19.57C Vancouver 19.57C VancouverFeb 18, 2026 2:30 PM - Connect Newsroom - Jasmine Singh
ਐਲਬਰਟਾ ਵੱਲੋਂ ਜੰਗਲੀ ਅੱਗ ਨਾਲ ਨਜਿੱਠਣ ਲਈ $400 ਮਿਲੀਅਨ ਦੇ ਨਵੇਂ ਵਾਟਰ ਬੋਮਬਰ ਜਹਾਜ਼ਾਂ ਦਾ ਐਲਾਨ ਕੀਤਾ ਗਿਆ ਹੈ। ਬੀਤੇ ਦਿਨ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਦਿ ਹੈਵਿਲੈਂਡ ਏਅਰਕ੍ਰਾਫਟ ਔਫ ਕੈਨੇਡਾ ਨਾਲ ਪੰਜ ਨਵੇਂ ਕੈਨੇਡਾਇਰ 515 ਫਾਇਰਫਾਈਟਿੰਗ ਏਅਰਕ੍ਰਾਫਟ ਖਰੀਦਣ ਲਈ ਲਗਭਗ $400 ਮਿਲੀਅਨ ਦੇ ਸਮਝੌਤੇ ਦਾ ਐਲਾਨ ਕੀਤਾ।ਇਨ੍ਹਾਂ ਨੂੰ ਅਲਬਰਟਾ ਵਿਚ ਬਣਾਇਆ ਜਾਵੇਗਾ, ਜਿਸ ਨਾਲ ਸੂਬੇ ਵਿੱਚ ਲਗਭਗ 1,000 ਨਵੀਆਂ ਨੌਕਰੀਆਂ ਪੈਦਾ ਹੋਣ ਦੀ ਉਮੀਦ ਹੈ।
ਪਹਿਲਾ ਜਹਾਜ਼ 2031 ਦੀ ਸਪਰਿੰਗ ਤੱਕ ਮਿਲਣ ਦੀ ਸੰਭਾਵਨਾ ਹੈ ਅਤੇ ਬਾਕੀ ਚਾਰ ਜਹਾਜ਼ ਅਗਲੇ ਦੋ ਸਾਲਾਂ ਵਿੱਚ ਸਪਲਾਈ ਕੀਤੇ ਜਾਣਗੇ।ਇਨ੍ਹਾਂ ਦੇ ਆਉਣ ਨਾਲ ਸੂਬੇ ਦੀ ਹਵਾਈ ਰਸਤੇ ਰਾਹੀਂ ਪਾਣੀ ਸੁੱਟਣ ਦੀ ਕੁੱਲ ਸਮਰੱਥਾ ਵਿੱਚ 60 ਫੀਸਦੀ ਤੱਕ ਦਾ ਵਾਧਾ ਹੋਵੇਗਾ।
ਇਹ 330 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਉੱਡ ਸਕਦੇ ਹਨ, ਜੋ ਮੌਜੂਦਾ ਸੀ.ਐਲ.-215 ਜਹਾਜ਼ਾਂ ਨਾਲੋਂ 15 ਫੀਸਦੀ ਤੇਜ਼ ਹੈ ਅਤੇ ਝੀਲਾਂ ਜਾਂ ਜਲ ਸਰੋਤਾਂ ਦੇ ਉੱਪਰੋਂ ਲੰਘਦਿਆਂ ਸਿਰਫ਼ 12 ਸਕਿੰਟਾਂ ਵਿੱਚ ਆਪਣੀ ਟੈਂਕੀ ਭਰ ਸਕਦੇ ਹਨ। ਇਕ ਵਾਰ ਵਿੱਚ ਇਹ 6,100 ਲੀਟਰ ਤੋਂ ਵੱਧ ਪਾਣੀ ਲੈ ਕੇ ਜਾ ਸਕਦੇ ਹਨ।
