱਕ ਰੋਜ਼ਾਨਾ 10 ਲੱਖ ਬੈਰਲ ਕੱਚਾ ਤੇਲ ਭੇਜਣ ਦੀ ਯੋਜਨਾ ਹੈ ਤਾਂ ਜੋ ਇਸ ਨੂੰ ਸਿੱਧਾ ਏਸ਼ੀਆਈ ਬਾਜ਼ਾਰਾਂ ਵਿਚ ਸਪਲਾਈ ਕੀਤਾ ਜਾ ਸਕੇ, ਜਿਸ ਨਾਲ ਸੂਬੇ ਦੀ ਆਰਥਿਕਤਾ ਨੂੰ ਵੱਡਾ ਬੂਸਟ ਮਿਲਣ ਦੀ ਉਮੀਦ ਹੈ।