ਐਲਬਰਟਾ ਸਰਕਾਰ ਨੇ ਬੀ.ਸੀ. ਦੇ ਨੌਰਥਵੈਸਟ 'ਚ ਸੰਭਾਵਿਤ ਤੇਲ ਪਾਈਪਲਾਈਨ ਲਈ ਜਾਣਕਾਰੀ ਵੈੱਬਸਾਈਟ ਕੀਤੀ ਲਾਂਚ

ਐਲਬਰਟਾ ਸਰਕਾਰ ਨੇ ਬੀ.ਸੀ. ਦੇ ਨੌਰਥਵੈਸਟ ਵਿਚ ਵੈਸਟ ਕੋਸਟ ਤੇਲ ਪਾਈਪਲਾਈਨ ਬਣਾਉਣ ਦੇ ਆਪਣੇ ਪ੍ਰੋਜੈਕਟ ਲਈ ਇੱਕ ਅਧਿਕਾਰਤ ਵੈੱਬਸਾਈਟ ਲਾਂਚ ਕੀਤੀ ਹੈ। ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਵੈੱਬਸਾਈਟ ਪ੍ਰੋਜੈਕਟ ਬਾਰੇ ਸਹੀ ਜਾਣਕਾਰੀ ਦੇਣ ਅਤੇ ਅਫ਼ਵਾਹਾਂ ਨੂੰ ਰੋਕਣ ਲਈ ਇੱਕ ਮੁੱਖ ਕੇਂਦਰ ਵਜੋਂ ਕੰਮ ਕਰੇਗੀ। ਬਿਟੂਮਨ ਪਾਈਪਲਾਈਨ ਲਈ ਇੱਕ ਵਿਸ਼ੇਸ਼ ਸੈਕਸ਼ਨ ਬਣਾਇਆ ਗਿਆ ਹੈ ਜੋ ਪ੍ਰੋਜੈਕਟ ਬਾਰੇ ਫੈਲੀਆਂ ਗਲਤ ਧਾਰਨਾਵਾਂ ਨੂੰ ਦੂਰ ਕਰਦਾ ਹੈ।

ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਅਜੇ ਤੱਕ ਨਾ ਤਾਂ ਕੋਈ ਰੂਟ ਤੈਅ ਹੋਇਆ ਹੈ, ਨਾ ਹੀ ਉਸਾਰੀ ਸ਼ੁਰੂ ਹੋਈ ਹੈ ਅਤੇ ਨਾ ਹੀ ਸੂਬਾ ਸਰਕਾਰ ਇਸ ਦਾ ਸਾਰਾ ਖਰਚਾ ਚੁੱਕ ਰਹੀ ਹੈ। ਊਰਜਾ ਅਤੇ ਖਣਿਜ ਮੰਤਰੀ ਬ੍ਰਾਇਨ ਜੀਨ ਅਨੁਸਾਰ, ਇਹ ਪਲੇਟਫਾਰਮ ਹਰ ਕੈਨੇਡੀਅਨ ਨੂੰ ਪ੍ਰੋਜੈਕਟ ਦੀ ਤਿਆਰੀ ਬਾਰੇ ਜਾਣੂ ਰੱਖਣ ਲਈ ਬਣਾਇਆ ਗਿਆ ਹੈ।ਪਿਛਲੇ ਸਾਲ ਅਕਤੂਬਰ ਵਿੱਚ ਸਰਕਾਰ ਨੇ ਸ਼ੁਰੂਆਤੀ ਯੋਜਨਾਬੰਦੀ ਲਈ $14 ਮਿਲੀਅਨ ਦਾ ਐਲਾਨ ਕੀਤਾ ਸੀ।

ਸਰਕਾਰ ਦਾ ਟੀਚਾ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਨਿੱਜੀ ਕੰਪਨੀਆਂ ਇਸ ਪ੍ਰੋਜੈਕਟ ਦੀ ਅਗਵਾਈ ਕਰਨ ਅਤੇ ਇੰਡੀਜਨਸ ਭਾਈਚਾਰੇ ਇਸ ਵਿੱਚ ਹਿੱਸੇਦਾਰ ਬਣਨ।ਪ੍ਰੀਮੀਅਰ ਡੈਨੀਅਲ ਸਮਿਥ ਅਤੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਿਚਕਾਰ ਹੋਏ ਐਨਰਜੀ ਸਮਝੌਤੇ ਦਾ ਇਹ ਪ੍ਰੋਜੈਕਟ ਇਕ ਅਹਿਮ ਹਿੱਸਾ ਹੈ। ਸਰਕਾਰ 1 ਜੁਲਾਈ, 2026 ਤੱਕ ਇਸ ਦੀ ਅਰਜ਼ੀ ਫੈਡਰਲ 'ਮੇਜਰ ਪ੍ਰੋਜੈਕਟਸ ਆਫਿਸ' ਨੂੰ ਸੌਂਪਣ ਦੀ ਯੋਜਨਾ ਬਣਾ ਰਹੀ ਹੈ।