ਸ਼ੁਲਜ਼ ਦੀ ਯੂ. ਸੀ. ਪੀ. ਲੀਡਰਸ਼ਿਪ ਕੰਪੇਨ ਸਾਂਭੇਗੀ ਸਾਬਕਾ ਕੰਜ਼ਰਿਵੇਟਿਵ ਓਪੋਜੀਸ਼ਨ ਲੀਡਰ ਰੋਨਾ ਐਂਬਰੋਜ਼

ਐਲਬਰਟਾ ਦੀ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੀ ਅਗਵਾਈ ਆਪਣੇ ਹੱਥ ਵਿਚ ਲੈਣ ਲਈ ਚੋਣ ਮੈਦਾਨ ਵਿਚ ਉਤਰੀ ਰੈਬੇਕਾ ਸ਼ੁਲਜ਼ ਦੀ ਕੰਪੇਨ ਵਿਚ ਹੁਣ ਹਾਈ ਪ੍ਰੋਫਾਈਲ ਸਾਬਕਾ ਫੈਡਰਲ ਰਾਜਨੇਤਾ ਰੋਨਾ ਐਂਬਰੋਜ਼ ਸਾਥ ਦੇਵੇਗੀ। ਐਂਬਰੋਜ਼ ਸਾਬਕਾ ਕੰਜ਼ਰਿਵੇਟਿਵ ਓਪੋਜੀਸ਼ਨ ਲੀਡਰ ਹਨ।

ਰੈਬੇਕਾ ਸ਼ੁਲਜ਼ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਰੋਨਾ ਐਂਬਰੋਜ਼ ਜਾਣਦੇ ਹਨ ਕਿ ਪਾਰਟੀ ਨੂੰ ਕਿਵੇਂ ਲੀਡ ਅਤੇ ਇੱਕਜੁਟ ਕਰਨਾ ਹੈ। ਉੱਥੇ ਹੀ, ਐਂਬਰੋਜ਼ ਨੇ ਵੀ ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਪੋਸਟ ਜ਼ਰੀਏ ਸ਼ੁਲਜ਼ ਦੀਆਂ ਤਾਰੀਫ਼ਾਂ ਦੇ ਪੁਲ ਬੰਨ੍ਹੇ ਹਨ। ਰੋਨ ਐਂਬਰੋਜ਼ ਨੇ ਕੈਲਗਰੀ ਸ਼ਾਅ ਤੋਂ ਵਿਧਾਇਕ ਸ਼ੁਲਜ਼ ਨੂੰ ਪ੍ਰਿੰਸੀਪਲਡ ਕੰਜ਼ਰਵੇਟਿਵ ਤੇ ਕੰਪੈਸ਼ਨਏਟ ਐਲਬਰਟਨ ਦੱਸਿਆ ਹੈ।

ਉੱਥੇ ਹੀ, ਸ਼ੁਲਜ਼ ਨੇ ਵੀਡੀਓ ਵਿਚ ਕਿਹਾ ਕਿ ਐਲਬਰਟਨਸ ਇਸ ਗੱਲ ਨੂੰ ਲੈ ਕੇ ਚਿੰਤਤ ਹਨ ਕਿ ਜੇ ਅਗਲੀ ਬਸੰਤ ਦੀਆਂ ਸੂਬਾਈ ਚੋਣਾਂ ਵਿਚ ਨਿਊ ​​ਡੈਮੋਕਰੇਟਸ ਚੁਣੇ ਗਏ ਤਾਂ ਮੌਜੂਦਾ ਆਰਥਿਕ ਤਰੱਕੀ ਪਟੜੀ ਤੋਂ ਉਤਰ ਸਕਦੀ ਹੈ। ਗੌਰਤਲਬ ਹੈ ਕਿ ਲੀਡਰਸ਼ਿਪ ਦੀ ਦੌੜ ਵਿਚ ਸ਼ਾਮਲ ਹੋਣ ਲਈ ਸ਼ੁਲਜ਼ ਨੇ ਸੂਬੇ ਦੀ ਚਿਲਡਰਨ ਸਰਵਿਸਿਜ਼ ਮਿਨਿਸਟਰ ਵਜੋਂ ਅਸਤੀਫ਼ਾ ਦਿੱਤਾ ਸੀ।

ਟ੍ਰੈਵਿਜ਼ ਟੋਜ਼ ਅਤੇ ਰਾਜਨ ਸਾਹਨੀ ਨੇ ਵੀ ਲੀਡਰਸ਼ਿਪ ਦੀ ਚੋਣ ਲੜਨ ਲਈ ਆਪਣੇ ਕੈਬਨਿਟ ਅਹੁਦਿਆਂ ਤੋਂ ਅਸਤੀਫ਼ੇ ਦਿੱਤੇ ਹਨ।