ਐਲਬਰਟਾ ਸਰਕਾਰ ਨੇ ਅਕਤੂਬਰ ਵਿੱਚ ਇੱਕ ਸੂਬਾਈ ਰਿਫਰੈਂਡਮ ਕਰਵਾਉਣ ਦਾ ਕੀਤਾ ਐਲਾਨ

ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਵੀਰਵਾਰ ਸ਼ਾਮ ਸੂਬੇ ਦੇ ਨਾਮ ਇੱਕ ਟੈਲੀਵਿਜ਼ਨ ਸੰਬੋਧਨ ਦੌਰਾਨ 19 ਅਕਤੂਬਰ ,2026 ਨੂੰ ਇੱਕ ਸੂਬਾਈ ਰਿਫਰੈਂਡਮ ਕਰਵਾਉਣ ਦਾ ਐਲਾਨ ਕੀਤਾ ਹੈ। ਇਸ ਵਿੱਚ ਕੁੱਲ 9 ਸਵਾਲ ਪੁੱਛੇ ਜਾਣਗੇ, ਜੋ ਮੁੱਖ ਤੌਰ 'ਤੇ ਇਮੀਗ੍ਰੇਸ਼ਨ ਅਤੇ ਸੰਵਿਧਾਨ ਨਾਲ ਸਬੰਧਤ ਹੋਣਗੇ।

ਸਮਿਥ ਨੇ ਫੈਡਰਲ ਸਰਕਾਰ ਦੀ ਪਿਛਲੀ ਸਮੂਹਿਕ ਇਮੀਗ੍ਰੇਸ਼ਨ ਨੀਤੀ 'ਤੇ ਤਿੱਖਾ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਬਹੁਤ ਘੱਟ ਸਮੇਂ ਵਿੱਚ ਬਹੁਤ ਜ਼ਿਆਦਾ ਲੋਕਾਂ ਦੇ ਆਉਣ ਕਾਰਨ ਸੂਬੇ ਦੇ ਸਕੂਲ, ਐਮਰਜੈਂਸੀ ਰੂਮ ਅਤੇ ਸੋਸ਼ਲ ਸਪੋਰਟ ਸਿਸਟਮ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ। ਉਨ੍ਹਾਂ ਕਿਹਾ ਕਿ ਰਿਫਰੈਂਡਮ ਰਾਹੀਂ ਸੂਬਾ ਨਿਵਾਸੀਆਂ ਤੋਂ ਪੁੱਛਿਆ ਜਾਵੇਗਾ ਕਿ ਕੀ ਐਲਬਰਟਾ ਨੂੰ ਅੰਤਰਰਾਸ਼ਟਰੀ ਵਿਦਿਆਰਥੀ, ਅਸਥਾਈ ਵਿਦੇਸ਼ੀ ਕਾਮੇ ਅਤੇ ਸ਼ਰਣ ਮੰਗਣ ਵਾਲਿਆਂ ਦੀ ਗਿਣਤੀ ਸੀਮਤ ਕਰਨ ਲਈ ਕੰਟਰੋਲ ਆਪਣੇ ਹੱਥਾਂ ਵਿੱਚ ਲੈਣਾ ਚਾਹੀਦਾ ਹੈ।

ਪ੍ਰੀਮੀਅਰ ਨੇ ਕਿਹਾ ਕਿ ਐਲਬਰਟਨਜ਼ ਨੇ ਹਾਲ ਹੀ ਵਿੱਚ ਹੋਈਆਂ ਟਾਊਨ ਹਾਲ ਪੈਨਲ ਵਿੱਚ ਇਮੀਗ੍ਰੇਸ਼ਨ ਨੂੰ ਮੁੱਖ ਚਿੰਤਾ ਦੱਸਿਆ ਸੀ ਅਤੇ ਇਸ ਲਈ ਉਹ ਤਬਦੀਲੀਆਂ ਲਿਆਉਣ ਲਈ ਰਿਫਰੈਂਡਮ ਲਿਆ ਰਹੇ ਹਨ।

ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਤਬਦੀਲੀਆਂ ਵਿੱਚ ਇੱਕ ਅਜਿਹਾ ਕਾਨੂੰਨ ਪਾਸ ਕਰਨਾ ਸ਼ਾਮਲ ਹੋ ਸਕਦਾ ਹੈ ਜੋ ਇਹ ਲਾਜ਼ਮੀ ਕਰੇਗਾ ਕਿ ਸੂਬੇ ਵਲੋਂ ਫੰਡ ਕੀਤੇ ਜਾਣ ਵਾਲੇ ਪ੍ਰੋਗਰਾਮਾਂ ਜਿਵੇਂ ਕਿ ਸਿਹਤ, ਸਿੱਖਿਆ ਅਤੇ ਹੋਰ ਸੋਸ਼ਲ ਸਰਿਵਸ ਸਿਰਫ਼ ਉਨ੍ਹਾਂ ਲੋਕਾਂ ਲਈ ਉਪਲਬਧ ਹੋਣ ਜੋ ਕੈਨੇਡੀਅਨ ਸਿਟੀਜਨ ਅਤੇ ਸਥਾਈ ਨਿਵਾਸੀ ਹਨ ਜਾਂ ਜਿਨ੍ਹਾਂ ਕੋਲ ਐਲਬਰਟਾ ਅਪਰੂਵਡ ਇਮੀਗ੍ਰੇਸ਼ਨ ਸਟੇਟਸ ਹੈ।